AR XUWA 15

1Nep'u̱ ar Hesu bi 'ñembabi yá ma̱xte: 2Nu'u̱ togo di 'bu̱'be, jangu yá 'ye̱ ar 'ba̱i'obxi. Nu'u̱ yá 'ye̱ uni, nö'ö togo su da hoki xiñho, honi xa da du. Ha nu'mu̱ hinte uni, da me̱ki. 3Nu'ahu̱ xi hok'ahu̱ xiñho nuya mhö xta xi'ahu̱. 4Kwathu̱ ga 'bu̱hwihu̱. Jangu ar 'ye̱za hingi tsa̱ te da uni nu'mu̱ hingi thöt'a hár 'ba̱i, njap'u̱tho'ihu̱ n'ehe, nu'mu̱ hindi 'bu̱hwihu̱, hinte mañho gi uñhu̱. 5Nuga go dar 'ba̱i'obxi, ha nu'ahu̱ yá 'ye̱. Nö'ö togo di 'bu̱'be, nunu̱ xa unga ar ñho. Ha nu'mu̱ hindi 'bu̱'be, hinte tsa̱ te da me̱fi. 6Nö'ö togo hindi 'bu̱'be, ma da t'e̱nga har ñöni ngu n'ar 'ye̱za, ne da 'yot'i. Nep'u̱ da njo, ne da t'u̱'sa har tsibi habu̱ da nzo̱. 7Nu'mu̱ xa gi umba ri mu̱ihu̱ ga 'bu̱hwihu̱, ne di oda ri mfenihu̱ ma mhö, 'ya̱hu̱ gatho nö'ö gi nehu̱ ne da t'a'ahu̱. 8Nu'mu̱ xa gi uñhu̱ ar ñho, njap'u̱ nheki ár nsunda ma Dada, ne njap'u̱ gi 'ñuhu̱ go ma ma̱xte'ihu̱. 9Ngu xi mökagi ar Dada, njap'u̱ di mö'ahu̱ n'ehe. Yo ma gi 'wehu̱, 'bu̱hu̱ ha ma mhöte. 10Nu'mu̱ gi 'yo̱thu̱ nö'ö xta 'be̱p'ahu̱, gi 'bu̱hu̱ ha ma mhöte 'mu̱, jangu xta o̱t'a nö'ö xpa 'be̱pkagi ma Dada, ne di 'bu̱ hár mhöte'ö. 11Di xi'ahu̱ njap'u̱ ne ga thok'ahu̱ ma johya, ne da nxo̱ge ri johyahu̱. 12Gehnu̱ ma 'be̱pate: Gi mhöhu̱ n'a ngu n'a ngu xta mö'ahu̱. 13Hiñ'otho man'ar mhöte di töpa ár nsu, da unga ár te da po̱ yá ñ'ohu̱. 14Nu'ahu̱ go ma ñ'ohu̱ nu'mu̱ gi 'yo̱thu̱ nö'ö di 'be̱p'ahu̱. 15Nupya hindi nu'ahu̱ ngu n'ar 'be̱go, ngetho n'ar 'be̱go hingi pödi tema pe̱ ár hmu. Ha nu'ahu̱ ma ñ'ohu̱, ngetho gatho nö'ö xta o̱de xi mönga ma Dada, xta xi'ahu̱ n'ehe. 16Nu'ahu̱ hinga hwankagihu, nuga go da hwañ'ahu̱, ne xta ex'ahu̱ gi möhu̱, ne da nheki ri hoga 'be̱fihu̱ hiñham'u̱ da thege. Njap'u̱ gatho nö'ö gi 'ya̱fu̱ ma Dada gi po̱tju̱ ma thuhu, da 'ra'ahu̱. 17Nö'ö di 'be̱p'ahu̱: Mhöhu̱ n'a ngu n'a. 18Nú'mu̱ xta u̱tsa'ihu̱ ya jö'i, beñhu̱ bi u̱tsagiga m'e̱t'o. 19Nu'mu̱ ár me̱ti'ihu̱hmö ar ximha̱i, nuya meximha̱i da mö'ahu̱ ngu mö yá mi meximha̱iwi. Ha nu'ahu̱ hingyá me̱ti'ihu̱, ngetho nuga nú'mu̱ nda hwañ'ahu̱, da zoñ'ahu̱ madeda ya meximha̱i, jange u̱tsa'ihu̱. 20Beñhu̱ nö'ö xta xi'ahu̱, ar 'be̱go hingi töpa ár nsu ár hmu. Nö'ö togo xi u̱tsagi, ma da u̱tsa'ihu̱ n'ehe. Ha nu'mu̱ xi 'yo̱t'a nö'ö xta mö, ma da 'yo̱t'ahu̱ nö'ö gi xipabihu̱ n'ehe. 21Ha nu'u̱ togo da u̱tsa'ihu̱, ma da jap'u̱ ngetho xka ñ'emu̱igihu̱, ne hingi pö'u̱ togo xpa pe̱nkagi. 22Nu'mu̱ hinxta ekahmö ne hinxta zohmö nuya jö'iyu̱, hinte ma ts'oki di tuhmöyu̱. Ha xta ehe xta xipabi, jange hiñ'otho te da dö'u̱. 23Nö'ö togo u̱tsagi, po̱ntho u̱tsa ma Dada n'ehe. 24Nu'mu̱ hinxta ñ'uhmö ya nt'udi nö'ö hinto man'a xi za̱ xi 'yo̱t'e, hinte ma ts'oki di tuhmö'u̱. Ha xi hyandya nt'udi, ne xi u̱tsagi mahye̱gi'be ma Dada. 25Xi njap'u̱ ne nda tho ngu mönga ha yá t'ofo habu̱ enö: Xi u̱tsagi mödi hinte xta japabi'u̱. 26Ne ma ga pe̱ñ'ahu̱ ar Humamu̱i, gehnu̱ ár Hñö Jö mönga majöni, di 'ñe habu̱ bi 'bu̱ ma Dada. Nunu̱ da da̱t'ahu̱ majöni togogi. 27Nu'ahu̱ n'ehe ma gi da̱thwu̱ majöni ma'ra togogi, ngetho har ndu̱itho ndi 'bu̱hwihu̱.

will be added

X\