YA NTHANDI 11

1Bi t'aka n'ar xithi nt'e̱ni ne bi t'engagi: 2Ha nunár thi ar nijö tsop'u̱, yo gi e̱ni, ngetho xi nda̱twa nu'u̱ hingya xodyo, ha nuyu̱ ma da ne'ma ar njöpa hnini hñu nje̱ye̱ made. 3Ma ga pe̱hna nu yoho ma m'e̱hni da hye ya he dumu̱i, da mömga ma mhö nuya hñu nje̱ye̱ madeyu̱. 4Nuya m'e̱hniyu̱ gehyu̱ ngu yo 'ba̱i ya njömdo̱ni, ne ngu yoho ya mfox'yo 'ba̱hnu̱ hár nthandi Jö togo ár ndö ar ximha̱i. 5Nuyu̱ po̱ngar tsibi ha yá ne, ne njap'u̱ ho yá ñ'u̱ni honi te gatho da japabi. Njap'u̱ ma da du gatho nu'u̱ togo ne te da japabi'u̱. 6Pe̱'sa ar ts'e̱di da got'a mhets'i, hinda 'wöi gatho ya pa di mömba ár mhö Jö. Tsa̱ da japa da nji ar dehe, ne tsa̱ da me̱hna ya döta thogi har ha̱i gatho nö'ö da ne'u̱. 7Nu xta wadi da da̱majöni'u̱, ma da ep'u̱ ar ts'ozu'we, xpa po̱xa har nzonganzafi da ntunkwiyu̱, da döhö ne da hyo. 8Yá ndo'yo ma da ts'ohnu̱ madeda ár ta̱i ar döta hnini habu̱ bi mpont'a ma tsi Hmuhu̱. Nunar hnininu̱ po̱ntho ar Sodoma ne ar Ehipto. 9Ne ya jö'i xki 'ñe ha gatho ya hnini, gatho ya m'u̱i, gatho ya hñö, ne gatho ya ha̱i, ma da k'öt'watho yá ndo'yo hñupa made, ngetho hinda ma da the̱gi togo da 'ya̱gi. 10Gatho ya meximha̱i ma da njohya xta duyu̱, ngetho nuya m'e̱hniyu̱ xki japi xki tho ya u̱gi gathoyu̱. Jange xa ma da njohya, ne da mpe̱hna ya nt'uni n'a ngu n'a. 11Nepu̱ mi tho hñupa made, bi yu̱t'a ha yá ndo'yo ar hñö unga ar te ba pe̱hna Jö, ne bi mengi bi nangi bi m'a̱i. Gatho nu'u̱ togo bi hyandi xa bi ntsu. 12Ne bi nheki n'ar mhö ndi 'ñe mhets'i, bi 'ñemba nu'u̱ xki mengi xki nte: 13Ne bi nja 'mu̱ n'a ra döta nhwöni. Nunar nhwöninu̱ bi yo̱t'a n'a 're̱t'a xe̱ni gatho ar hnini, ne bi du hñun'a̱te ne 're̱t'anthebe ya jö'i. Ha nu ma'ra bi bongi, xa bi ntsu ne bi nsundabi Jö bi 'bu̱ mhets'i. 14Nunár ñoho ar döta thogi xi wadi. Hyanthu̱pya ba ekwatho ár hñu. 15Ar yoto e̱nxe̱ bi hyu̱xt'a ár k'axt'athu̱xi, ne bi nheki 'ra ya mhönu̱ mhets'i mi eñ'u̱ njawa: Gatho ya ndö mi ja har ximha̱i, xi hñönga ma tsi Dadahu̱ ne ár Kristo, ne go ma da ndö'ö gatho ya pa. 16Ha nuya n'a̱temagoho ya tsi dönzia mi huxa ha yá thuxandö mi ñhandwi Jö, bi nda̱ndihmö bi me̱ yá hmi har ha̱i mi nsunda Jö. 17Mi eñ'u̱: Di 'ra'ahe njamödi, tsi Hmu, hinte ar ñhembi'i te gi 'yo̱t'e. Nu'ge ngi 'bu̱i, gi 'bu̱pya, ne ma gi 'bu̱ gatho ya pa, xka ñ'udi ri döta ts'e̱di, ne xka du̱'mi gi ndö. 18Bi mbo̱ yá kwe̱ gatho ya meximha̱i, nupya ma da nheki ri kwe̱ n'ehe. Xi zo̱ ar pa gi hñö'spa majöni nuya xi du, ne gi hwata nu'u̱ togo hwata ar ximha̱i. Ha nuya ri m'e̱hni, ya gamfi ne gatho nuya ri 'be̱go tsup'a ri thuhu, nuya döta, nuya t'u̱lo, ma gi umba yá nthöhö. 19M'e̱fa bi xo ár nijö Jö mhets'i, ne bi nheki mi 'bu̱hnu̱ mbo ar 'bezankohi. Mi yotnu̱ ya hwe̱i, mi nheki ya ñheti, ya ñu̱ni, xa bi da̱ nze̱ye̱ ya ndo, ne bi nja n'ar nhwöni.

will be added

X\