AR MATEO 7

1Yo gi nthentehu̱, ne hinda ntheñ'ahu̱ n'ehe. 2Ngetho ngu gi thenga ri ñ'ohu̱, Jö ma da hñös'ahu̱ majöni. Nu'mu̱ himbi go ri mu̱ihu̱, hinda ma da gor mu̱i'ö n'ehe. 3Hanja gi handwa ár ts'oki ri ku, jangutho n'ar paxi o hár da̱'ö, ne hingi jamasu ri döta ts'oki ngu n'ar xo̱kaza o ha ri da̱ge. 4Hanja da tsa̱ gi 'ñemba ri ku: To̱'mi ga höp'a ar paxi o ha ri da̱, ne hanja hingi handa nö'ö ar xo̱kaza o ha ri da̱ge. 5Xa gar nemhñö. Hñö m'e̱t'o ar xo̱kaza o ha ri da̱ge, ne njap'u̱ hö, da tsa̱ gi hyanda xiñho, ne gi hñömba ar paxi o hár da̱ ri ku. 6Yo gi umfu̱ nö'ö ár me̱ti Jö nu'u̱ hingi numañho. Yo gi umfu̱ ri ñhohu̱ xi nhwëk'ahu̱ nu'u̱ hingi numansu, ngetho ngu ya 'yo da ne da za'ahu̱, ne ngu ya ts'u̱di ts'ot'a gatho nö'ö t'umbabi. 7'Ya̱hu̱ ne da t'a'ahu̱, hyoñhu̱ ne gi tiñhu̱, nzotehu̱ ne da nsok'ahu̱ ar goxthi. 8Ngetho nö'ö togo da 'ya̱di, da t'umbabi, nö'ö togo da hyoni da dini, ha nö'ö nzote, da nsokwabi. 9Xi'mu̱ n'a ri bötsihu̱ da 'ya̱'ahu̱ n'ar thuhme, hage gi umfu̱ n'ar do. 10Xi'mu̱ da 'ya̱'ahu̱ n'ar hwö, hage gi umfu̱ n'ar k'eñö. 11Nu'mu̱ gar ts'oktehu̱ ne gi pöhu̱ gi umfu̱ nö'ö xiñho ri bötsihu̱, hanguhmö ar Dada bi 'bu̱ mhets'i xa da umba ar ñho gatho nu'u̱ togo da 'ya̱pabi. 12Ngu gi nehu̱ da ja'ahu̱ ya jö'i, japabihu̱ njap'u̱ n'ehe. Gehnu̱ ne da 'ñenga yá 'be̱pate bi 'yot'a ar Moise ne nu ma'ra yá m'e̱hni Jö. 13Ku̱thu̱ har goxthi xi nts'ixt'i. Ngetho xi maxt'i ar goxthi ne xi nxidi ar 'ñu di ma har 'be̱xui, ne nze̱ye̱ nu'u̱ ku̱tnu̱. 14Xi nts'ixt'i ar gosthi, ne hingi maxt'i ar 'ñu di ma mhets'i, jange tx'u̱tho nu'u̱ togo tini da yu̱tnu̱. 15Jamasuhu̱ hinda ts'ok'a ri mfenihu̱ nu'u̱ ense̱ yá m'e̱hni Jö emp'ö. Ma da 'ñep'u̱ da ne da hya̱'ahu̱, fe̱ta ya hogajö'i ngu n'ar tsi de̱ti, ha mbo yá mfeni ñhe̱hwi n'ar dumanthuhu miñ'o. 16Ma gi pöhu̱ togo'u̱, nhekitho yá ts'o'be̱fi. Ngetho nuya ts'om'u̱i hingi tsa̱ da 'yo̱t'a n'ar hoga 'be̱fi. Ngu n'ar 'minza hinda unga ya obxi, ne hingi tu̱ju̱ ya iuxi ha ya nk'axhna'mini. 17Njap'u̱ ar hoga 'ba̱iza tsa̱ da ts'ipa nö'ö te uni, ha nö'ö hingar hogaza hingi tsa̱ da ts'ipabi. 18Xi n'ar hoga 'ba̱iza, hage tsa̱ da unga nö'ö hingi ho da ts'i. Wa n'ar ts'oza, hage tsa̱ da unga nö'ö xiñho da ts'i. 19Gatho ya 'ba̱iza hingi unga nö'ö xiñho da ts'i, da nk'u̱ts'i ne da t'u̱'sa har tsibi. 20Jange gi pöhu̱ togo yá kate m'e̱hni Jö emp'ö, xki hyanthwu̱ yá ts'o'be̱fi o̱t'e. 21Hinga gatho nu'u̱ engagi: Ma tsi Hmu'i, ma tsi Hmu'i, ma da yu̱t'a hár ts'u̱t'wi Jö bi 'bu̱ mhets'i; ho̱nse̱ nu'u̱ o̱t'a nö'ö mönga ma Dada bi 'bu̱hnu̱ mhets'i. 22Nú'mu̱ xta göxa xo̱ge, nze̱ye̱ ma da 'ñengagi nuya pa'u̱: Ma tsi Hmu'ihe, ma tsi Hmu'ihe, nuje da ju̱ñ'ahe ár ts'e̱di ri thuhu da mömp'ahe ri mhö, da e̱ñhe ya ts'ondöhi, ne da o̱the nze̱ye̱ ya nt'udi. 23Ha nuga ma ga thötwabi: Hiñham'u̱ xta mpöhwihu̱. 'Wehu̱, 'yo̱t'ats'oki'ihu̱. 24Nö'ö togo da 'yo̱ nuya mhö di xi'ahu̱ ne da 'yo̱t'e, nö'ö ma ga he̱ka ngu n'ar ñ'o̱ho̱ benga nö'ö ma da me̱fi, ne bi hyo̱ ár ngu har medo. 25M'e̱fa ba e ya dö'ye, ba kö ya nzo̱the ne bi ñ'o ya 'yomndöhi. Gathoyu̱ bi zu̱ har ngu'ö, himbi dext'i ngetho mi thöt'a xiñho har medo. 26Ha nö'ö togo da 'yo̱xa nuya mhöyu̱ ne hinda 'yo̱t'e, nö'ö ñhe̱hwi n'ar jö'i hingi benga nö'ö pe̱fi, ne bi hyo̱ ár ngu har 'baxka 'bomu. 27Ba e ya dö'ye, bi gö ya nzo̱the, bi ñ'o ya 'yomndöhi bi zu̱ nö'ö ar ngu'ö, bi yo̱t'e xo̱ge ne gatho bi m'e̱di. 28Nu mi wa ar Hesu bi mönga njap'u̱, ya jö'i xa mi 'yo̱da nö'ö xki xipabi'u̱. 29Ngetho mi hömpa ár ts'e̱di Jö, hinge ngu nuya böt'ofo.

will be added

X\