1 Jange ma tsi hmöka kuhu̱, xa gi umba ri mu̱ihu̱ gi ze̱ta ri ñ'emu̱ihu̱ gi 'bu̱hwihu̱ ar tsi Hmu Hesukristo. Nuga xa di mö'ahu̱ ne di ne ga hant'ahu̱ man'agi, ngetho go ma johya'ihu̱, ne nuna ri ñ'emu̱ihu̱ gehnu̱ ma nthöhö. 2 Di a̱pa ar möte ar ku Ebodia ne ar ku Sintike da me̱'sa n'adar mfeni, ngetho n'at'wu̱ te̱nga ar tsi Hmu. 3 Ne nu'ge, ma hoga ma̱xte'i hár 'be̱fi Jö, di a̱'a ar möte gi fa̱xa nuya kuyu̱. Xa bi umbyá mu̱i ndi möñhe ar hoga mhö nú'mu̱ ndi 'bu̱p'u̱ mahye̱giwi ar ku Klemente, ne gatho nu'u̱ ma'ra ya ku mi fa̱xkagi har 'be̱fi. Nu'u̱ xi thu'spa yá thuhunu̱ mhets'i har he̱'mi huxa yá thuhu nu'u̱ pe̱'sa ar te. 4 Njohyahu̱ hyax'mu̱ gi 'bu̱hwihu̱ ar tsi Hmu. Di bemp'ahu̱ man'agi xa gi njohyahu̱. 5 'Bu̱hu̱ xiñho da hyanda gatho ya jö'i gar hogajö'ihu̱. Ma tsi Hmuhu̱ 'ba̱p'u̱tho da pengi. 6 Yo gi tu ri mu̱ihu̱, xipabihu̱ gatho Jö. Petwabihu̱ te gatho gi k'athu̱, ne di pe̱wi ar njamödi n'agitho. 7 Nu'mu̱ gi 'yo̱thu̱ njap'u̱, Jö da 'ra'ahu̱ n'ar hogam'u̱i töta ár döta nö'ö tsa̱ da zo ma mfenihu̱. Ne nunar hogam'u̱inu̱ da sup'a ri mu̱ihu̱ ne ri mfenihu̱, ngetho gi 'bu̱hwihu̱ ar tsi Hmu Hesukristo. 8 Nupya tsi kuhu̱, gehnu̱ gi benthu̱: nö'ö majöni, nö'ö 'be̱nga nt'ek'ei, nö'ö ar hogajö'i, gatho nö'ö xint'axi, ar hogam'u̱i ne gatho nö'ö nho̱ni xiñho. Nu'mu̱ di jahmö nö'ö xiñho ne di 'ñepi da t'e'spa ár nsu, gehnu̱ di oda ri mfenihu̱. 9 'Yo̱thu̱ nö'ö ga pöhu̱ ndi ut'ahu̱, nö'ö ga 'yo̱hu̱ ne ga hyanthu̱ ndi pe̱fi. 'Yo̱thu̱ njap'u̱, ne Jö togo unga ar hogam'u̱i gi 'bu̱hwihu̱. 10 Xa di johya har tsi Hmu, ngetho nupya xka benju̱ man'agi. Di pödi hinxka pumhnigihu̱, ho̱nse̱ himi tsa̱ hanja ngi fa̱xju̱. 11 Hindi mönga njap'u̱ ngetho te o̱tkar 'be̱di. Nuga xta pödi ga ñhogamu̱i nö'ö tema di pe̱ts'i. 12 Xta pödi ga tse̱ta ar hyoya ne xta pödi ga pe̱'sa ya ñho, wa ga niñö ne ga tho ar thuhu, nu'mu̱ ga tho ar k'at'i wa hin'ö. Gatho xta thohyu̱, jange di pödi. 13 Gatho tsa̱ ga o̱t'e ngetho xi 'raka ar ts'e̱di ar tsi Hmu Hesukristo. 14 Mödi xka 'yo̱thu̱ n'ar ñho, ngetho xka fa̱xkagihu̱ ha ma thogi. 15 Nu'ahu̱ gar me Filipohu̱, ngu gi pöhu̱ nú'mu̱ nda du̱'mi da mönga ar hoga mhö nda po̱mp'u̱ Nmasedonia, hinjo'o ma'ra togo xi 'rakagi n'ar mfa̱ts'i, ho̱nse̱ ri nijöhu̱, ngu n'ar nkots'i da hös'ahu̱ ár hoga mhö Jö. 16 Nú'mu̱ ndi 'bu̱hnu̱ har hnini Ntesalonika, hinge ho̱nse̱ n'agi ga pe̱nkagihu̱ ar mfa̱ts'i habu̱ ndi honi. 17 Nuga hindi honga ya mfa̱ts'i gi 'raju̱. Di honi da hñuxa ri nthöhöhu̱. 18 Nú'mu̱ nda hönga ri mfa̱ts'ihu̱ ba hönka ar ku Epafrodito, mi töpa ár nze̱ye̱ nö'ö ndi k'at'i. Xa pongtho nö'ö ga pe̱nkagihu̱, ngu n'ar m'o̱ñho̱ nthöskwi ar hogañu̱ni xka umfu̱ Jö xa numañho. 19 Jö da 'ra'ahu̱ gatho nö'ö gi k'athu̱, jangu ár nt'e̱ni yá ñho pe̱'sa hár nsunda. Gathonu̱ da 'ra'ahu̱ ngetho gi 'bu̱hwihu̱ ar tsi Hmu Hesukristo. 20 Jö ma Dadahu̱ dá hñönga ar nsunda hiñham'u̱ da göts'i. Dá njap'u̱. 21 Ze̱ngwagihu̱p'u̱ gatho nu'u̱ xi ñ'emu̱i ar tsi Hmu Hesukristo. Pe̱ñ'a'ihu̱ nze̱ngwa gatho ya ku di 'bu̱'bewa. 22 Pe̱ñ'ahu̱ nze̱ngwa gatho ya gamfi, m'e̱t'o nu'u̱ pe̱pabi ar Sesar. 23 Ar tsi Hmu Hesukristo dá hwëk'ahu̱ yá ñho gatho'ihu̱. Dá njap'u̱.
