AR EBREO 9

1Ha nunar 'be̱t'o nkohi, Jö xki xipabi ya jö'i hanja nda ndömbabi har nijö mi 'bu̱kwa har ximha̱i. 2Ne nunar nijö mi njanu̱: Har ñu̱t'i habu̱ mi t'embabi Mar Nsunda, ka mi 'bu̱hnu̱ ar mfox'yo, ar mexa ne ya thuhme mi t'e'spabi Jö. 3Ne mo̱te ár ñoho ar döta dutu, mi juta nö'ö man'ár xe̱ni ar nijö mar thuhu Xa Ar Nsunda. 4Ka mi 'bu̱hnu̱ n'ar nt'uts'i xki thoka ar k'axt'abo̱jö, ne ar k'axt'a 'bezankohi habu̱ 'be̱'sa n'ar k'axt'at'e̱ni, mi kö ar ñhuni ba e mhets'i, ár t'o ar Aron bi 'rogi, ne ya nxindo nkohi. 5Ne mañö ar 'bezankohi, ka xki thuxnu̱ ya dö'e̱nxe̱ mi ñ'u ár nsunda Jö, mi ko'ma ar k'axt'axithe̱, habu̱ mi nhöxa ar ji mi punga ya ts'oki. Nuyu̱ hinga ma ga ot'ahu̱ xiñho ar 'ñupya. 6Nu xki wadi xki thoka gatho, nu hár ñu̱t'itho ar nijö, hyax'mu̱ mi ku̱t'a ya möjö mi o̱t'a yá 'be̱fi mi ndöngajö. 7Nu hár ñoxe̱ni ar nijö, ho̱nse̱ ar döngamöjö mi ku̱t'i ne n'agitho ar je̱ye̱. Himi tsa̱ nda yu̱t'i nu'mu̱ hinte mi hömpa ár ji ya me̱ti nda unga ngu ar m'o̱ñho̱. Njap'u̱ nda mpumbabi m'e̱t'o yá ts'oki'ö, ne m'e̱fa yá ts'oki gatho nu ma'ra. 8Ne ár Hñö Jö utkagihu̱ njap'u̱, hinxki t'unda ar se̱ki to gatho nda yu̱t'a habu̱ t'embabi Xa Ar Nsunda, nú'mu̱ hár ñu̱t'i ar nijö hinxki 'be̱ta ár nsu. 9Nunu̱ ngu ár xuditho nö'ö di thohu̱pya. Nuya m'o̱ñho̱ ne ya ñhöt'i mi m'o̱'spa Jö mam'e̱t'o, hinto bi hyokwa yá m'u̱i nu'u̱ mi o̱t'a njap'u̱. 10Nu'mu̱ nuya 'be̱t'o mhö xki m'e̱pabi, ho̱nse̱ nda mo̱xa ya ñhuni, te nda ts'i, ne ya nsu̱ki mpe̱ hár ndo'yo ya jö'i, mi tho̱'mi nda zo̱nga ar pa nda mponga xo̱ge. 11Ha nupya xi zo̱kwa ar tsi Hmu Hesukristo, ár döngamöjö nuya ñho ba ep'u̱. Bi yu̱t'a har dönga nijö töta ár nsu, hinxi hyoka n'ar jö'i, himbi thoka mahye̱giwi ar ximha̱i. 12Ne bi yu̱t'a n'agitho har xe̱ni Xa Ar Nsunda, ne hiñham'u̱ da yu̱t'a man'agi. Himbi hñö'spa ár ji ya t'öxi wa yá ji ya boi, nunár jise̱ bi gut'a n'agitho ya tha̱i ndi tuhu̱. 13Ngetho nu'mu̱ nda nhö'spa ar jö'i yá ji ya t'öxi, yá ji ya boi ne ár 'bospi ya kero, ne nda nsu̱ki nda nt'axka ár te, 14tema hinda tsa̱ da 'yo̱t'a ár ji ar tsi Hmu Hesukristo, bi da̱twa Jö hinte xki ja̱xt'i. Bi ma̱xa ár Hñö Jö 'bu̱ gatho ya pa, bi unga ár te. Ha nunár jinu̱ da xu̱k'a ri mfenihu̱, gi hye̱hu̱p'u̱ nuya 'be̱fi hinte unga ar te, ne gi pe̱fu̱ Jö togo hö ar te. 15Jange bi 'ñu ar 'ra'yo nkohi. Ne nú'mu̱ mi unga ár te, bi mpumbabi yá ts'oki xki 'yo̱t'a mam'e̱t'o nu'u̱ mi 'bu̱ har 'be̱t'o nkohi. Ne njap'u̱ nuya xki thahni bi t'umba ya ñho xki ñhöt'i hiñham'u̱ da göts'i. 16Ngetho habu̱ ja n'ar he̱'mi nkohi, mahyoni m'e̱t'o da du togo tso yá ñho. 17Nunar nkohinu̱ da ndu̱i da me̱'sa ár ts'e̱di xta du nö'ö togo tso yá ñho. Ngetho nu'mu̱ tetho, hinto tsa̱ da hñöni. 18Nu har 'be̱t'o nkohi n'ehe, hinge nda tsa̱ nda me̱'sa ár ts'e̱di nu'mu̱ hinge nda nhö'ma ar ji. 19Ngetho ar Moise nu mi wadi bi xipa ya jö'i xo̱ge ya 'be̱pate, bi gu̱mpa ár ji ya boi ne ár ji ya t'öxi, bi thönsa ar dehe. Ne bi gu̱ ar the̱ngaxi'yo ne ya do̱ni, bi nöxa ha ya t'ofo mi huxa ya 'be̱pate, ne bi nöxa gatho ya jö'i n'ehe. 20Ne bi 'ñenö: Gehnu̱ ar ji umba ár ts'e̱di ar nkohi xi 'be̱p'ahu̱ Jö gi 'yo̱thu̱. 21Hinge ho̱nse̱yu̱, bi nöxya ji ar nijö n'ehe, ne gatho ya nt'e̱ni mpe̱ hár 'be̱fi Jö. 22Ha ya 'be̱pate, tx'u̱tho 'be̱di da japa da t'axka xo̱ge har ji nhö'mi, ne nu'mu̱ hinda nhö'ma ar ji, hiñ'otho ár mpumbate ya ts'oki. 23Njap'u̱ 'mu̱ nuya te jawa har ximha̱i, ñhe̱hwi nuya te janu̱ mhets'i, mi mahyoni nda nsu̱ka ha yá ji ya me̱ti. Ha nu'u̱ gese̱ bi ja mhets'i, mahyoni man'ar m'o̱ñho̱ di töte ár ñho. 24Ngetho ar tsi Hmu Hesukristo himbi yu̱t'a ha n'ar nijö xi hyoka ar meximha̱i, ñhe̱hwi nö'ö majöni bi 'bu̱ mhets'i. Gese̱'ö bi yu̱tnu̱ har nijö mhets'i nda po̱kagihu̱ hár nthandi Jö. 25Ne hinge xa ku̱t'a ngu nu ma'ra ya döngamöjö, ta̱t'a je̱ye̱ mi ku̱t'a har xe̱ni Xa Ar Nsunda nda mo̱xa ar ji hingo már me̱tise̱. 26Nu'mu̱ di njap'u̱, hangu ya mpengi xi dumhö nu'mu̱ ga pehu̱ hár ndu̱itho ar ximha̱i. Ne ha ya ngöxapayu̱, bi ñ'udi bi unse̱ ár te n'agitho, ne hinda mengi da 'yo̱t'a man'agi, ne njap'u̱ bi hñöka ar ts'oki. 27Ne ngu xi thu'spabi ya jö'i, ho̱nse̱ n'agi da duyu̱, ne da thö'spa majöni, 28njap'u̱ ar tsi Hmu Hesukristo n'ehe, n'agitho bi unga ár te, ne njap'u̱ bi hñö'spa yá ts'oki nze̱ye̱. Ne ma da ñ'udi ár yo'gi man'agi, da po̱ho̱ gatho nu'u̱ ndo̱'mi, hinte di benga ar ts'oki.

will be added

X\