AR SANTIAGO 2

1Ma tsi kuhu̱, dá nheki nuna ri ñ'emu̱ihu̱ gi pe̱'sfu̱ ma tsi Hmuhu̱ Hesukristo, yo gi hwanthu̱ togo gi zohu̱. 2Ngetho nu'mu̱ ha ri mhunts'ihu̱ da zo̱nga n'ar ku di hö ya k'axt'amfo'ye̱ ne ya hoga he, 'me̱fa da zo̱nga man'ar tsi hyoya ku di he 'ra ya tsi nju̱mfo, 3ne gi numañhohu̱ nuna hö ar nza̱tho he, ne gi 'ñembabihu̱: Hñuxnu̱ ha ya hoga nthuts'i. Ha gi 'ñembabihu̱ nunar tsi hyoya: 'Ba̱p'u̱tho. Nu'mu̱ gi ne gi hñudi, hñup'u̱ har ha̱i. 4Hage hingi hwanthu̱ njap'u̱ ya ku 'mu̱, ne gi te̱ñhu̱ ya mfeni hingi ho. 5Ma tsi hmöka kuhu̱, di ne gi 'yo̱xu̱ nö'ö ma ga xi'ahu̱: Hage hinxi hwahna Jö nuya hyoya jawa har ximha̱i da me̱'sa nze̱ye̱ ar jamfi, ne da yu̱t'a hár ts'u̱t'wi xi ñöt'wabi nu'u̱ togo mödi. 6Ha nu'ahu̱ xka hyomfu̱ ar hñö nö'ö ar tsi hyoya. Hage hingo nu'u̱ pe̱'sa yá m'e̱ts'i togo ja'ahu̱ gi thohu̱ ar ts'om'u̱i, ne gehyu̱ togo tsix'ahu̱ ma da 'ba̱p'ahu̱ ha ya ts'u̱t'wi. 7Ha hinga gehyu̱ togo tsamba ar hoga thuhu bi mhat'ahu̱ n'ehe. 8Nu'mu̱ xa majöni gi o̱thu̱ ngu enga ar 'be̱pate xa döta ár nsu, gi te̱ñhu̱ 'mu̱ ngu enga hár T'ofo Jö: Mö ri ñ'ohu̱ ngu gi mhöse̱. Njap'u̱ gi o̱thu̱ xiñho 'mu̱. 9Ha nu'mu̱ gi hwanthu̱ ri ñ'ohu̱, gi o̱thu̱ ar ts'oki, ne xka ts'ojwu̱ ar 'be̱pate, 'ñudi gar ts'oktehu̱. 10Nu'mu̱ n'a umba ár mu̱i da 'yo̱t'a gatho ngu mönga ha ya 'be̱pate, ne nu'mu̱ da ts'oka n'a xe̱nitho, da tho̱xa xo̱ge. 11Ngetho get'ö togo bi 'ñenö: Yo gi tsimba ár nthöti ma'ra, get'ö xi 'ñenö n'ehe: Yo gi ñhote. Ngetho nu'mu̱ hingi tsimba ár nthöti man'a, ha gi hote, njap'u̱ xka ts'okwa yá 'be̱pate Jö. 12Jange 'bu̱hu̱ ne gi ñöhu̱ ngu nu'u̱ ma da thö'spa majöni har 'ra'yo 'be̱pate xi hoga ma mu̱ihu̱. 13Har thöxamajöni hinda ma da m'e̱'spa ar nhwëki nu'u̱ togo himbi me̱'sa ar nhwëki. Ha nunar nhwëki töpa ár nsu ar thöxamajöni. 14Ma tsi kuhu̱, te da ma̱xa n'ar ku da 'ñenö pe̱'sa ar ñ'emu̱i ne hinte nheki yá hoga 'be̱fi. Hanja da tsa̱ da mpo̱ n'a nu'mu̱ ho̱nse̱ di mpe̱'sa ar ñ'emu̱i. 15Xi'mu̱ n'ar ku ar ñ'o̱ho̱ wa ar 'be̱hñö, hinte kö ár dutu, ne hinte pe̱'sa te da zi hyax'mu̱, 16ha nu'ahu̱ gi 'ñembabihu̱: Di möhu̱ ter entho, ñhexu̱ xiñho ne niñöhu̱, ne hingi umfu̱ tema honga ár ndo'yo, tema ñho gi umfu̱ 'mu̱. 17Njap'u̱ ar ñ'emu̱i n'ehe, nu'mu̱ hingi pe̱wi ya hoga 'be̱fi, hinter me̱'ö. 18Tsa̱ da 'ñenga n'a: Nu'ge gi pe̱'sa ar ñ'emu̱i, ha nuga di pe̱'sa ya hoga 'be̱fi. Utka ri ñ'emu̱i hinte pe̱wi ya hoga 'be̱fi, ne nuga ga ut'a ma ñ'emu̱i di pe̱wi ya hoga 'be̱fi. 19Gi jamfi n'ada Jö 'bu̱i. Xiñho'ö. Njap'u̱ nuya ts'ondöhi jamfi n'ehe, ne xa nhwöt'i ntsu. 20Xa xka 'be̱ ri mfeni. Ham'u̱ ma gi pödi, nunar ñ'emu̱i, nu'mu̱ hingi pe̱wi ar hoga 'be̱fi, hinter me̱'ö. 21Ma palehu̱ ar Abra bi nhu hinte ma ts'oki mi tu, ngetho bi 'yo̱t'a ar hoga 'be̱fi nú'mu̱ mi da̱twa Jö ar Isa ár t'u̱, ngu n'ar m'o̱ñho̱. 22Ha hingi handi, ar ñ'emu̱i bi mpe̱fi mahye̱giwi ya hoga 'be̱fi, ne bi japi bi nxo̱ge nú'mu̱ mi t'o̱t'a ya hoga 'be̱fi. 23Njap'u̱ bi thogi ngu enga hár T'ofo Jö habu̱ enö: Ar Abra bi ñ'emu̱i Jö ne bi nhu hinte ma ts'oki mi tu, ne bi nsipabi ár ñ'owi Jö. 24Hyanthu̱ 'mu̱, nuya jö'i numañho Jö ngetho o̱t'a ya hoga 'be̱fi, hinge ho̱nse̱ thandwa ár ñ'emu̱i. 25Njap'u̱ ar Rahab mar ts'o'be̱hñö, bi nhu hinte ma ts'oki mi tu, ngetho bi umba ar tsa̱ya̱ yá m'e̱hni, ne bi ko'sa ha man'ar 'ñu. 26Ngetho jangu ar ndo'yo, nu'mu̱ k'at'wabi ar hñö xi du, njap'u̱tho ar ñ'emu̱i n'ehe, nu'mu̱ hingi pe̱wi ya hoga 'be̱fi hinter me̱'ö.

will be added

X\