AR MATEO 23

1Nu'mú̱ ar Hesu bi zo yá ma̱xte ne gatho ya jö'i mi 'bu̱hnu̱, ne bi 'ñembabi'u̱: 2—Nuya de̱nga'be̱pate ne ya böt'ofo, xi t'umba ar nsu da ut'ahu̱ tema di bo̱nga nö'ö bi 'yot'a ar Moise. 3Jange 'yo̱thu̱ gatho nö'ö da xi'ahu̱. Ho̱nse̱ yo gi te̱mbabihu̱ yá ts'o'be̱fi, ngetho möñ'u̱ xiñho, ha hingi o̱t'a njap'u̱. 4Nu'u̱ tutwa ya 'be̱ni ya jö'i xi ñhu̱, ha nuyu̱ hingi ne da da̱ñ'u̱ts'u̱ da ma̱ts'i. 5Nö'ö o̱t'u̱, te gatho pe̱ ha yá nthandi ya jö'i, ne da 'ñexyá nsu. Tsu̱ta ya t'ofo ha yá dë ne ha yá 'ye̱, ne tutwa xi nxidi ár ñöni yá he. 6Nu ha ya da̱ngo xa honga da hñuxa ha ya m'e̱t'o nthuts'i, ne xa ne da hñuxa ha ya hoga nthuts'i ha ya nijö, honi da t'e'spa yá nsu. 7Xa ne da ndömbyá 'ye̱ nú'mu̱ da nze̱ngwa ha ya ta̱i, ne da t'embabi'u̱: Ma tsi utate'ihe. 8Ha nu'ahu̱, yo ma gi ñhe̱hu̱ da t'es'ahu̱ ri nsuhu̱, ne da t'eñ'a'ihu̱ gar utatehu̱. Ngetho n'adar Utate, ho̱nse̱ ar Kristo, ha nu'ahu̱ gatho gi nkuhu̱. 9Hinto ma gi 'ñembabihu̱ ri dadahu̱wa har ximha̱i, ngetho n'ada ri Dadahu̱, gehnu̱ bi 'bu̱ mhets'i. 10Yo ma gi ñhe̱hu̱ da t'eñ'ahu̱ gar utatehu̱ gi tsixu̱ ar 'ñu, ngetho n'ada togo tsixa ar 'ñu, gehnu̱ ar Kristo. 11Nö'ö togo 'bu̱ mañö pe̱'sa n'ar döta nsu, mahyoni da me̱pa nu ma'ra n'ehe. 12Ngetho nö'ö togo da ñ'exase̱, m'e̱fa ma da m'e̱twa ár tsa̱, ha nö'ö togo da nts'a̱'mi, ma da t'e'spa ár nsu. 13Hwëkate nu'ahu̱ gar böt'ofohu̱ ne gar de̱nga'be̱patehu̱, xa gar nemhñöhu̱. Hingi ku̱thu̱, ne hingi he̱hu̱ da yu̱t'a nu'u̱ togo ne da yu̱t'a hár ts'u̱t'wi Jö. 14Nu'ahu̱ gar böt'ofohu̱ ne gar de̱nga'be̱patehu̱, xa gar nemhñöhu̱. Gi ha̱thu̱ ya tsi 'ranxu, gi hömfu̱ yá ngu, ne xa gi o̱thu̱ ya nsa̱di, hingi ne da nheki ri ts'o'be̱fihu̱. Jange xa döta ri mfe̱i gi to̱'mhu̱. 15Hwëkate nu'ahu̱ gar böt'ofo ne gar de̱nga'be̱patehu̱, nemhñöhu̱. Xa gi mpu̱nthu̱ gi hoñhu̱ togo da de̱mp'a ri nt'utihu̱. Ne xki tiñhu̱, xa gi ts'okwabihu̱ yá mfeni, gi 'be̱t'ohu̱ da ma njöntho har 'be̱xui habu̱ gir möhu̱ n'ehe. 16Di hñöx'ahu̱ ya goda̱ gu̱hna ma'ra. Hwëkate'ihu̱ gi eñhu̱, nu'mu̱ togo da 'ñet'a made ar dönganijö, hinter me̱'ö. Ha nu'mu̱ togo da 'ñet'a made ar k'axt'abo̱jö ja har dönganijö, nu'mú̱ hö, xi nts'uni nö'ö bi mö. 17Gar goda̱hu̱ ne xa xka 'be̱ ri mfenihu̱. Ndana töte ár nsu, ar k'axt'abo̱jö wa ar dönganijö japi da hñuxa ár nsunu̱. 18Ne gi eñhu̱, nu'mu̱ togo da 'ñet'a made ar t'u̱xm'o̱ñho̱, hinter me̱'ö. Ha nu'mu̱ togo da 'ñet'a made nö'ö ar m'o̱ñho̱ oxhnu̱, nu'mú̱ hö, xi nts'uni nö'ö bi möñ'ö. 19Goda̱hu̱ xka 'be̱thwu̱ ár 'ñu ar tsi Dada. Ndana töte ár nsu, ar m'o̱ñho̱ wa ar t'u̱xm'o̱ñho̱ nuna japi da hñuxa ár nsu. 20Jange nö'ö togo et'a made ar t'u̱xm'o̱ñho̱, et'a made gatho nö'ö te ku̱xhnu̱ n'ehe. 21Njap'u̱ hinge ho̱nse̱ et'a made ar dönganijö, et'a made Jö togo 'bu̱hnu̱. 22Nö'ö togo et'a made mhets'i, et'a made ár thuxandö Jö, ne gese̱ Jö togo huxhnu̱. 23Hwëkate'ihu̱ gar böt'ofohu̱ ne gar de̱nga'be̱patehu̱, gar nemhñöhu̱. Ngetho gi uñhu̱ ár 're̱t'a xe̱ni ya do̱ni t'u̱'sa ar ñhuni, ne xka hye̱hu̱ nuna 'be̱t'o ha yá 'be̱pate ar Moise. Xka hye̱hu̱ gi 'yo̱thwu̱ xiñho ma'ra, ar nhwëki ne ar ñ'emu̱i. Xiñho gi 'yo̱thu̱yu̱, ne hingi hye̱hu̱ nu ma'ra. 24Gar goda̱ gu̱hnatehu̱. Gi o̱thu̱ nö'ö hints'u̱ nts'uni, ne gi he̱hu̱ nö'ö xa pe̱'sa ár nts'uni. Jangutho gi ntsuñhu̱ hingi tuthu̱ n'ar tsi t'u̱lo zu'we, ne gi tut'athohu̱ ya döta zu'we. 25Hwëkate nu'ahu̱ gar böt'ofohu̱ ne gar de̱nga'be̱patehu̱, xa gar nemhñöhu̱. Gi ñhe̱hwihu̱ n'ar 'bada wa n'ar mohi, ho̱nse̱ xi nsu̱t'a nthi, ne mbo ri mu̱ihu̱ ne ri mfenihu̱ xa ñuxa ar mfë ne ar ts'om'u̱i. 26Goda̱ de̱nga'be̱patehu̱, xu̱thu̱ m'e̱t'o mbo ri mfenihu̱ ne ri mu̱ihu̱, ne njap'u̱ da t'axk'ahu̱ nthi n'ehe. 27Hwëkate nu'ahu̱ gar böt'ofohu̱ ne gar de̱nga'be̱patehu̱, xa gar nemhñöhu̱. Di hñöx'ahu̱ ya t'a̱gi xint'axi nthi ne nheki nza̱tho, ha ku̱ yá ndo'yo nu'u̱ xi du thota yá nts'otho. 28Gi njahu̱p'u̱ n'ehe, ngetho ha yá hmi ya jö'i xa gi o̱thu̱ gar hogajö'i'ihu̱, ne ha ri mfenihu̱ hingi tsa̱ya̱ ar nhemhñö ne ar ts'oki. 29Hwëkate nu'ahu̱ gar böt'ofohu̱ ne gar de̱nga'be̱patehu̱, xa gar nemhñöhu̱. Ngetho gi hojwu̱ yá t'a̱gi yá m'e̱hni Jö, ne gi kö'thwu̱ yá t'a̱gi ya hogajö'i. 30Ne gi eñhu̱: Nu'mu̱ xta 'bu̱hmöhu̱ nuya pa mi 'bu̱ ma palehu̱, hinxta fa̱xhmöhu̱ xi hyopa yá m'e̱hni Jö. 31Jange gi nda̱se̱hu̱ yá 'be̱to'ihu̱ nu'u̱ togo bi hyopa yá m'e̱hni Jö. 32Jwathu̱ 'mu̱ nö'ö bi du̱'ma ri palehu̱. 33Yá bötsi'ihu̱ ya k'eñö. Hanja ma gi k'onthu̱ da 'be̱ñ'ahu̱ har tsibi. 34Jange ma ga pe̱ñ'ahu̱ ma'ra ya m'e̱hni, ne nu'u̱ di pe̱'sa yá hoga mfeni ne ya böt'ofo. 'Rayu̱ ma gi hyohu̱, ma'ra gi tsu̱thu̱ har pont'i, ma'ra gi fe̱hu̱ ha ri nijöhu̱ ne gi kuhu̱ di ne ya hnini. 35Ne njap'u̱ go ma gi k'othu̱ ar tha̱i xi thuts'i nú'mu̱ mi nhö'mba ár ji ya hogajö'i. Di ndu̱'ma nú'mu̱ mi nhö'mba ár ji ar hoga Abel, di göxa ár ji ar Sakaria ár t'u̱ ar Berekia, togo ga hyohu̱ madeda ar ts'ötm'o̱ñho̱ ne ar nijö. 36Xa majöni di xi'ahu̱, gatho nor tha̱inu̱, ma da k'ot'a nuya jö'i 'bu̱ nuya payu̱. 37Nu'ahu̱ gar menguhu̱ Herusalen, gi k'ampabihu̱ togo bi pe̱ñ'ahu̱, ne gi hofu̱ yá m'e̱hni Jö. Hangu xta nemhö nga munts'a'ihu̱, ngu n'ar tsi o̱ni munts'a yá tsi t'u̱'ni da hwixa ha yá hwa, ne hinga nehu̱. 38Pöhu̱, Jö ma da hye̱k'ase̱ ri nijöhu̱. 39Ngetho di xi'ahu̱, hinge ma gi hyandgagihu̱ nuya payu̱. Gi to̱'mhu̱ m'e̱t'o da zo̱ ar pa gi 'ñeñhu̱: Nsunda togo xpa pe̱hna Jö ma Hmuhu̱.

will be added

X\