AR SANTIAGO 3

1Tsi kuhu̱, yo xa gi hoñhu̱ gi ñ'utatehu̱ nze̱ye̱'ihu̱, ngetho gi pöhu̱ ma da thobgagihu̱ nö'ö ar pa da thöxamajöni. 2Ngetho gatho di ts'okwabihu̱ Jö. Nu'mu̱ di 'bu̱ n'a hinte ts'okwa Jö nú'mu̱ ñö, nö'ö xa 'bu̱i xiñho, ne pe̱'sa ar ts'e̱di da zöma xo̱ge ár ndo'yo. 3Nuju̱ di tutwabihu̱ ya bo̱jö ha yá ne ya fani, ne da 'yo̱tkagihu̱. Njap'u̱ di e̱thu̱ gatho ár ndo'yo. 4Nuya motsa n'ehe, mödi nda döta ne di nto̱xkwi ya 'yomndöhi, t'e̱t'a tsixa n'ar tsi t'u̱lo nt'e̱, ne e̱t'a habu̱ da ne nu'u̱ e̱t'i. 5Njap'u̱ ma nehu̱ n'ehe, gehnu̱ n'ár tsi xe̱ni ma ndo'yohu̱, ne tsa̱ da 'yo̱t'a ya döta 'be̱fi. Hangu ár döta ar mboza tsa̱ da tso̱ n'ar tsi t'u̱lo tsibi. 6Ne numa nehu̱ gehnu̱ n'ar tsibi. Ja ñuxhnu̱ ya ts'oki jawa har ximha̱i. Nunar nenu̱ huxa ha ma ndo'yohu̱, xi ts'omba ár m'u̱i gatho nö'ö xi hyoka Jö. Gese̱ ár tsibi ar 'be̱xui tso̱ nunar tsibinu̱. 7Ngetho gatho ya zu'we ja har ximha̱i, ya ts'ints'u̱, ya k'eñö ne nuya zu'we ja har ñho̱nthe, xi tsa̱ xi zönda ar jö'i. 8Ha hinjo'o n'ar jö'i xi zönda ár ne. Ngu n'ar hñeni hingi tsa̱ da m'a̱'mi, xa ñuxa ar 'ñethi hote. 9Getnu̱ di nsundahu̱ Jö ar Dada, ne getnu̱ di tsañhu̱ ya jö'i di hñöxa Jö. 10N'adar ne habu̱ po̱nga ar nsunda ne ar nts'ani 'mu̱. Ma tsi kuhu̱, yo gi njahu̱p'u̱. 11Hage n'adar po̱the habu̱ po̱nga ar uthe ne ar júthe. 12Tsi kuhu̱, hage n'ár 'ba̱i ar iuxi tsa̱ da unga ya 'ro nju̱ka ar nziki, wa n'ár 'ba̱i ar obxi da unga ya iuxi. 13Nö'ö togo ja ri mfödihu̱ ne xiñho ár mfeni, ñ'uhu̱ ri hoga 'be̱fihu̱ da nheki gi pe̱'su̱ n'ar hogamu̱i, hingi ñ'exu̱. 14Ha nu'mu̱ gi gese̱hu̱, ne gi benthu̱ ar tuhni ha ri mu̱ihu̱, yo gi exa ri nsuhu̱ gi eñhu̱ gi pe̱'su̱ ar hoga mfödi, ne hingi njap'u̱. 15Ngetho nunar mfödinu̱ gi te̱ñhu̱, himbi pe̱hna Jö. Gehnu̱ ár me̱ti ar ximha̱i, xi bense̱ ya jö'i, ne go unga ar ts'ondöhi. 16Ngetho nu habu̱ ja ar gese̱ ne ya tuhni, nunu̱ hinte janu̱ ar hogam'u̱i, ho̱nse̱ nö'ö xi nts'otho. 17Ha nunar hoga mfödi di 'ñe mhets'i, m'e̱t'o xint'axi, hingi honga ar tuhni, di mönga ar hogamhö, ar hogajö'i. Di hwëka ma'ra, ne o̱t'a n'ar hoga 'be̱fi, hindi ñ'önt'u̱tho, gatho umba ár mu̱i o̱t'a xiñho. 18Ne nu'u̱ togo pe̱'sa ar hogamu̱i o̱t'a ar hoga 'be̱fi, ma da hñönga n'ar m'u̱i ter entho.

will be added

X\