AR XUWA 16

1Di xi'ahu̱ njap'u̱, ne hingi 'wehu̱ xta 'ñep'u̱ ya nt'u̱tsa. 2Ma da t'e̱ñ'ahu̱ ha ya nijö, ne ma da zo̱ ya pa nú'mu̱ togo ma da hyo'ahu̱, njap'u̱ pe̱pa Jö emp'ö. 3Nu'u̱ ma da 'yo̱t'ahu̱ njap'u̱, ngetho hingi pö'u̱ togo ma Dada, ne hingi pö'u̱ togogi. 4Xta xi'ahu̱ nuya mhöyu̱, ne nú'mu̱ xta tho njap'u̱, gi beñhu̱ xta xi'ahu̱ m'e̱t'o. 5Ha nupya ma ga penga habu̱ bi 'bu̱ togo ba pe̱nkagi. Ne hinto xka 'ya̱ngagihu̱ habu̱ gar ma. 6Ho̱nse̱ xa gi tu ri mu̱ihu̱ ngetho xta xi'ahu̱ njap'u̱. 7Majöni di xi'ahu̱, gi to̱'mhu̱ ri ñhohu̱ nu'mu̱ gar maga. Nu'mu̱ hinga ma, hinda e ar Humamu̱i. Ha nu'mu̱ ga ma, ma ga pe̱mp'ahu̱ gi 'bu̱hwihu̱. 8Nu xta zo̱'ö, ma da hñu'mba yá hmi ya jö'i, da bö'u̱ xa tu yá ts'oki, hanja da m'u̱ xiñho, ne Jö ma da hñö'spa majöni. 9Ma da utwabi'u̱ xa tu ya ts'oki, ngetho hingi ñ'emu̱igi. 10Ma da utwabi hanja da m'u̱i xiñho, ngetho nuga ma ga penga man'agi habu̱ bi 'bu̱ ma Dada, ne hinge ma gi hyandgagihu̱. 11Ne da utwabi ar thöxamajöni, ngetho nö'ö togo ndöwa har ximha̱i, xi wadi xi thu'spa ár mfe̱i. 12Di pe̱'sta ma nze̱ye̱ tema ga xi'ahu̱, ha nupya hinda tsa̱ ga ut'ahu̱, ngetho hinda tsa̱ da zo ri mfenihu̱ xo̱ge. 13Nu xta ep'u̱ ár Hñö Jö nö'ö mönga majöni, ma da 'yot'ahu̱ xiñho ar 'ñu nö'ö majöni. Ngetho hinda ma da mönga nö'ö bense̱, ma da mönga nö'ö xi 'yo̱de, ne da xi'ahu̱ nö'ö tema da tho m'e̱fa. 14Ma da 'ñeska ma nsu, ngetho ma da gu̱nka ma me̱ti ne da ut'ahu̱. 15Gatho nö'ö ár me̱ti ma Dada ma me̱ti n'ehe, jange xta xi'ahu̱ da gu̱nka ma me̱ti ne da ut'ahu̱. 16'Be̱ 'ra ya tsi pa, ne hinge ma gi hyandgagihu̱. Ne da tho ma'ra ya tsi pa, ne ma gi hyandgagihu̱ man'agi, ngetho gar ma habu̱ bi 'bu̱ ma Dada. 17Nu'mú̱ 'ra yá ma̱xte mi enga n'a ngu n'a: 18Mi eñ'u̱: 19Ar Hesu bi bötho tema mi ne nda 'ya̱mbabi'u̱, jange bi 'ñembabi'ö: 20Xa majöni di xi'ahu̱, xa ma gi nzoñhu̱ ne ma gi thohu̱ ar dumu̱i, ha nuya meximha̱i ma da njohya. M'e̱fa nuna ri dumu̱ihu̱ ma da thege, ne ma da e ar johya. 21Ma gi njahu̱ ngu n'ar 'be̱hñö tho ya u̱gi ngetho xi zo̱ yá pa da m'u̱ ár bötsi. Ha nu xta wadi da m'u̱ ár bötsi, da pumhnitho ar u̱gi bi thogi, di töte ar johya pe̱ts'i, ngetho xi zo̱kwa n'ar bötsi har ximha̱i. 22Gi njahu̱pya, xa gi tu ri mu̱ihu̱. Ha nú'mu̱ xka pengi ga hant'ahu̱, xa ma gi njohyahu̱, ne hinto ma da hñöñ'ahu̱ nunar johyanu̱. 23Nuya pa'u̱ hinte ma nt'a̱ni gi 'ya̱ngagihu̱. Xa majöni di xi'ahu̱, gatho nö'ö gi 'ya̱pabihu̱ ma Dada gi no̱nju̱ ma thuhu, go da 'ra'ahu̱'ö. 24Hinte xka 'ya̱pathohu̱ gi no̱nju̱ ma thuhu. 'Ya̱fu̱ ne da t'a'ahu̱, njap'u̱ da nxo̱ge ri johyahu̱. 25Nö'ö xta xi'ahu̱ xta mönga m'ede. Ma da zo̱ ar pa hinga zo'ahu̱ njap'u̱. Ma ga xi'ahu̱ n'agitho togo ma Dada, ne njap'u̱ da zo xiñho ri mfenihu̱. 26Nuya pa'u̱ ma gi 'ya̱pabihu̱ ma Dada gi no̱nju̱ ma thuhu. Di xi'ahu̱ hinge mahyoni ga a̱pa ma Dada da 'yo̱t'ahu̱. 27Gese̱ ma Dada mö'ahu̱, ngetho xka mökagihu̱, ne xka ñ'emu̱ihu̱ xta e habu̱ bi 'bu̱'ö. 28Ndi 'bu̱ habu̱ bi 'bu̱ ma Dada, ne xta ekwa har ximha̱i. Ma ga tsokwa ar ximha̱i, ne ga penga man'agi habu̱ bi 'bu̱ ma Dada. 29Nuyá ma̱xte bi 'ñembabi: 30Xi zo ma mfenihepya gi pö gatho, hinge mahyoni te da t'a̱ñ'a'i. Jange di ñ'emu̱ihe xka e habu̱ bi 'bu̱ Jö. 31Ar Hesu bi dötwabi'u̱ ne bi 'ñenö: 32Pöhu̱ ma da ep'u̱ ar pa, ne di xi'ahu̱, 'ba̱p'u̱tho nú'mu̱ ma gi mfonthu̱. N'a ngu n'a ma gi ju̱hu̱ ri 'ñuhu̱, ne ma gi hye̱gase̱hu̱. Mödi hinga ma ga 'bu̱se̱, ma ga 'bu̱'be ma Dada. 33Xta xi'ahu̱ njap'u̱, gehnu̱ da ja'ahu̱ gi 'bu̱hu̱ ter entho ga 'bu̱hwihu̱. Nuwa har ximha̱i ma gi thohu̱ ya thogi. Yo gi tu ri mu̱ihu̱, ngetho nuga xta tö ar ximha̱i.

will be added

X\