AR MARKO 13

1Mi bo̱nga ar Hesu har dönganijö, n'a nuyá ma̱xte bi 'ñembabi: 2Ar Hesu bi dödi ne bi 'ñenö: 3Mi zo̱nga ar Hesu har t'o̱ho̱ Njömdo̱ni, bi hñudi mi ñhandwi ar dönganijö. Ha nu ar Pedro, ar Hakobo, ar Xuwa, ne ar Andre bi 'ya̱mbase̱: 4—Xikagihe, ham'u̱ ma da tho gathoyu̱. Tema nt'udi ma da nheki, ne da födi 'ba̱p'u̱tho da göxa gathoyu̱. 5Ar Hesu bi dötwabi'u̱ ne bi 'ñembabi: 6Ngetho ma da e nze̱ye̱ togo da gu̱mka ma thuhu da 'ñenö: Nuga go dar Kristo. Ne njap'u̱ da ka nze̱ye̱ ya jö'i. 7Ha nú'mu̱ xki 'yo̱hu̱ habu̱ gatho di ja ya tuhni, ne ma'ra ma da ndu̱i, yo gi tu ri mu̱ihu̱. Ngetho mahyoni da tho njap'u̱, mödi hinxi zo̱ta ár ngöts'i ar ximha̱i. 8Ngetho ya hnini ma da ntukwi yá mihniniwi, ya ndö ma da ntunkwi yá mindöwi. Ne xa hagatho ma da nhwönga ar ha̱i, ne ma da nja ar thuhu, ne ya jö'i xa di mu̱xmatho. Ho̱nse̱ ár ndu̱inu̱ ya u̱gi xi 'ñep'u̱. 9Ha ntsunse̱hu̱, ngetho ma da ts'ix'ahu̱ ha ya ts'u̱t'wi, ne da mfe̱nza'ihu̱ ha yá nijö ya xodyo. Ma da m'a̱p'ahu̱ ha ya ts'u̱t'wi ne ya ndö ngetho gi te̱ngagihu̱, njap'u̱ da tsa̱ gi da̱thu̱ majöni xka pökagihu̱. 10Ne mahyoni m'e̱t'o da mhönga ar hoga mhö ha gatho ya ha̱i jawa har ximha̱i, ne ka da e ar ngöts'i. 11Ha nu'ahu̱, nu xta ts'ix'ahu̱ ma da nda̱t'ahu̱ ha ya ndö, yo gi tu ri mu̱ihu̱ tema gi möñhu̱, ne hingi hyoñhu̱ tema gi thöhu̱. Ge'mu̱ ma da t'a'ahu̱ tema gi möñhu̱, ngetho hingo ge'ahu̱ togo gi ñöhu̱, go ñö ár Hñö Jö 'bu̱ ha ri mu̱ihu̱. 12Nuya njödö ma da da̱se̱ ár jödö da tho. Ne nuya dada ma da da̱se̱ yá bötsi, ha nuya bötsi ma da gu̱ yá dada da hyo. 13Ne gatho ma da u̱tsa'ihu̱ ngetho gi te̱ngagihu̱. Nö'ö da ze̱tatho, da do̱'mi da göxa xo̱ge nuya thogiyu̱, go ma da mpo̱'ö. 14Ha nú'mu̱ xki hyanthu̱ ar ts'oki xi nts'otho di 'bu̱ habu̱ hingi ho da m'u̱i, ngu bi 'yot'a ar m'e̱hni Dañe (nö'ö togo nehe, dá bödi xiñho teme ne da mö), nu'u̱ togo gi 'bu̱hu̱nu̱ Nhudea, di ma ba ñ'öñhu̱ ha ya t'o̱ho̱. 15Nu'u̱ togo gi to̱hu̱ mañö ar ngu, yo ma gi ku̱thu̱ te gi ju̱ju̱. Nixt'i di möhu̱. 16Ha nu'u̱ togo gi 'yohu̱ har 'batha, yo ma gi penju̱ gi ju̱ju̱ ri pa̱t'ihu̱. 17Hwëkate nu'u̱ ya 'be̱hñö di ñ'u̱, ne nu'u̱ di tsi yá bötsi di tsu̱da nuya pa'u̱. 18'Ya̱pabihu̱ Jö, nunar pa gi nixt'ihu̱, hinda da̱t'a ya pa xi ntse̱. 19Ngetho nuya pa'u̱ xa ma da nja ya thogi ngu hinxka hyanthu̱ man'a, nú'mu̱ Jö bi hyoka ar ximha̱i, ne xta thogi hinda ma da nja man'a ngu'ö. 20Ha nu'mu̱ ar tsi Dada hinda japi da göxa nuya pa'u̱, hinto ma da bonk'mu̱. Ma da jös'ö, ngetho ma da ma̱xa togo xi hwañ'ö. 21Jange nu'mu̱ da t'eñ'ahu̱: Ndi, ka bi 'bu̱kwa ar Kristo, wa da t'eñ'ahu̱: Ndi, bi 'bu̱hnu̱, yo ma gi jafu̱masu. 22Ngetho ma da nja ya kate Kristo ne ya kate m'e̱hni. Ne ma da 'yo̱t'a ya döta nt'udi da hya̱t'a ya jö'i, ne nu'mu̱ da tsa̱hmö, da hya̱t'a nu'u̱ xi hwahna ar tsi Dada. 23Ha nu'ahu̱, zo̱t'a xiñho ri da̱hu̱, ngetho xta xi'ahu̱ nö'ö ma da thogi. 24Nú'mu̱ xta göxa nuya pa'u̱ ñ'u̱tho, ar hyadi ma da m'e̱xui, ha nunar zönö hinda ma da unga ár hyats'i. 25Ne nuya tso̱ ma da hyo̱i, ha nuya ts'e̱di bi 'bu̱ mhets'i ma da nhwöt'i. 26Ne ma gi hyanthu̱ 'mu̱ Nö'ö Togo ba e bi Njö'i, ma da nheki di e ha ya gui, di hö n'ar döta ts'e̱di ne n'ar döta nsunda. 27Ne ma da me̱hna yá e̱nxe̱ 'mu̱, da muspa gatho nu'u̱ togo xi hwañ'ö xo̱ge hár nxidi ar ximha̱i, ne habu̱ di göxa mhets'i. 28Hyanthu̱ ar 'ba̱i'iuxi ne beñhu̱ tema utkagihu̱: Nú'mu̱ po̱xa yá n'ogi ne k'onts'a yá xi, gi pöhu̱ 'ba̱p'u̱tho ar pahyadi. 29Njap'u̱ nu'ahu̱ n'ehe, nu xki hyanthu̱ da tho gatho nuya thogiyu̱, pöhu̱, 'ba̱p'u̱tho da göxa xo̱ge. 30Xa majöni di xi'ahu̱, hinda theta nuya jö'i 'bu̱ nuya payu̱, ne xi wadi xi tho gatho nuya thogiyu̱. 31Mödi da m'e̱di ar mhets'i ne ar ximha̱i, nuya mhö xta mönga, hinda ma da m'e̱di. 32Nor pa ham'u̱ ma da göxa xo̱ge hinto pödi. Nuya e̱nxe̱ bi 'bu̱ mhets'i hingi pöhmö n'ehe, ne ár T'u̱ Jö hingi pödi, ho̱nse̱ ar Dada go pö'ö. 33Zo̱thu̱ ri da̱hu̱, ndo̱'mhu̱ ne 'ya̱fu̱ Jö, ngetho hingi pöhu̱ ham'u̱ da zo̱ ar ngöts'i. 34Ñhe̱hwi n'ar ñ'o̱ho̱ bi ma yap'u̱, bi zo ár ngu ne bi umba ar ts'e̱di nuyá 'be̱go. Bi zokwa yá 'be̱fi n'a ngu n'a, ne ar sugoxthi bi xipabi hinge nda ñ'öhö. 35Jange ndo̱'mhu̱, ngetho hingi pöhu̱ tema xe̱nimpa da ep'u̱ togo ár me̱ti ar ngu, wa xta nde, made nxui, hár mhafi ar boxi, wa xta hats'i. 36Nu'mu̱ n'a nda ep'u̱tho, hinda diñ'ahu̱ gi öthu̱ hingi to̱'mhu̱. 37Ne nö'ö di xi'ahu̱, get'ö di xipabi gatho: Ndo̱'mhu̱.

will be added

X\