1 Nu'mu̱ xa majöni xi hñup'a ri mu̱ihu̱ ar tsi Hmu Hesukristo, ne xi ma̱x'ahu̱ ár mhöte, gi 'bu̱hwihu̱ ár Hñö Jö, xa xka tsa̱hu̱ ha ri mu̱ihu̱ ár mhöte ne ár nhwëki, 2 jaju̱ ga njohya 'mu̱, ga pödi gi mhöhu̱ n'a ngu n'a, gi ñhe̱xu̱ gi pe̱'su̱ n'adar mfeni ne n'adar mhöte. 3 Yo te gi o̱thu̱ gi hoñhu̱ ar hñö, hingi 'ñexa ri nsuhu̱, yo gi gese̱hu̱. Nö'ö gi 'yo̱thu̱, 'ñe'spabihu̱ ár nsu ma'ra. 4 Yo gi hoñhu̱ ri ñhose̱hu̱. Hyomfu̱ m'e̱t'o ár ñho ma'ra. 5 Te̱ñhu̱ nunar mfeni bi me̱'sa ar tsi Hmu Hesukristo. 6 Ngetho mödi mar Jöse̱'ö, himbi 'yo̱t'a ár 'ñöngi bi hye̱p'u̱ mi n'at'wi Jö ár Dada. 7 Ba tsop'u̱ ár nsu, ba ekwa har ximha̱i, bi njö'i ne bi njangu n'ar 'be̱go. 8 Ne nú'mu̱ mi m'u̱kwa ngu n'ar jö'i, himbi 'yo̱t'a ndöta. Bi 'yo̱ta ár Dada bi unga ár te, bi ts'u̱ta har pont'i. 9 Jange Jö bi umba n'a ra döta nsu, ne bi hñu'spa n'ar thuhu töpa ár nsu gatho nu ma'ra. 10 Ne njap'u̱ ma da nda̱ndihmö ne da ndönga ar tsi Hmu Hesu gatho nu'u̱ bi 'bu̱ mhets'i, nu'u̱ 'bu̱kwa har ximha̱i, ne nu'u̱ 'bu̱ mbor ha̱i. 11 Ne gatho'u̱ ma da 'ñenö, nunar tsi Hmu Hesukristo gehnu̱ ar Hmu, ne njap'u̱ xa da nsundabi Jö ár Dada. 12 Tsi kuhu̱, ngu xka 'yo̱thu̱ gatho nö'ö xta xi'ahu̱, hinge ho̱nse̱ nú'mu̱ ndi 'bu̱p'u̱, 'yo̱thu̱ njap'u̱ nupya hindi 'bu̱p'u̱. Umba ri mu̱ihu̱ gi jafu̱ da mpe̱ ri mpo̱ho̱hu̱, ntsuñhu̱ gi 'yo̱thu̱. 13 Ngetho Jö go ko ár mu̱i, jaju̱ da bo̱ ha ma mu̱ihu̱ ga nethohu̱ ga o̱thu̱ nö'ö möñ'ö, ne fa̱xkagihu̱ da tsa̱ ga o̱thu̱. 14 Gatho nö'ö gi 'yo̱thu̱, yo gi hoñhu̱ gi nthentehu̱, hingi hyoñhu̱ ar hñö. 15 Njap'u̱ hinto da diñ'ahu̱ n'ar ts'oki, ne hindi oxta mañö nö'ö gi pe̱hu̱. Ne 'bu̱hu̱ xiñho ngu yá bötsi'ihu̱ Jö nheki ri hogam'u̱ihu̱, jangu ya tso̱ yot'a madeda ar 'be̱xui, mödi gi 'bu̱hu̱ madeda ya jö'i o̱t'a ya ts'oki. 16 'Ye̱nt'a ri tehu̱ gi möñhu̱ ar hoga mhö unga ar te hiñham'u̱ da göts'i. Nu'mu̱ hyax'mu̱ gi 'bu̱hu̱ njap'u̱, xa ma ga njohya xta ep'u̱ man'agi ar tsi Hmu Hesukristo. Ne ga pödi numa 'be̱fi hinxi m'e̱di, ne hinxi njap'u̱tho nö'ö xta pe̱fi. 17 Ha nu'mu̱ mahyoni ga unga ma te ngu n'ar m'o̱ñho̱ mahye̱giwi ri ñ'emu̱ihu̱, di johya ne di handi xiñho ga njohyawihu̱ n'ehe. 18 Jange njohyahu̱, ne ga pe̱'su̱ n'adar johya. 19 Di beni ga pe̱ñ'ahu̱ ngut'a ar ku Timoteo ma da k'ös'ahu̱, nu'mu̱ njap'u̱ ne ma tsi Hmuhu̱ Hesu. Nu xta penga nunar kunu̱, da xikagi tengu gi 'bu̱hu̱, ne njap'u̱ da ze̱tka ma mu̱i. 20 Ngetho hinjo'o man'a togo gar pe̱s'be n'adar mfeni, ne majöni xa mö'ahu̱. 21 Gatho nu ma'ra mpe̱fi honga yá ñhose̱, hinxi 'ye̱nt'a yá te da me̱pa ar tsi Hmu Hesukristo. 22 Ha nu'ahu̱ xka pötwabihu̱ ár m'u̱i ar ku Timoteo. Gehnu̱ fa̱xkagi di mömba ár mhö Jö, ngu n'ar bötsi fa̱xa ár dada har 'be̱fi. 23 Jange di beni ga pe̱hni da map'u̱ ma da k'ös'ahu̱, ho̱nse̱ di to̱'mi ga pödi tema di göxa nunar thoginu̱. 24 Di ñ'emu̱i Jö da ma̱xkagi ngut'a ga map'u̱ ma ga k'ös'ahu̱ n'ehe. 25 Xta beni mahyoni ga pe̱hna ar ku Epafrodito da mengi di map'u̱, gehnu̱ ga pe̱ñhu̱ xi ma̱xkagi. Ma hoga ku di ñ'o'be har 'be̱fi, ne di ñ'e̱nthe ga ñömbabihe ár mhö Jö. 26 Nunu̱ xa beñ'ahu̱, hingi nu ar pa ma da k'ös'ahu̱, ne xa tu ár mu̱i ngetho xka 'yo̱hu̱ xi ñheni. 27 Xa majöni mi hñeni 'bu̱tho nda du, mödi Jö bi me̱'spa ar nhwëki. Hinge ho̱nse̱'ö, nuga n'ehe, ngetho himbi ne bi hñuska ma dumu̱i. 28 Jange ngut'a di pe̱ñ'a'ihu̱ injap'u̱, ne gi njohyahu̱ nú'mu̱ xki pengi gi hyanthu̱ man'agi, ne ga njohyaga n'ehe. 29 Nú'mu̱ xta zo̱mp'u̱ 'mu̱, gi njohyahu̱ gi hyanthu̱, ngetho n'ár 'be̱go Jö. Hinge ho̱nse̱nu̱, möhu̱ gatho nu'u̱ ma'ra di hñöx'ö. 30 Ngetho nú'mu̱ ma nda du mi pe̱pa ar tsi Hmu Hesukristo, bi 'ye̱nt'a ár te bi 'yo̱t'a nö'ö mi 'be̱di ngi 'yo̱tkagihu̱.
