AR MATEO 10

1Nu'mú̱ ar Hesu bi zohna nu'u̱ 're̱t'amayoho yá ma̱xte, ne bi umba ar ts'e̱di nda 'ye̱nga ya ts'ondöhi, ne nda o̱thebi tsa̱nt'ö yá hñeni ne yá u̱gi ya jö'i. 2Gehyu̱ yá thuhu nu'u̱ 're̱t'amayoho yá mpo̱te ar Hesu xki zohni: M'e̱t'o ar Simu nö'ö bi thu'spabi ar Pedro, ar Andre ár jödöp'u̱'ö, ar Hakobo ne ar Xuwa ár jödö, yá t'u̱yu̱ ar Sebedeo. 3Ar Lipe, ar Bartolo, ar Toma, ar Teo nö'ö mar njotbojö, man'ar Hakobo ár t'u̱ ar Alfeo, ar Lebeo nö'ö bi t'embabi ar Tadeo. 4Nö'ö man'ar Simu xki ñ'owi nu'u̱ mi ntuhni mi ñönga ár hnini, ne ar Huda Iskariote nö'ö m'e̱fa bi da̱ ar Hesu. 5Ar Hesu bi me̱hna nu'u̱ 're̱t'amayoho yá mpo̱te xki hwahni ne bi 'ñembabi'u̱: 6Di ma ba zohu̱ ya me Israel nu'u̱ 'bu̱ ngu ya tsi de̱ti hinte 'ñe yá ma̱'yo. 7Di möhu̱ ne gi 'ñembabihu̱ njawa: Ár ts'u̱t'wi Jö 'ba̱p'u̱tho. 8O̱thehu̱ ya da̱thi, ne hñöjwu̱ yá hñeni nu'u̱ tsu̱ ar tsit'ando'yo, jafu̱ da nte nu'u̱ xi du, 'ye̱mbabihu̱ ya ts'ondöhi nu'u̱ togo xi nthe̱xkwi. Xta hwëk'ahu̱ nunar ts'e̱dinu̱, hwëkwathobihu̱ nu ma'ra n'ehe. 9Yo gi nxö'su̱ ar bojö xi nk'axt'i, wa ya t'axbojö, wa ya the̱ni. 10Yo gi te̱xju̱ ri 'ro̱zöhu̱, yo ma gi hñöxu̱ yo mponi ar dutu, wa ma'ra ya thiza, hinte gi hñöxu̱ n'ar ndo̱ho̱. Ngetho ar 'be̱go di 'ñepi da t'umba nö'ö te k'at'i. 11Nu xki tso̱ñhu̱ ha n'ar döta hnini wa n'ar t'u̱lo hnini, hyoñhu̱ n'ar hogajö'i, ne ka gi 'bu̱hu̱nu̱ hár ngu'ö gatho ya pa gi oxu̱nu̱. 12Nu xki ku̱thu̱ har ngu'ö, ze̱ngwahu̱ nu'u̱ 'bu̱hnu̱. 13Nu'mu̱ da 'ra'ahu̱ nse̱ki, ár hogam'u̱i Jö da zu̱'u̱. Ha nu'mu̱ hinda 'ra'ahu̱ nse̱ki, ar njöpi xka 'ya̱fu̱, da mengi da zu̱'ahu̱. 14Nu'mu̱ hinto da 'yo̱x'ahu̱, ne hinto da jamfi nö'ö gi xifu̱, po̱ñhu̱ har ngu'ö wa har hnini'ö, ne gi hwöthu̱ ri wahu̱, da hyo̱ ar fontha̱i xi wat'a ha ri thizahu̱. 15Xa majöni di xi'ahu̱, nunar pa da thöxamajöni, nunar hnini'ö ma da hñönga n'ar döta mfe̱i, di töta ár mfe̱i ya hnini Sodoma ne ar Gomora. 16Nupya di pe̱ñ'ahu̱ gi möhu̱, ma gi 'yohu̱ ngu ya tsi de̱ti madeda ya miñ'o. Jange zo̱t'a ri da̱hu̱ ngu n'ar k'eñö, ne di hñöx'ahu̱ n'ar tsi domtxu. 17Jamasuhu̱ ngetho ya jö'i ma da da̱t'ahu̱ ha yá 'ye̱ ya ts'u̱t'wi, ne ma da me̱p'ahu̱ ha yá nijö. 18Nu'u̱ ma da da̱t'ahu̱ ha ya ts'u̱t'wi, ma da m'a̱p'ahu̱ ha ya ndö ngetho gi te̱ngagihu̱. Njap'u̱ gi da̱twabihu̱ majöniyu̱, ne nu'u̱ hingya xodyo. 19Nú'mu̱ xta ts'oñ'ahu̱, yo gi tu ri mu̱ihu̱ tema gi möñhu̱ wa tema gi thöhu̱, ngetho ge'mu̱ Jö ma da 'ra'ahu̱ gatho nö'ö gi möñhu̱. 20Hingo ma gi ñöse̱hu̱; nu ár Hñö Jö ar Dada go ma da mönga nö'ö da bo̱nga ha ri nehu̱. 21Nuya pa'u̱ ya jö'i ma da u̱tsase̱ yá ku, ma da da̱ da tho. Nuya dada da da̱ yá t'u̱, nuya t'u̱ ma da u̱tsa yá dada, ne da da̱'u̱ da tho n'ehe. 22Gatho ya jö'i ma da u̱tsa'ihu̱ ngetho gi te̱ngagihu̱, ha nö'ö togo da ze̱tatho da do̱'mi da göxa xo̱ge, go ma da mpo̱'ö. 23Nu'mu̱ da nt'u̱tsa'ihu̱ ha n'ar hnini, po̱ñhu̱ di möhu̱ man'a. Xa majöni di xi'ahu̱, hingi jwahu̱ gi 'yohu̱ xo̱ge ya hnini har ha̱i Israel, ne Nö'ö Togo ba e bi Njö'i da menga man'agi. 24Ar ma̱xte hingi töpa ár nsu ár utate, ha n'ar 'be̱go hingi töpa ár nsu ár hmu. 25Xiñho nu'mu̱ ar ma̱xte da ñhe̱hwi ár utate, ne ar 'be̱go da ñhe̱hwitho ár hmu. Nu'mu̱ ar dada bi t'embabi ar Belsebu, hanja to̱'mi da nsipabi yá bötsi 'mu̱. 26Jange hinto gi tsuhu̱wa, ngetho hiñ'otho tema xi t'ögi ne hinda thandi, wa tema xi t'o̱t'a ñ'öntho ne hinda födi. 27Nö'ö di ut'ase̱hu̱ ñ'öntho, utwabihu̱ gatho ya jö'i, ha nö'ö di xi'ahu̱ njantetho, möñhu̱ nts'e̱di, da 'yo̱ gatho ya jö'i. 28Yo gi tsuhu̱ togo ne da hyo'ahu̱, ngetho ri pahu̱ hingi tsa̱ da hyo'u̱. Tsuhu̱ Jö togo pe̱'sa ar ts'e̱di da me̱hna ri pahu̱ ne ri ndo'yohu̱ har tsibi. 29Nuya tsi ts'ints'u̱ hingi hmödi, t'unga yoho ha n'ar tsi ku̱t'a, ha hinda za̱ da da̱ n'a har ha̱i nu'mu̱ hinda ungar se̱ki Jö ar Dada. 30Xi'ahu̱hmö. Ngetho ri xtöhu̱, Jö pödi hangu'u̱. 31Jange yo gi ntsuhu̱, ngetho gi töfu̱ ár nsu n'a mut'i ya ts'ints'u̱. 32Nö'ö togo da da̱tkagi majöni ha yá nthandi ya jö'i xi bökagi, nuga n'e ma ga da̱majöni xi bökagi hár nthandi ma Dada bi 'bu̱ mhets'i. 33Ha nö'ö togo da ko̱ngagi ha yá nthandi ya jö'i, nuga n'ehe ma ga ko̱nga hár nthandi ma Dada bi 'bu̱ mhets'i. 34Yo gi hu ri mu̱ihu̱ xta e ga jö'sa ya tuhniwa har ximha̱i. Hin'ö, ma da ga̱hni ngetho xta ehe. 35Xta e ga heka ya jö'i: nuya t'u̱ ma da do̱xa yá dada, nuya t'inxu ma da do̱xa yá nönö, ha nuya ts'ihwe̱ ma da do̱xa yá tsa. 36Nuyá ñ'u̱ni ya jö'i ma da bo̱nga ha yá nguse̱. 37Nö'ö töte ár mhöte pe̱'spa ár dada wa ár nönö, ne m'e̱fa ka mökagiga, hindi 'ñepi da de̱ngagi. Ne nö'ö töte ár mhöte pe̱'spa ár t'u̱ wa ár t'inxu, ne m'e̱fa ka mökagi, hindi 'ñepanu̱ n'ehe da de̱ngagi. 38Ne nö'ö togo hinda 'ye̱nt'a ár te da de̱ngagi, hindi 'ñepi ga ñ'o'be. 39Nö'ö togo xa suwa ár te har ximha̱i, ma da 'be̱di. Ha nö'ö da 'be̱ ár te te̱ngagi, ma da dinga ár te hiñham'u̱ da thege. 40Nö'ö togo da 'ra'ahu̱ ar se̱ki go xi 'rakagiga, ha nö'ö togo 'raka ar se̱kiga go umba ar se̱ki nö'ö togo xpa pe̱nkagi. 41Nö'ö togo da umba ar se̱ki n'ár m'e̱hni Jö ngetho mar m'e̱hni, ma da hñönga ar nthöhö ngu ar m'e̱hni. Ha nö'ö da umba ar se̱ki n'ar hogajö'i ngetho mar hogajö'i, ma da hñönga n'ar nthöhö mahye̱gi ngu hönga n'ar hogajö'i. 42Ne nö'ö togo da umba n'a tsi 'bada ar tse̱the n'a nuya tsi hyoyayu̱ te̱ngagi, xa majöni di xi'ahu̱ hinda 'be̱ ár nthöhö.

will be added

X\