1 M'e̱fa bi nheki mhets'i n'ar döta nt'udi. Da handa n'ar 'be̱hñö mi he ar hyadi, mi to̱ har zönö, ne mi hu'sa n'ar ntsant'i mi huxa 're̱t'amayoho ya tso̱. 2 Mi da̱thi ne xa mi mafi nts'e̱di mi tho ya u̱gi, ngetho ma nda m'u̱ ár bötsi. 3 Bi nheki man'ar nt'udi mhets'i. Nupya da handa mi 'ba̱hnu̱ n'ar the̱nga zothe mi tu yoto yá ñö, 're̱t'a yá ndöni, ne mi hu'sa n'ar ntsant'i n'a ngu n'a yá ñö. 4 Ne nunár mazu̱ bi gu̱t'a n'a hñu xe̱ni gatho ya tso̱ mhets'i, ne ba e̱ngwa har ha̱i. Ne bi m'a̱ bi ñhandwi ar 'be̱hñö mi da̱thi, mi ne nda zapa ár bötsi nú'mu̱ nda m'u̱i. 5 Nunar 'be̱hñönu̱ bi m'u̱ ár bötsi mar ts'u̱nt'u̱, ma da ndö xo̱ge har ximha̱i di hö n'ar t'obo̱jö. Ne bi thömba ár bötsi da hñuxkwi Jö hár thuxandö. 6 Ha nunar 'be̱hñö bi ma ba ñ'önga ha ya ot'at'o̱ho̱ habu̱ xki hyokwabi Jö, ne nda t'ini hñu nje̱ye̱ made. 7 M'e̱fa ba njanu̱ n'ar tuhni mhets'i. Ar ndö'e̱nxe̱ Mige ne yá e̱nxe̱ mi ntunkwi ar zothe, mi fa̱xa yá e̱nxe̱ n'ehe. 8 Ar zothe ne yá e̱nxe̱ hinte bi za̱ te bi me̱'u̱, ne himbi nthe̱gi nda m'u̱hnu̱ mhets'i. 9 Bi t'e̱m'u̱ ar zothe, getnu̱ ar k'eñö mi 'bu̱ mam'e̱t'o, ne ár thuhu ar ts'ondöhi ne ar ts'oxe̱di, ka ya meximha̱i. Nunu̱ ne yá ts'o'e̱nxe̱ ba t'e̱nga injawa har ximha̱i. 10 N'a nda o̱ta n'ar mhönu̱ mhets'i mi enö: 11 Ha nuya ku xi döhmö ar ts'ondöhi ngetho xi jamfibi ár ji ar tsi Ntxönandöni, ne xi da̱twa majöni ár mhö Jö, xki 'ye̱nt'a yá te nda tho'u̱. 12 Jange njohyahu̱ mhets'i ne gatho ya mengunu̱. Ha hwëkate nu'ahu̱ gi 'bu̱hu̱ har ximha̱i ne har dehe, ngetho ar ts'ondöhi xpa köp'u̱ xa tsu̱ ar kwe̱, ngetho pödi tx'u̱da ya pa pongwabi. 13 Nú'mu̱ mba t'e̱nga mhets'i ba 'be̱hna har ximha̱i nunar zothenu̱, bi nkuhwi ar 'be̱hñö xki m'u̱ ár tsi ts'u̱nt'u̱. 14 Ha nunar 'be̱hñö bi t'umba nuya yoho yá hwa ar döta nxu̱ni, nda nsa̱ni nda zop'u̱ ar zothe. Ne nda m'u̱ har ot'at'o̱ho̱ habu̱ xi hyokwa Jö nda t'ini hñunje̱ye̱ made. 15 Ha nunar zothe bi tso hár ne ra nze̱ye̱ ar dehe ngu n'ar döthe, ne bi 'ye̱mba mo̱te ar 'be̱hñö nda duxhmö. 16 Ha nunar ha̱i bi ma̱xa ar 'be̱hñö, ngetho bi dut'a gatho ar döthe xki zo ar zothe. 17 Nunar zothe xa bi u̱tsa ar 'be̱hñö, ne bi ma ba ntunkwi yá 'be̱to nu'u̱ o̱twabi nö'ö xi 'be̱pa Jö, ne da̱majöni ñ'emu̱ibi ar tsi Hmu Hesukristo.
