1 Nuga dar Pablo ne ar ku Timoteo, yá 'be̱gogihe ar tsi Hmu Hesukristo, di ot'ahe nunar he̱'minu̱, tsi kuhu̱ gi 'bu̱hu̱ har hnini Filipo, ne xka ñ'emu̱ihu̱ ar tsi Hmu Hesukristo. Di ze̱ngwa'ihe mahye̱giwi ri ndöhu̱ har nijö ne yá ma̱xte. 2 Jö ma tsi Dadahu̱ ne ma tsi Hmuhu̱ Hesukristo da 'ra'ahu̱ n'ar hogam'u̱i ne da hwëk'ahu̱ yá ñho. 3 Nú'mu̱ di beñ'ahu̱ di umba njamödi Jö. 4 Hyax'mu̱ xa di johya hindi pumhni ga a̱pabi da ma̱x'a gi gathohu̱. 5 Ngetho nú'mu̱ ga ndu̱i ga ñ'emu̱ihu̱ dinjawa, xa xka mfa̱xtehu̱ da nu̱nga ar hoga mhö. 6 Di ka̱xmbeni Jö togo bi du̱'mi bi pa̱ta ri m'u̱ihu̱, 'yo di jwata ar 'be̱fi, ne di wa nú'mu̱ xta menga ar tsi Hmu Hesukristo. 7 Di beñ'ahu̱ xiñho ngetho xa di pe̱s'ahu̱ n'ar döta mhöte. Jö xi hwëgagi ga ñöni ne ga da̱majöni ar hoga mhö. Ha nu'ahu̱ xka fa̱xkagihu̱, hinxka hye̱gase̱gihu̱ mödi nú'mu̱ di owa har fa̱di. 8 Jö pödi xa nts'e̱di di beñ'ahu̱, ngetho ar tsi Hmu Hesukristo xi 'raka n'ar döta mhöte. 9 Di a̱pa Jö da hñuxa ár nzit'i ri mhötehu̱, ne xa gi pe̱'su̱ ar hoga mfeni, ne njap'u̱ gi pöhu̱ tema xiñho gi 'yo̱thu̱. 10 Njap'u̱ da tsa̱ gi pöhu̱ gi hwañhu̱ nö'ö xiñho, ne gi 'bu̱hu̱ n'ar te xint'axi, ne hinte da k'as'ahu̱ nú'mu̱ xta penga ar tsi Hmu Hesukristo. 11 Di to̱'mi xa gi 'bu̱hu̱ n'ar hogam'u̱i gi 'bu̱hwihu̱ ar tsi Hmu Hesukristo, ne njap'u̱ gi nsundabihu̱ Jö. 12 Tsi kuhu̱, di ne gi pöhu̱, gatho nö'ö xta thogi umba ar ts'e̱di ár hoga mhö Jö. 13 Gatho nuya ndogu 'bu̱kwa ne nu'u̱ ma'ra ya jö'i, pö'u̱ di o har fa̱di ngetho di mömba ár mhö ar tsi Hmu Hesukristo. 14 Nuya thogiyu̱ di thoka, nze̱ye̱ ya ku xi ma̱ts'i xi ze̱ta yá ñ'emu̱i, ne hingi ntsu da mömba ár mhö ar tsi Hmu. 15 Di pöka xiñho ja 'ra'u̱ mömba ár mhö ar tsi Hmu Hesukristo, ngetho ñöska ma 'be̱fi ne honga ar hñö, mödi ma'ra tsit'a yá mu̱i o̱t'a n'ar hoga 'be̱fi. 16 Nu'u̱ togo hingi tsit'a yá mu̱i mömba ár mhö ar tsi Hmu, ho̱nse̱ honga ar hñö, beñ'u̱ njap'u̱ da tso̱tka ma mu̱i, ne da hñuxhmö emp'ö ma u̱giwa har fa̱di. 17 Ha ma'ra pe̱'sa n'ar döta mhöte mömba ár mhö Jö, pö'u̱ xi jokagi har fa̱di ngetho di ñönga nunar hoga mhönu̱. 18 Mödi hingi tuka ma mu̱i hanja ñö'u̱, nu'mu̱ tsit'a yá mu̱i o̱t'e wa hin'ö. Di johya ngetho nsipa ya jö'i togo ar tsi Hmu, ne hinga tsa̱ya̱ ga njohya di map'u̱. 19 Di pödi, gatho nö'ö di thopya ma ga po̱ni xiñho, ngetho gi fa̱xkagihu̱ gi a̱fu̱ Jö, ne 'rakagi ar ts'e̱di ár Hñö ar tsi Hmu Hesukristo. 20 Nö'ö di to̱'mga, hinga ma ga 'be̱ ma tsa̱. Nupya ngu maham'u̱ di to̱'mi da t'e'spa ár nsu ar tsi Hmu Hesukristo ha ma te, wa da thogagi wa da the̱gagi. 21 Ngetho nu'mu̱ di 'bu̱i, di e̱nt'a ma te ga pe̱pa ar tsi Hmu Hesukristo, ha nu'mu̱ ga tu, ma ga nthe̱'be'ö, gehnu̱ ma nthöhö. 22 Ha nu'mu̱ di tetho, xiñho ga pe̱pa ar tsi Hmu. Jange hindi pödi ndana ga hwahni. 23 Ngetho nuya yohoyu̱ di 'bu̱ madetho. Di ne ma ga tsu̱ ar tsi Hmu Hesukristo, di handi xiñho'ö. 24 Ha nu'mu̱ ga kokwa di tetho, töte ár ñho ngetho gi hongagihu̱. 25 Di ka̱xmbeni da njap'u̱, ma ga kohwihu̱ har ximha̱i, ne ga fa̱x'ahu̱ da te ri ñ'emu̱ihu̱ ne gi njohyahu̱. 26 Jange nú'mu̱ xka 'bu̱p'u̱, xa ma gi nsundahu̱ ar tsi Hmu Hesukristo, ngetho ma gi penju̱ gi hyandju̱ man'agi. 27 Ho̱nse̱ di a̱'ahu̱ gi 'bu̱hu̱ ngu mönga ár hoga mhö ar tsi Hmu Hesukristo. Ne nú'mu̱ ga map'u̱ ma ga k'ös'ahu̱, wa di 'bu̱ yap'u̱, ga o̱de da nsikagi gi 'bu̱hu̱ xiñho, gi pe̱'su̱ n'adar mfeni, ne gi umba ri mu̱ihu̱ xa gi mpe̱hu̱, gi ñöñhu̱ ar jamfi xta pöhu̱ har hoga mhö. 28 Yo ma gi ñhe̱hu̱ da pi'ahu̱ nu'u̱ togo u̱tsa'ihu̱. Njap'u̱ födi ma da m'e̱'u̱, ha nu'ahu̱ nheki gi pe̱'su̱ ar mpo̱ho̱, ne nunu̱ go bi pe̱hna Jö. 29 Ngetho xka ñ'emu̱ihu̱ ar tsi Hmu Hesukristo, hinge ho̱nse̱ xi t'a'ahu̱ ar se̱ki gi jamfihu̱. Mahyoni gi thohu̱ ar nt'u̱tsa n'ehe, ngetho gi da̱hu̱ majöni xka ñ'emu̱ihu̱. 30 Nu'ahu̱ gi ñömfu̱ ár mhö Jö, gi thohu̱ ngu ga hyanthu̱ ndi thoka, ne gi o̱hu̱pya di thogi ngetho di ñömba ár mhö Jö n'ehe.
