AR XUWA 17

1Mi wadi bi mönga njap'u̱, ar Hesu bi no̱'sa mhets'i ne bi 'ñenö: 2Ngetho xka 'raka ar ts'e̱di töpa gatho ya meximha̱i, ga umba ar te hiñham'u̱ da göts'i nu'u̱ togo xka da̱tka ha ma 'ye̱. 3Gehnu̱ ar te hiñham'u̱ da göts'i: da bö'a'i ho̱nse̱'i gar Jö majöni, ne da bökagi dar Hesukristo togo xka pe̱nkagi. 4Nuga xta jwata ma 'be̱fi xka 'rakagi, njap'u̱ xta ñ'u ri nsundawa har ximha̱i. 5Ma tsi Dada'i, koska ma nsunda ga 'bu̱hwi habu̱ gi 'bu̱i, ne njap'u̱ da nheki ma nsu, ngu nunar nsu ndi pe̱'skwi nú'mu̱ hinxki thoktho ar ximha̱i. 6Xta utwabi togo'i nuyu̱ xka hwahna har ximha̱i, ne xka 'ye̱ntk'a ha ma 'ye̱. Go ma ri me̱ti ne xka 'rakagipya. Nuyu̱ xi 'yo̱t'a gatho ngu xka pe̱nkagi ga xipi. 7Nupya pöhyu̱, gatho nö'ö di pe̱fi, go xka 'be̱pkagi. 8Ngetho xta xipa nö'ö xka xikagi, ne nuyu̱ xi hñöni. Ne xi böhyu̱ majöni xta ehe habu̱ ndi 'bu̱hwi, ne xi ñ'emu̱i go xka pe̱nkagi. 9Nuga di a̱'i gi suyu̱. Hinge di a̱'i gi su nu'u̱ hingya gamfi, di a̱'i gi su nuyu̱ togo xka 'rakagi, ngetho go ri me̱ti n'ehe. 10Gatho nö'ö ma me̱ti go ri me̱ti n'ehe, ne nö'ö ri me̱tige go ma me̱ti n'e. Gehyu̱ xa japabi xi nheki ma nsunda. 11Ma ga he̱gi di 'bu̱ka har ximha̱i, ngetho gar map'u̱ habu̱ gi 'bu̱i. Ha nuyu̱ ma da m'u̱kwatho har ximha̱i. Ma tsi Dada'i xa xint'axi'i, nuya xka 'rakagi, suyu̱ hár ts'e̱di ri thuhu, ne da n'athoyu̱, nguju̱ di n'athowi. 12Nú'mu̱ ndi 'bu̱'bewa har ximha̱i, go ndi suga hár ts'e̱di ri thuhu hinge nda 'wege. Nu'u̱ ga 'rakagi ndi su, hinto bi m'e̱di, ho̱nse̱ nö'ö xki t'e̱nt'i nda m'e̱di, ne nda tho ngu huxa har T'ofo. 13Nupya ma ga map'u̱ habu̱ gi 'bu̱i. Nú'mu̱ di 'bu̱kwatho har ximha̱i di mönga nuya mhöyu̱, njap'u̱ ga thokwabi ma johya ne da nxo̱ge yá johyayu̱. 14Xta umbabi ri mhöyu̱. Ne ar ximha̱i bi u̱tsa, ngetho hingyá me̱ti ar ximha̱i, nguga hingo ár me̱tigi ar ximha̱i. 15Hindi a̱'i gi ju̱ka har ximha̱i, ho̱nse̱ di a̱'i gi ñöni hinte da japa ar ts'ondöhi. 16Nuyu̱ hingyá me̱ti ar ximha̱i, nguga hingar me̱tigi ar ximha̱i. 17Di a̱'i gi utwabi nö'ö majöni, ne da 'ye̱nt'a yá te da me̱p'a'i. Nuna ri mhö gehnu̱ majöni. 18Jangu xka pe̱nkagi har ximha̱i, njap'u̱ xta pe̱nkayu̱ har ximha̱i n'ehe. 19Nuga di homba yá ñhoyu̱. Gese̱gi di e̱nt'a ma te ha ri 'be̱fi, ne njap'u̱ nuyu̱ n'ehe da 'ye̱ntyá te ha ri 'be̱fi, ngetho pöhyu̱ nö'ö majöni. 20Hinge ho̱nse̱ di a̱'a'i gi fa̱xyu̱. Fa̱xats'u̱ nu'u̱ togo ma da ñ'emu̱igi n'ehe xta 'yo̱ yá mhö da̱majöniyu̱. 21Ne da n'athoyu̱ ngu di n'athowi, ma tsi Dada'i, ngetho nu'ge ne nuga di 'bu̱hwi mahye̱gi. Ne ga n'at'wihu̱yu̱ n'ehe, ne njap'u̱ ya meximha̱i da ñ'emu̱i go xka pe̱nkagi. 22Ngu nö'ö ar nsunda xka 'rakagi, njap'u̱ ga thokwabiyu̱ n'ehe, ne da n'athoyu̱ ngu di n'athowi. 23Nuga ma ga 'bu̱'beyu̱, ne nu'ge di 'bu̱hwi. Njap'u̱ di n'athoyu̱, ne ya meximha̱i da bödi xka pe̱nkagi, ne xa gi möhyu̱ ngu xka mökagi. 24Ma tsi Dada'i, núyu̱ xka 'ye̱ntk'a ha ma 'ye̱, di ne da m'u̱ habu̱ di 'bu̱ka, ne da hyanda nö'ö ar nsunda xka 'rakagi; ngetho ngi möki nú'mu̱ hinxki thoktho ar ximha̱i. 25Ma tsi hoga Dada'i, nuya jö'i hingya gamfi hinxi bö'i. Ha nuga di pö'i, ne nuyu̱ xka 'rakagi pöhyu̱ n'ehe go xka pe̱nkagi. 26Xta utwabiyu̱ togo'i ne tengu ri m'u̱i, ne hinga ma ga tsa̱ya̱ ga utwabi. Ne njangu xka mökagi, nuyu̱ n'ehe da me̱'sa nunar mhöte'ö ha yá mu̱i, ne ma ga 'bu̱'begayu̱.

will be added

X\