AR MATEO 25

1Nú'mu̱ xta penga Nö'ö Togo ba e bi Njö'i da 'ñekwa ár ts'u̱t'wi, ma da ñhe̱hwi ngu n'ar nthöti bi t'o̱t'e. 'Re̱t'a ya nxutsi bi hñöxa yá ñot'i, ma ba thö ar ñ'o̱ho̱ ma nda nthöti. 2Ha nuya nxutsi'u̱, ku̱t'a mi ja yá mfeni ne ku̱t'a mi ñ'entho. 3Nu'u̱ ku̱t'a mi ñ'entho, himbi hñöxa nze̱ye̱ ar nziki da xit'a yá ñot'i. 4Ha nu'u̱ ma ku̱t'a mi ja yá mfeni, bi hñöxkwi mahye̱gi yá ñot'i n'a xito mi po ar nziki. 5Nö'ö ma nda nthöti himbi ngut'a bi zo̱ho̱, jange gatho 're̱t'a ya nxutsi bi zo̱pa ar t'öhö ne bi ñ'ö'u̱. 6Ngu made ar xui bi nheki n'ar mhafi mi emba ya nxutsi: Xi 'ñep'u̱ nö'ö togo ma da nthöti. Di ma ba thöhu̱. 7Nu'mú̱ nu'u̱ 're̱t'a ya nxutsi bi nuhu, ne dama bi tso̱ yá ñot'i. 8Nu'u̱ mi ñ'entho bi 'ñemba nu ma ku̱t'a mi ja yá mfeni: Thogagihe n'a tu̱i ri nzikihu̱, ngetho ma ñot'ihe hwet'atho. 9Ha nuya nxutsi mi ja yá mfeni, bi 'ñemba nu ma'ra: Hin'ö, xi'mu̱ da k'atkagihe n'e. Xiñho ma gi ta̱nse̱hu̱ habu̱ bi 'ba̱. 10Nú'mu̱ mi 'yo ar 'ñu ma nda da̱nga ar nziki, ge'mu̱ bi zo̱ nö'ö togo ma nda nthöti. Nu'mú̱ nu'u̱ ku̱t'a ya nxutsi xki ñhoki bi yu̱t'wi har ngo, ne bi njot'a ar goxthi. 11M'e̱fa bi zo̱ nu'u̱ ma'ra ya nxutsi, ne mi eñ'u̱: Ndada, xogagihe ar goxthi. 12Ha nö'ö togo ma nda nthöti, bi döti ne bi 'ñembabi'u̱: Xa majöni di xi'ahu̱, hindi pöka togo'ihu̱. 13Jange nu'ahu̱ ndo̱'mhu̱, ngetho hingi pöhu̱ tema pa, wa tema xe̱nimpa, ma da zo̱ Nö'ö Togo ba e bi Njö'i. 14Ár ts'u̱t'wi Jö jangu n'ar hmu mi 'ba̱ ar 'ñu nda ma man'ar ha̱i yap'u̱. Ne bi zohna yá 'be̱go ne bi hyemba ár bojö nda japabi nda xu, 15ngu ár nihi yá mfeni n'a ngu n'a. N'a bi umba ku̱t'a ya bojö, man'a bi umba yoho, ha nö'ö man'a n'ase̱ bi umbabi. Nep'u̱ bi gu̱ ar 'ñu bi ma. 16Nö'ö togo bi t'umbabi ku̱t'a, bi ma ba japa nunar bojönu̱ bi mpe̱fi, ne bi gu̱ka ma ku̱t'a. 17Njap'u̱ nö'ö xki t'umba yoho n'ehe, bi gu̱ka ma yoho. 18Nö'ö togo xki t'umba n'a, bi ma ba xa̱'ma n'ar ots'i, ne ka bi 'ñöhnu̱ ár bojö ár hmu. 19Mi tho nze̱ye̱ ya pa ba penga ar hmu, ne bi hñö'spa majöni yá 'be̱go. 20Mi zo̱ nö'ö xki ts'okwabi ku̱t'a ya bojö, bi umba ár hmu ma ku̱t'a xki döhö, ne bi 'ñembabi: Tsi ndada, ga tsogagi ku̱t'a ya bojö, ha nuga da höñ'a ma ku̱t'a xta töhö. 21Nu'mú̱ ar hmu bi dödi ne bi 'ñenö: Xiñho nö'ö xka pe̱fi, xa gar hoga 'be̱go gi o̱t'a nö'ö nsi'a'i. Ga pödi ga su nö'ö tsi tu̱i da 'ra'i. Nupya ma ga hus'a ár nze̱ye̱. Ba e ga 'bu̱hwi ri hmugi, ne ga njohyawi. 22M'e̱fa bi zo̱ nö'ö xki t'umbabi yoho ya bojö, ne bi 'ñemba ár hmu: Tsi ndada, ga tsogagi yoho ya bojö, ha nuga xta höñ'a ma yoho xta töhö. 23Nu'mú̱ ar hmu bi dödi ne bi 'ñenö: Xiñho nö'ö xka pe̱fi, xa gar hoga 'be̱go gi o̱t'a nö'ö nsi'a'i. Ga pödi ga su nö'ö tsi tu̱i da 'ra'i. Nupya ma ga hus'a ár nze̱ye̱. Ba e ga 'bu̱hwi ri hmugi, ga njohyawi. 24Nú'mu̱ mi zo̱ ar 'be̱go xki ts'okwa n'ar bojö, bi 'ñemba ár hmu: Tsi ndada, di pödi xi nts'o'i, ne ma gi hñömga nö'ö xta töhö, ngetho gi xo nö'ö hinxka pot'i, ne gi munts'a ar t'e̱i hinxka pits'i. 25Jange nuga da tsu, ne ma da a̱gi, ha nupya xi 'bu̱kwa nö'ö ri me̱ti. 26Ar hmu bi dödi ne bi 'ñenö: Xa gar ts'o'be̱go ne gar döhñe. Nu'mu̱ ngi pödi di xo nö'ö hinxta pot'i ne di munts'a nö'ö hinxta pits'i, 27nu'mú̱, yo'ö hinga kwata ma bojö ha ya jwatbojö, ne xta pengi nda t'akagi ma bojö ne nö'ö xki döhö. 28Ne bi 'ñemba nu'u̱ togo mi ñ'owi: Hñömbabihu̱ ar bojö da tsokwabinu̱, ne umbabihu̱ togo pe̱'sa 're̱t'a. 29Ngetho nö'ö togo pe̱ts'i, ma da t'umbabi da bongwathobi, ha nö'ö tsi tu̱i pe̱ts'i, ma da thömbabi xo̱ge. 30Ne nö'ö ar 'be̱go hinter 'be̱fi, 'ñethu̱ har 'be̱xui habu̱ jar ts'oni ne ar nguxt'ats'i. 31Nu xta penga Nö'ö Togo ba e bi Njö'i di hö n'ar döta nsunda, ne di ñ'owi yá e̱nxe̱, da hñuxa hár thuxandö da hñö'spa majöni ya meximha̱i. 32Ma da mhunts'a gatho ya jö'i 'bu̱ hár nxidi ar ximha̱i, ne da hwahna n'a ngu n'a, njangu n'ar ma̱'yo 'weka ya de̱ti ne ya t'öxi. 33Ne ma da 'ba̱'ma hár ñ'e̱i ya tsi de̱ti, ne hár ngöhö ya t'öxi. 34Nu'mú̱ nunar Ndö ma da 'ñemba nu'u̱ 'ba̱ hár ñ'e̱i: Ba ehu̱ nu'ahu̱ xi jöp'ahu̱ ma Dada, ku̱thu̱ hár ts'u̱t'wi Jö xi thok'ahu̱ nú'mu̱ hinte mi 'bu̱hmö ar ximha̱i. 35Ngetho nú'mu̱ ndi tunthu, ga 'raju̱ te da tsi. Nú'mu̱ ndi tuthe, ga 'raju̱ ar dehe, ne nú'mu̱ ndi ne ar 'ñu, ga 'raju̱ habu̱ da oxi. 36Nú'mu̱ himi otho te nga he, ga hetkagihu̱. Nú'mu̱ ndi hñeni ne ndi o ar fa̱di, ga e ga k'öskagihu̱. 37Nu'mú̱ nu'u̱ bi 'yo̱t'a xiñho da 'ñeñ'u̱: Ma tsi Hmu'ihe, ham'u̱ da hant'ahe ngi tunthu, ne da 'ra'ahe te ngi tsi. Wa ham'u̱ da hant'ahe ngi tuthe, ne da 'ra'ahe ar dehe. 38Ham'u̱ da hant'ahe ngi ne ar 'ñu, ne da 'ra'ahe habu̱ ngi oxi. Wa ham'u̱ da hant'ahe mi otho te ngi hye, ne da het'ahe. 39Ham'u̱ da hant'ahe ngi hñeni, wa ngi o ar fa̱di, ne ma da k'ös'ahe. 40Nu'mú̱ ar Ndö da dödi ne da 'ñenö: Xa majöni di xi'ahu̱, nu'mu̱ ga 'yo̱thwu̱ n'a nu'u̱ ma tsi ku, mödi hingi döta hár nthandi ya jö'i, pöhu̱ go ga 'yo̱tkagihu̱. 41M'e̱fa ar Ndö da 'ñemba nu'u̱ 'ba̱ hár ngöhö: 'Wehu̱ di möhu̱ nu'ahu̱ xi zu̱'ahu̱ ár kwe̱ Jö. Di ma ba ñho̱hu̱ har tsibi hiñham'u̱ da hwet'i, xi t'e̱kwabi ar ts'ondöhi ne yá e̱nxe̱ te̱ni. 42Ngetho ndi tunthu, ne hinga 'raju̱ts'u̱ te nga tsi. Ndi tuthe, ne hinga 'raju̱ts'u̱ ar dehe. 43Ndi ne ar 'ñu, hinga 'raju̱ ar se̱ki habu̱ nga oxi. Mi otho te nga he, ne hinga hyetkagihu̱. Ndi hñeni ne ndi o ar fa̱di, ne hinga ma ga k'öskagihu̱. 44Nu'mú̱ ya ts'ojö'i ma da dödi ne da 'ñeñ'u̱: Ma tsi Hmu'ihe, ham'u̱ da hant'ahe ngi tunthu, ngi tuthe, ngi ne ar 'ñu, hinte ngi pe̱'sa te ngi hye, ngi hñeni wa ngi o har fa̱di, ne hinda fa̱x'ahe. 45Nu'mú̱ ar Ndö da dötwabi ne da 'ñenö: Xa majöni di xi'ahu̱, nu'mu̱ hingi fa̱xu̱ n'a numa tsi ku hingi döta hár nthandi ya jö'i, pöhu̱ go gekagi togo hinxka fa̱xu̱. 46Nu'mú̱ nu'u̱ di ma habu̱ ma da hñönga ar mfe̱i hiñham'u̱ da göts'i. Ha nu'u̱ xi 'yo̱t'a xiñho, ma da yu̱t'a mhets'i habu̱ hiñham'u̱ da göxa yá te.

will be added

X\