AR SANTIAGO 5

1'Yo̱hu̱pya, nu'ahu̱ gi pe̱'su̱ nze̱ye̱ ri ñhohu̱, nzoñhu̱ ne xa gi mahu̱, ngetho xa ma gi thohu̱ ar hyoya ne ar thuhu. 2Nuya ri ñhohu̱ xi 'yatho, ne xi zida ya zu'we nuya ri hehu̱. 3Nuya ri k'axt'i ne ri t'axbojöhu̱ xi zida ar ha̱i, gehyu̱ ma da da̱majöni gi njahu̱p'u̱. Nuya ri ñhohu̱ xka kwathu̱ nuya ngöxapayu̱, po̱ntho xka munsu̱ ya tsibi, ma gi ntsöt'ase̱hu̱. 4Nuya 'be̱fi xi 'yo̱t'a ri 'be̱gohu̱, ka̱xa Jö gi kahu̱ ne hingi juthwu̱. Ne yá mhafi xi 'yo̱ ar tsi Hmu togo xa pe̱'sa ar ts'e̱di. 5Xka 'bu̱hu̱wa har ximha̱i ngu xka nehu̱, ne xka 'yo̱thu̱ ngu xi ne ri mfenihu̱. Ne xa xka noju̱, po̱ntho ngu n'ar me̱ti xi t'e̱nt'i da tho. 6Xka hñu'su̱ ne xka hyohu̱ nunar tsi hogajö'i ñhe̱tho. 7Jange tsi kuhu̱, pe̱'su̱ ar ts'e̱ti, to̱'mhu̱ ar pa da 'ñep'u̱ ar tsi Hmu. Jangu ar wöhi to̱'mi da da̱ ar 'be̱t'o 'ye, wa nuna ta̱ m'e̱fa, ne da ndu̱i da mpot'i, ne ja da nxofo. 8Hö, pe̱'su̱ ar ts'e̱ti ne tse̱ta ri mu̱ihu̱, ngetho ar tsi Hmu 'ba̱p'u̱tho da ehe. 9Tsi kuhu̱, yo xa gi nga̱xtehu̱ te gatho gi ho̱xu̱ ri kuhu̱. Nu'mu̱ hin'ö, ma da t'e̱k'ahu̱ ri mfe̱ihu̱, ngetho nö'ö togo ma da hñöxa majöni, 'ba̱ ar 'ñu da ehe. 10Tsi kuhu̱, pe̱'su̱ ngu n'ar nt'uti gi te̱mfu̱ yá ts'e̱ti yá m'e̱hni ar tsi Hmu bi mömp'u̱ ár mhö. Te̱ñhu̱ hanja bi tho'u̱ ya dumu̱i. 11Nuju̱ di nuhu̱ nza̱tho nu'u̱ tho ya thogi. Xka 'yo̱hu̱ tengu mi pe̱'sa ar ts'e̱ti ar Hob, ne xka pöhu̱ tema ngöts'i bi umba ar tsi Hmu, ngetho xa döta ár nhwëki ne ár hogamu̱i. 12Ho̱nse̱ nö'ö xa di te̱t'ahu̱ tsi kuhu̱, hinte gi 'ñethu̱ made, ngu ar mhets'i wa ar ximha̱i. Nö'ö gi eñhu̱ hö, di njap'u̱, ha nö'ö gi eñhu̱ hin'ö, hin'ö. Yo ma da thus'a ri mfe̱ihu̱. 13Nu'mu̱ ja te tup'a ri mu̱ihu̱, 'ya̱fu̱ Jö. Ha nu'mu̱ gi johyahu̱, tuthwu̱ Jö. 14Ha nu'mu̱ gi hñeñhu̱, zoñhu̱ ya ndö har nijö da 'ya̱pa Jö gi thixu̱, ne da gos'ahu̱ ar nziki da e po̱ta ar tsi Hmu. 15Nu'mu̱ da t'a̱pa Jö ne di ñ'emu̱i, go gehnu̱ japi da dixa ar da̱thi, ne ar tsi Hmu da gu̱ts'i. Ha nu'mu̱ xi 'yo̱t'a n'ar ts'oki, da mpumbabi. 16Nda̱hu̱ ri ts'okihu̱ n'a ngu n'a, mhathwu̱ Jö n'a ngu n'a, ne da tsa̱ gi thixu̱. Nu ár hoga nt'a̱di n'ar hogajö'i, xa te gatho tsa̱ da 'yo̱t'e. 17Ar Elia mar ñ'o̱ho̱ mi tho ya ts'omfeni nguju̱ n'ehe. Ne bi zit'a ár mu̱i bi 'ya̱pa Jö hinge nda 'wöi, ne himbi 'wö xo̱ge ar ximha̱i hñu nje̱ye̱ ne 'rato nzönö. 18Bi mengi bi 'ya̱pa Jö, ne bi 'wöi man'agi, ha nunar ha̱i bi mengi bi unga ár sofo. 19Tsi kuhu̱, nu'mu̱ gi ko'su̱ n'ar ku xki 'be̱ ar 'ñu majöni, 20pöhu̱ nö'ö togo da japa n'ar ts'okte da zop'u̱ ár ts'o'ñu, ma da japi da k'ont'a ár pa ndi ma har 'be̱xui, ne xi mpunga nze̱ye̱ ya ts'oki.

will be added

X\