AR FILEMON 1

1Nuga dar Pablo, xi jokagiwa har fa̱di ngetho di pe̱pa ar tsi Hmu Hesukristo. Tsi ku Filemon, ma hoga ku'ihe ne ma ñ'ohu̱ hár 'be̱fi Jö, nuga ne ar ku Timoteo di pe̱ñ'ahe nunar he̱'minu̱. 2Di pe̱mfe ar nze̱ngwa gatho nuya ku mhunts'a ha ri ngu, ne di pe̱mfe nze̱ngwa ar ku Apia, ne ar ku Arkipo ma ñ'owihu̱ fa̱xkagihu̱ har 'be̱fi. 3Jö ma Dadahu̱ ne ma tsi Hmuhu̱ Hesukristo, da hwëk'ahu̱ yá ñho, ne da 'ra'ahu̱ n'ar hogam'u̱i. 4Núm'u̱ di a̱pa Jö, hyax'mu̱ di beñ'a'i, ne di umba njamödi ri ñ'emu̱i gi pe̱ts'i. 5Ngetho di o̱de döta ri ñ'emu̱i gi pe̱'spabi ar tsi Hmu Hesukristo. Hinge ho̱nse̱'ö, xa gi mö ya ku n'ehe. 6Di a̱pa Jö da nheki yá hoga 'be̱fi ri ñ'emu̱i, ne da fö gatho nuya ñhoyu̱ gi pe̱'su̱ ha ri mu̱ihu̱ ngetho xka jamfihu̱ ar tsi Hmu Hesukristo. 7Di pe̱'se n'ar döta johya ne xi hubga ma mu̱ihe nuna ri mhöte, tsi ku, ngetho xka hu'mba yá mu̱i ma'ra ya ku n'ehe. 8Nuga di pe̱'shmö ar ts'e̱di ngu ár 'be̱gogi ar tsi Hmu Hesukristo, ga 'be̱p'a'i gi 'yo̱t'a nö'ö di 'ñep'a'i. 9Ha di mhöhu̱ n'a ngu n'a, jange di beni xiñho ga a̱'a ar möte, nuga ar Pablo dar dönzia, ne nupya di o har fa̱di ngetho di mömba ár mhö ar tsi Hmu. 10Di a̱'a ar möte gi tsöma nö'ö ma ri 'be̱gohmö ar Onesimo. Xi ñ'emu̱i ár mhö Jö nú'mu̱ da zokwa har fa̱di, jange di nu ngu ma t'u̱. 11Ma pa'u̱ himar hoga 'be̱go, ha nupya hö, di hoñhu̱ ár mfa̱ts'i, ngu'i nguga n'ehe. 12Jange nupya di pe̱ñ'ap'u̱ man'agi. Numañho ngu gi nugagi, ngetho xa di mödi. 13Nuga ndi nemhö nga tsömi nda me̱pkagiwa har fa̱di, ne nö'ö ngi pe̱pkahmö, go nda me̱pkaginu̱ nupya di owa har fa̱di, ngetho di mömba ár hoga mhö Jö. 14Hinte da ne ga pe̱se̱. M'e̱t'o da ne ngi pödi, ne hinga ja'a'i gi fa̱xkagi. Di ne da bo̱nse̱ ri mu̱i nö'ö gi beni xiñho gi 'yo̱t'e. 15Ha di födi nu'mu̱ Jö bi jap'u̱, bi 'weka 'ra ya tsi pa, nep'u̱ da tsa̱ gi pengi gi nthe̱wi, ne hingi 'be̱pya; 16hinge ngu n'ar 'be̱gotho, nupya ngu n'ar hmöka ku. Nuga xa di mödi, di beni töte tsit'a ri mu̱i gi möke, ngetho nupya hinge ho̱nse̱ ri 'be̱go, ri ku n'ehe hár ñ'emu̱i ar tsi Hmu. 17Jange nu'mu̱ majöni gi mökagi ngu n'ar hoga ñ'ohu̱ hár 'be̱fi Jö, xta zo̱mp'u̱ ar Onesimo, numañho ngu gi numañhogi. 18Nu'mu̱ te xi ts'ok'a'i wa te tu'i, hñuts'i go di tuga. 19Nuga ar Pablo di ja ma 'ye̱ di huxa ma thuhu, di e̱nt'a ma ne ga jut'a'i, hinga eñhu̱ nu'ge gi tukagi n'ehe. 20'Yo̱tka nunar ñho di a̱'i tsi ku, ngetho xka ñ'emu̱i ar tsi Hmu, ne njap'u̱ gi jakagi ga njohya, ngetho di nkuhu̱ har tsi Dada. 21Di ot'a nunar he̱'minu̱ ngetho di pödi gi o̱ nö'ö nsi'a'i. Di beni hinge ho̱nse̱ nö'ö di xi'a'i, ma gi 'yo̱t'a töte ár nze̱ye̱. 22Hyogap'u̱ habu̱ ga 'bu̱i n'ehe, ngetho di to̱'mi da ma̱xka Jö ma ga tso̱ñ'ahu̱. 23Pe̱ñ'a nze̱ngwa ar ku Epafra nö'ö mahye̱gi di jothewa, ngetho di mömfe ár mhö ar tsi Hmu Hesukristo. 24Ze̱ngwa'i n'ehe ar ku Mörko, ar ku Aristarko, ar ku Dema ne ar ku Luka ma ma̱xteyu̱. 25Ma tsi Hmuhu̱ Hesukristo da hwëk'ahu̱ yá ñho. Dá njap'u̱.

will be added

X\