AR EBREO 6

1Jange ga umba ma mu̱ihu̱ ga hoñhu̱ da ñöxa ma ñ'emu̱ihu̱. Hinga ñhogamu̱ihu̱tho nunár nt'uti ar tsi Hmu Hesukristo ndi pöhu̱ nda ndu̱hu̱ da ñ'emu̱ihu̱. Hinga penju̱ ga huxa ma mfenihu̱ nuya nt'uti da pöhu̱ m'e̱t'o. Nö'ö ga pe̱hu̱, ga he̱hu̱ di thö'thu̱ ga o̱thwu̱ ár ntso̱'mi, wa ga tho̱hu̱p'u̱ ya 'be̱fi tsixju̱ har ndöte, ga tho̱hu̱ di no̱ñhu̱ ar mpo̱ho̱ bi e har ñ'emu̱i Jö. 2Ne nuya nt'utiyu̱, ar xixthe, ar thu'spa ár 'ye̱ man'a, ár menga nte nu'u̱ xi du, ne ar pa da thöxamajöni habu̱ da t'umba nö'ö di 'ñepi hiñham'u̱ da göts'i. 3Gehnu̱ ma ga o̱thu̱ nu'mu̱ da ma̱xkagihu̱ Jö. 4Ngetho n'a togo xi m'u̱ har hyats'i, ne xi za̱ ar nt'uni di 'ñe mhets'i, ne xi me̱'spa ár Hñö Jö, 5xi za̱pa ár hoga mhö Jö ne ár ts'e̱di nuna te xi 'ñep'u̱, 6nu'mu̱ da da̱gi, hinda tsa̱ da njapabi da 'yo̱t'wa ár ntso̱'mi man'agi. Ngetho po̱ntho pengi tsu̱t'wa ár T'u̱ Jö har pont'i, 'be̱twa ár tsa̱ njap'u̱ hár nthandi gatho ya jö'i. 7Jangu n'ar ha̱i hingi tsa̱ya̱ hönga ar 'ye, ne umba ya hoga do̱ni nu'u̱ togo wöhi, hömba ár njöpi Jö. 8Ha nunar ha̱i unga ya 'mini hingi nhe'ö, tx'u̱tho 'be̱di da ts'ani, ne m'e̱fa da ts'öt'i. 9Di xi'ahe njanu̱ tsi kuhu̱, ha di ka̱xmbenihe gi to̱'mhu̱ ya ñho di ehwi ar mpo̱ho̱. 10Ngetho Jö pe̱'sa n'ar hogamu̱i, ne hinda ma da pumhni ri 'be̱fihu̱, ne nö'ö ar ñho xka 'yo̱thwu̱ ya gamfi, ne hinxka hye̱hu̱ gi o̱thu̱, njap'u̱ gi ñ'uhu̱ gi pe̱'sfu̱ ár mhöte Jö. 11Nuje di nemhöhe, n'a ngu n'a xa gi umba ri mu̱ihu̱ gi 'yo̱thu̱ njap'u̱ gatho ri tehu̱, ne hinda k'at'a ri ndo̱'mhu̱. 12Hindi nehe gi ndöhñehu̱. Nö'ö gi 'yo̱thu̱, te̱mfu̱ yá m'u̱i nu'u̱ pe̱'sa ar jamfi ne ar ts'e̱ti hönga ya ñhöt'i. 13Nú'mu̱ Jö bi umba ar ñhöt'i ar Abra, ngetho himi otho man'a togo di döta nda 'ñet'a made, bi 'ñet'ase̱ made ár thuhu. 14Bi 'ñenö: Majöni xa ma ga jöp'a'i ne ga ja'i gi nxöndi. 15Ne ar Abra bi me̱'sa ar ts'e̱ti bi do̱'mi, jange bi hñönga ar ñhöt'i. 16Majöni ya ñ'o̱ho̱ et'a made n'a di töte ar döta, ne o̱t'a njap'u̱ hindi njo'o togo da 'ñembi hingi njap'u̱ teme mö. Jange nu'u̱ te et'a made, enga njap'u̱ nö'ö mö. 17Jö mi ne nda 'yot'wa ár 'ñu xiñho nu'u̱ togo ma nda gohwi ár me̱ti'ö, ngetho hingi pa̱ta ár ne te xi mö, jange bi 'ñet'a made ár thuhuse̱. 18Jö bi zoju̱ ár ñhöt'i ne ár nt'et'amade. Nuya yohoyu̱ hingi tsa̱ da mpa̱ti, ne Jö hingi tsa̱ da mönga n'ar nhemhñö. Njap'u̱ xa hñubgagihu̱ ma mu̱ihu̱ ga to̱'mhu̱ nö'ö xi 'bo̱skagihu̱ núya xta ehu̱ ga kwathu̱ hár ndo̱'mi. 19Numa ndo̱'mihu̱ to̱ska ma pahu̱, ñhe̱hwi ngu n'ar bo̱jö xiñhu̱ to̱'sa n'ar motsa. Nunar ndo̱'minu̱ foxa mbo mo̱te ar xu̱nidutu habu̱ 'bu̱ ár nsunda Jö. 20Gehnu̱ habu̱ bi yu̱t'a m'e̱t'o ar tsi Hmu Hesukristo, m'e̱fa nga te̱ñhu̱ n'ehe. Njap'u̱ bi t'ets'i ngu ar döngamöjö hiñham'u̱ da göts'i, ngu ar nsu bi me̱'sa ar Melkisedek.

will be added

X\