AR HUDA 1

1Nuga dar Huda, ár 'be̱gogi ar tsi Hmu Hesukristo ne ár jödö ar Hakobo. Di pe̱ñ'ahu̱ nunar he̱'minu̱ nu'ahu̱ xi zoñ'ahu̱ da t'axk'ahu̱ Jö ar Dada, ne xi hwix'ahu̱ har tsi Hmu Hesukristo. 2Dá hñuxa ár nhwëki, ár hogam'u̱i ne ar mhöte 'ra'ahu̱ Jö. 3Tsi kuhu̱, xa di ne ga pe̱ñ'ahu̱ n'ar he̱'mi habu̱ ga xi'ahu̱ nunar ñ'emu̱i di pe̱'su̱. Ha di handi m'e̱t'o, mahyoni ga xi'ahu̱ xa gi umba ri mu̱ihu̱ gi ñöñhu̱ nunar ñ'emu̱i n'agitho bi t'akagihu̱. 4Ngetho xi yu̱t'a ñ'öntho 'ra ya ts'ojö'i ju̱mpa ár nhwëki Jö da 'yo̱t'a nö'ö te gatho ne'u̱. Nuyu̱ yanu̱ mam'e̱t'o xi t'e̱nt'i da m'e̱di, ne ko̱nga Jö togo ar ndö xo̱ge, ne ko̱nga ma tsi Hmuhu̱ Hesukristo. 5Di ne ga beñ'ahu̱ nö'ö mam'e̱t'o xka pöhu̱: Nú'mu̱ ar tsi Dada ba ju̱ka ya me Israel mi njapi nda mpe̱ nts'e̱di núnu̱ Ehipto, m'e̱fa bi hyo gatho nu'u̱ togo himbi ñ'emu̱ibi. 6Ha nuya e̱nxe̱ himbi su yá nsu xki t'umbabi, bi zop'u̱ yá ngu habu̱ mi 'bu̱'u̱, nupya Jö xi got'a har 'be̱xui, ne xi nthöt'i to̱'mtho da zo̱nga ar pa da thö'spa majöni. 7Ngu ar Sodoma, ar Gomora ne nu ma'ra ya hnini mi ja ha yá nthet'iyu̱, nu'u̱ n'ehe mi hye̱p'u̱ Jö, ho̱nse̱ mi ne nda 'yo̱t'a gatho nö'ö mi ne yá ndo'yo, ne ya ndo̱ mi 'be̱ngwi yá mindo̱wi. Ngu n'ar nt'udi bi t'e̱nt'a har tsibi hiñham'u̱ da göts'i. Njanu̱ utkagihu̱ tengu ár mfe̱i Jö. 8Nuya ts'ojö'iyu̱ ngu 'withötho, ngu nu ma'ra xta möñhu̱ hingi tsupa Jö, tsanga gatho nu'u̱ ja yá ts'e̱di, ne hyax'mu̱ ts'oka yá ndo'yo. 9Nunar ndö e̱nxe̱ Mige, nú'mu̱ mi nwengwi ar ts'ondöhi togo nda gohwi ár ndo'yo ar Moise, himbi 'ya̱pa n'ar nt'a̱di. Ho̱nse̱ bi 'ñembabi: Ar tsi Dada da zu̱'a'i. 10Ha nuya ts'ojö'iyu̱ tsanga gatho nö'ö hingi pödi. Ha nö'ö pödi, ngu ya me̱ti hiñ'otho yá mfeni, o̱t'a gatho nö'ö ne'u̱. Njap'u̱ japa da ts'oka yá te. 11Hwëkate'u̱, ngetho xi de̱mbatho ár 'be̱fi ar Kain, ne bi ñ'e̱nt'atho da dö ar bojö ngu ar Balam. Nuyu̱ ma da nhwata ngu ar Kore, ngetho xa ya me̱'sku. 12Nuya jö'iyu̱ n'ar m'e̱tsa̱ gi nthöskwihu̱ nú'mu̱ gi ñungwihu̱ mahye̱gi ya hmöka ku. Hiñ'otho yá tsa̱yu̱, honse̱ yá ñho. Ñhe̱hwi ya 'bikui tuxta ar ndöhi, ngu ya 'ba̱iza nú'mu̱ ndöbëhë hinti unga te da ts'i, yo'gi xi du ne yo'gi xi nk'u̱ts'i xi t'e̱mp'u̱. 13Nuyu̱, njangu nuya dehe mpu̱nts'i ne tuxa ár fu̱gi bi e̱nga har ñönthe, njap'u̱ nheki yá ts'oki 'be̱ yá tsa̱, ngu ya tso̱ nixt'i xi t'e̱nt'i da m'e̱ har 'be̱xui. 14Ar Enok ár yoto m'u̱i yá ma̱nga'be̱to ar Adan, bi 'ñeñ'ö mam'e̱t'o: Hyanthu̱ ba ehnu̱ ar tsi Hmu ñ'owi nu'u̱ ra nze̱ye̱ ya nthebe ya nthebe nu'u̱ yá me̱ti'ö. 15Ne da hñö'spa majöni gatho ya jö'i, ne da hñu'mba yá hmi ya ts'ojö'i da uta gatho nuya ts'oki xi 'yo̱t'e, ne gatho nö'ö xi tso̱t'wa ár mu̱i Jö mi ho̱xa ya ts'omhö. 16Nuya jö'iyu̱ gatho tsa̱mañ'u̱ ne gatho ñömañ'u̱, ne da 'yo̱t'a gatho nö'ö ne'u̱, xa ñ'exase̱ ne ka ya jö'i da zipyá bojö. 17Ha nu'ahu̱ ma tsi kuhu̱, beñhu̱ xiñho nuya mhö bi mönga maham'u̱ yá mpo̱te ma tsi Hmuhu̱ Hesukristo. 18Nuya mhö bi xi'ahu̱: Nu ha ya ngöxapa ma da nja ya hya̱te jö'i, ma da m'u̱'u̱ ngu xipabi yá ts'omfeni. 19Gehyu̱ heka ya ku, te̱mnda yá 'be̱fi ar ximha̱i, ngetho hinxi me̱'spa ár Hñö Jö. 20Hö, tsi kuhu̱, umba ri mu̱ihu̱ da te ri ñ'emu̱ihu̱, ne zohu̱ ar tsi Dada, di tsix'ahu̱ ár Hñö Jö. 21Yo ma gi hye̱hu̱ nunar mhöte xi 'rakagihu̱ Jö, ne hyax'mu̱ gi to̱'mhu̱ ár nhwëki ma tsi Hmuhu̱ Hesukristo da 'ra'ahu̱ ar te hiñham'u̱ da göts'i. 22Nu'mu̱ gi hyanthu̱ 'ra ya ku hingi ñ'emu̱i xiñho, fa̱xu̱ da te yá jamfi. 23Ma'ra fa̱xu̱ da mpo̱ho̱, ne njap'u̱ gi tsiñhu̱ hinda ma har tsibi. Ma'ra hwëju̱, ho̱nse̱ ntsuñhu̱ yo ma gi te̱mfu̱ yá ts'oki. U̱tsahu̱ ar ts'oki ne yá dutu xi ts'onga nuya 'yo̱t'ats'okiyu̱. 24Jö togo pe̱'sa ar ts'e̱di da sugagihu̱, ne hinda hye̱gagihu̱ ga 'wehu̱, xa di johyanu̱ da zixkagihu̱ xint'axigihu̱ hár nsunda. 25Gehnu̱ pe̱'sa ar mfödi, ne ho̱nse̱nu̱ Jö ne ma Po̱ho̱tehu̱. Dá nhut'wabi'ö ár nsunda. Dá nhumansubi ár ts'u̱t'wi ne ár ts'e̱di, ne da t'e'spa ár nsupya, ne hiñham'u̱ da göts'i. Dá njap'u̱.

will be added

X\