AR LUKA 16

1Ar Hesu bi 'ñembabi yá ma̱xte n'ehe: 2Jange ar hmu bi zohna ár 'be̱go, ne bi 'ñembabi: Xta o̱ka 'ra ya 'bede ntho̱x'a'i. Jange di ne gi da̱tka majöni gatho ri 'be̱fi, ngetho hindi ne gi pe̱pkathogi. 3Nep'u̱ nö'ö ar 'be̱go'ö bi bense̱ hár mfeni, ne bi 'ñenö: Xipya te ga pe̱fi. Ma hmu da hñömga ma 'be̱fi, ha hiñ'otho ma ts'e̱di ga xa̱'mar ha̱i, ha 'raka ar m'e̱tsa̱ ga mpe̱ti. 4Xta beni te ga pe̱fi. Ma ga nu ha ga japi da 'rakar se̱ki ha yá ngu nu'u̱ togo tupabi ma hmu, nú'mu̱ xta thögagi ma 'be̱fi. 5Ne bi zohna 'raman'a nu'u̱ togo mi tupabi ár hmu. Nö'ö ar ndu̱i bi 'ya̱mbabi: Hangu gi tupa ma hmu. 6Nö'ö bi dödi ne bi 'ñenö: Di tupabi n'anthebe nts'o̱i ar nziki. Ha nö'ö ar 'be̱go bi 'ñembabi: 'Bu̱kwa ar he̱'mi habu̱ huts'i hangu gi tupa ma hmu. Dama hyoka man'a habu̱ di mö, ho̱nse̱ madenthebe nts'o̱i gi tu. 7Nep'u̱ nö'ö man'a bi 'ñembabi: Xi'ge hangu gi tuge. Nö'ö bi 'ñenö: N'anthebe ndu ar t'e̱i. Nep'u̱ nö'ö ar 'be̱go bi 'ñembabi: 'Bu̱kwa ri he̱'mi habu̱ huxa hangu gi tupa ma hmu. Hyoka man'a habu̱ di mö, ho̱nse̱ gohon'a̱te gi tu. 8Nep'u̱ nu ár hmu bi 'ñe'spa ár nsu nö'ö ar ts'o'be̱go'ö, ngetho dama bi tita ár mfeni bi gohwi xiñho nu'u̱ togo mi tu ya tha̱i. Jange njap'u̱ nuya meximha̱i, xa ka mbödi da zixkwi xiñho yá ñ'ohu̱ nuyá 'be̱fi'u̱, ha nu'u̱ xi jamfi Jö hingi njap'u̱'u̱. 9Ha nuga di xi'ahu̱, nunár bojö ar ts'oximha̱i gi pe̱'su̱, fa̱xu̱ ma'ra, ne njap'u̱ gi ntsixkwihu̱. Ne nu xta the ri tehu̱, ne da the ar bojö, ma da t'a'ahu̱ habu̱ gi tsa̱ya̱hu̱nu̱ mhets'i hiñham'u̱ da göts'i. 10Nö'ö togo su xiñho nö'ö n'a tsi tu̱i t'umbabi, njap'u̱tho nu'mu̱ da t'umba nze̱ye̱. Ha nö'ö hingi su xiñho nö'ö tsi tu̱i t'umbabi, nu'mu̱ da t'umba nze̱ye̱, hinda su n'ehe. 11Njap'u̱tho n'ehe, nu'mu̱ hingi sufu̱ xiñho ya ñho jawa har ximha̱i, togo da ka̱xmbeni'ihu̱ da 'ra'ahu̱ gi kwathu̱ ya ñho hiñham'u̱ da thege. 12Nu'mu̱ hingi suhu̱ xiñho nö'ö hingo ri me̱tihu̱, togo da 'ra'ahu̱ nö'ö ri me̱tihu̱ gi suhu̱. 13N'ar 'be̱go hinda tsa̱ da me̱pa yoho yá hmu, ngetho njap'u̱ da u̱tsa n'a, ne da mö man'a. Wa da me̱pa n'a, ne nö'ö man'a hin'ö. Njap'u̱ n'ehe, hinda tsa̱ gi pe̱fu̱ Jö ne di oda ri mfenihu̱ ya ñho. 14Ha nuya de̱nga'be̱pate mi 'bu̱hnu̱ mi o̱ts'e, xa mi thentho'u̱, ngetho xa mi mö ya bojö. 15Ha nu ar Hesu bi 'ñembabi'u̱: 16Nú'mu̱ himi tso̱ta ar Xuwa Xixthe, ya ngi pe̱'sfu̱ yá 'be̱pate ar Moise ngi 'yo̱thu̱, ne nö'ö xki mönga ma'ra yá m'e̱hni Jö. Ne nu mi zo̱ ar Xuwa dinjawa, xka 'yo̱hu̱ xi nsi'ahu̱ ar hoga mhö no̱nga ár ts'u̱t'wi Jö, ne nze̱ye̱ xi umba yá mu̱i da yu̱t'a hár ts'u̱t'wi'ö. 17Ar mhets'i ne ar ximha̱i hingi hembi da göts'i. Ha hiñ'otho n'ar t'ofo xi t'ot'a hár T'ofo Jö, hinda njap'u̱tho. Ma da tho gatho ngu möñ'ö. 18Nu'mu̱ n'ar ñ'o̱ho̱ da hye̱p'u̱ ár 'be̱hñö ne da nthötwi man'a, tsimbabi ár nthöti. Ne nö'ö togo da nthötwi n'ar 'be̱hñö xi hye̱ ár döme, tsimba ár nthöti n'ehe. 19Mi 'bu̱ n'ar ñ'o̱ho̱ hinte mi k'at'i, ne xa mi ñhe xiñho, mi ko̱ 'ra ya hoga dutu xa mar nza̱tho. Ne hyax'mu̱ mi exa ár nsu mi o̱t'a ya da̱ngo. 20Ne mi 'bu̱ n'ar tsi me̱ti már thuhu ar Lasaro, hyax'mu̱ mi huhnu̱ hár goxthi ár ngu ar ñ'o̱ho̱ hinte mi k'at'i. Nunar tsi me̱tinu̱ xa xki fo̱xt'a xo̱ge ár ndo'yo, ne mi po. 21Mi e ya 'yo mi te'spabi habu̱ xki 'ya. Ne nö'ö ar tsi ñ'o̱ho̱'ö, mi nemhö nda go nda zi nu'u̱ ya xe̱ni mi ta̱ hár mexa ar ñ'o̱ho̱ hinte mi k'at'i. 22N'ar pa bi du ar tsi me̱ti, ne ya e̱nxe̱ mhets'i ba e bi zits'i nda m'u̱hwi ar Abra. M'e̱fa bi du nö'ö hinte mi k'at'i n'ehe, ne bi t'a̱gi. 23Nu mi onu̱ har 'be̱xui, xa mi tho n'ar u̱gi. Bi gu̱xnu̱ ár da̱, ne bi hyanda yap'u̱ ar Abra ne ar Lasaro mi 'bu̱hwinu̱. 24Bi mat'i ne bi 'ñembabi: Ma tsi dada'i Abra, pe̱'ska ar nhwëki. Ba pe̱hna ar Lasaro da po n'ár xa̱ ha n'ar tsi tu̱i ar dehe, da e da tse̱tka ma jöhne. Ngetho xa di thokwa ya u̱gi ha ya faspi. 25Ha nu ar Abra bi 'ñembabi: Ma tsi t'u̱'i, benga nú'mu̱ ngi 'bu̱hnu̱ har ximha̱i, xa ngi 'bu̱i xiñho, ha nu ar Lasaro mi ñ'u̱da ár m'u̱i mi hyoya. Ha nupya, nunu̱ 'bu̱kwa xiñho, ha nu'ge ñ'u̱da habu̱ gi 'bu̱i. 26Ha hinda tsa̱ da map'u̱ ar Lasaro, ngetho ja n'ar ma'ye madetho xa ra ñhe. Jange nu'u̱ 'bu̱kwa, hinda za̱ da map'u̱, ha nu'u̱ bi 'bu̱p'u̱, hinda za̱ di 'ñekwa. 27Ha nö'ö ar ñ'o̱ho̱'ö bi 'ñenö: Ma tsi dada'i Abra, nu'mú̱, di a̱'a ar möte gi pe̱hnats'u̱ ar Lasaro hár ngu ma dada. 28Ngetho di 'ñe ku̱t'a ma jödö, di ne da zofo ne hinda ekwa da tho ya u̱gi ngu di thoka. 29Ha nunar Abra bi 'ñembabi: Nu'u̱ bi pe̱'spa nö'ö bi 'yot'a ar Moise ne nö'ö bi 'yot'a nu'u̱ ma'ra yá m'e̱hni Jö. Go da 'yo̱x'u̱. 30Nunar ñ'o̱ho̱'ö bi mengi bi 'ñenö: Hö, majöni nö'ö gi mö, ma dada'i Abra. Di beni, nu'mu̱ gi pe̱hna n'a nu'u̱ xi du, da 'yo̱ts'e ne da 'yo̱t'wa yá ntso̱'mi. 31Ha nunar Abra bi mengi bi 'ñembabi: Nu'mu̱ hingo o̱ta nö'ö bi mönga ar Moise ne ma'ra yá m'e̱hni Jö, hinda ne da jamfi nö'ö da xipa n'a togo xi mengi xi nte.

will be added

X\