AR SANTIAGO 1

1Dar Santiago, ár 'be̱gogi Jö ne ar tsi Hmu Hesukristo, di ze̱ngwa'ihu̱ gatho nu'ahu̱ yá 'be̱to'ihu̱ nu'u̱ 're̱t'amayoho yá t'u̱ ar Israel ha gatho ya ha̱i xka mfonthu̱. 2Ma tsi kuhu̱, njohyahu̱ nú'mu̱ gi thohu̱ tsa̱nt'ö ya thogi. 3Gi pöhu̱ nu'mu̱ nts'a̱t'ahu̱ ri ñ'emu̱ihu̱, ma da hñuxa ri ts'e̱tihu̱. 4Umba ri mu̱ihu̱ da nheki ri ts'e̱tihu̱ ha nö'ö gi pe̱hu̱, ne gi ñöxu̱ xiñho, hinte gi k'athu̱. 5Nu'mu̱ n'a'ahu̱ gi k'athu̱ ar mfödi, 'ya̱fu̱ Jö ne da 'ra'ahu̱, ngetho nö'ö xa unga nze̱ye̱ ne hingi ñös'ahu̱. 6Ñ'emu̱ihu̱ gi 'ya̱fu̱, hingi yomihu̱. Ngetho nö'ö togo yomi, ñhe̱hwi nuyá mpu̱nts'i ar döñho̱nthe xa tuxta ar ndöhi, mawa di manu̱. 7Nu'u̱ togo njap'u̱, yo di benga ja tema da umba ar tsi Hmu. 8Nö'ö togo yót'a ár mfeni, hingi 'yo n'adar 'ñu. 9Nunar tsi ku hyoya, dá njohya xi numansu Jö. 10Ha nö'ö togo pe̱'sa yá m'e̱ts'i, dá njohya xi hyo̱ma ha̱i Jö, ngetho nö'ö ngu ár ndo̱ni n'ar do̱ni, ma da thotho. 11Ngetho nu xta bo̱xa ar hyadi ne da pat'i, ar do̱ni da 'yot'i, da da̱ ár ndo̱ni ne da m'e̱ta ár nza̱tho. Njap'u̱tho nö'ö togo the̱ ya ñho, da m'e̱ta madeda yá m'e̱ts'i. 12Nza̱tho nunar ñ'o̱ho̱ da tho xiñho nú'mu̱ ts'a̱ti. Ngetho nu xta tho nunar ts'a̱tinu̱, ma da hñönga ar te ngu ar nthöhö xi ñöt'wa Jö gatho nu'u̱ togo mödi. 13Nu'mu̱ n'a ts'a̱ti da 'yo̱t'a nö'ö hingi ho, yo ma da 'ñenö go tsa̱ta Jö, ngetho Jö hingi tsa̱ da ts'a̱ti da 'yo̱t'a nö'ö hingi ho, ne hinto tsa̱t'ö. 14N'a ngu n'a ts'a̱ti nú'mu̱ hár mfenise̱ tsits'i da 'yo̱t'a nö'ö ne ár ndo'yo. 15Nunar mfeninu̱, ngu n'ar 'be̱hñö ñ'u̱, da 'rogi ar ts'oki, ne xta 'yo̱t'e, da 'yo̱nga ar ndöte. 16Ma tsi hmöka kuhu̱, yo gi 'be̱hu̱ ar 'ñu. 17Gatho ya hogant'uni xa xiñho, bi e mhets'i, bi pe̱hna ar Dada togo ár me̱ti ar ñot'i. Nö'ö hingi mponi, ne hingi pa̱ta ár mfeni, ngu mponga ar xudi. 18Go bi ne'ö bi jaju̱ da ntehu̱ man'agi har mhö majöni da o̱xu̱, ne da nugagihu̱ ngu ar 'be̱t'o sofo ma da nju̱xa m'e̱fa. 19Jange tsi kuhu̱, xoju̱ xiñho ri guhu̱ gi 'yo̱hu̱, hinge dama gi thöhu̱, ne hingi mbo̱ ri kwe̱hu̱ ngut'a. 20Ngetho nö'ö togo mbo̱ ár kwe̱, hingi pe̱ nö'ö ne Jö da me̱fi. 21Jange hye̱hu̱p'u̱ gatho nö'ö hingi ho ne gatho nuya ts'omfeni. Pe̱'su̱ n'ar hogamu̱i gi hñöñhu̱ ar hoga mhö xi t'ut'ahu̱. Nunar mhönu̱ tsa̱ da po̱'ahu̱. 22Ne gi 'yo̱thu̱ nö'ö mönga ar hoga mhö, hinge ho̱nse̱ gi 'yo̱xthu̱. Nu'mu̱ hingi 'yo̱thu̱, gi nts'okse̱hu̱. 23Ngetho nu'mu̱ n'a da 'yo̱xa ar mhö, ne hinda 'yo̱'te, ñhe̱hwi n'a handase̱ ár hmi har ñhe. 24Nö'ö xi wadi xi hyanda ár hmi ne bi ma, m'e̱fa bi pumhni tengu ár hmi. 25Ha nö'ö togo huxa ár da̱ har 'be̱pate xi hoga ma mu̱ihu̱, hingar döni, umba ár mu̱i te̱ni da 'yo̱t'a nö'ö mö, ne njap'u̱ nza̱tho gatho nö'ö o̱t'e. 26Nu'mu̱ n'a enö xa honga Jö, ne hingi tsa̱ da got'a ár ne, nts'okse̱, ne gatho nór 'be̱fi honga Jö, hinter m'e̱p'u̱'ö. 27Nunar thongajö xint'axi ne hinte pe̱'sa ya ja̱xt'i hár nthandi Jö ar Dada, gehnu̱ ma ga xi'ahu̱: Tso̱ñhu̱ ya tsi hyoyabötsi ne ya 'ranxu tho ar k'at'i, ne gi ntsuñhu̱ hinda ja̱xt'a ri m'u̱ihu̱ gi me̱wihu̱ ar ximha̱i.

will be added

X\