AR EBREO 5

1N'ar döngamöjö xi thahna ha ya jö'i, xi t'ets'i da po̱ta da m'a̱ hár nthandi Jö, ne da unga ya m'o̱ñho̱, ne njap'u̱ da mpumba yá ts'oki ya jö'i. 2Nö'ö tsa̱ da me̱'spa ar ts'e̱ti nu'u̱ xi m'e̱di ne hinte pödi, ngetho gese̱'ö tsa̱ da hya̱t'a ár mfeni ne da 'yo̱t'a ar ts'oki n'ehe. 3Jange nú'mu̱ po̱xa ar m'o̱ñho̱, o̱t'a njap'u̱ honi da mpumba ma'ra, ne da mpumbase̱ yá ts'oki n'ehe. 4Hinga gatho tsa̱ da gu̱se̱ nunar 'be̱finu̱ xa pe̱'sa ar nsu, ho̱nse̱ nu'mu̱ da zohna Jö ngu bi zohna ar Aron. 5Njap'u̱ ar tsi Hmu Hesukristo himbi ñ'exase̱ ngu ar döngamöjö. Bi hñuxa togo bi mönga njawa: Go ma T'u̱'i, ha nupya di ñ'udi go ri Dadagi. 6Ne ngu enga man'a xe̱ni n'ehe: Nu'ge gar döngamöjö hiñham'u̱ da göts'i, ngu bi t'exa ar Melkisedek. 7Ar tsi Hmu Hesukristo nú'mu̱ ba ekwa bi njö'i, xa mi umba ár mu̱i mi zoni, mi a̱pa nö'ö togo mi pe̱'sa ar ts'e̱di nda ñönga har ndöte. Ne bi t'umbabi nö'ö mi a̱di, ngetho mi pe̱'sa ar ntsu ne mi e'spa ár nsu togo bi ma̱ts'i. 8Mödi mar t'u̱mhö, nuya u̱gi bi thogi bi uti hanja nda 'yo̱de. 9Ne njap'u̱ bi ñ'u ár ts'e̱di da umba n'ar mpo̱ho̱ hiñham'u̱ da göxa gatho nu'u̱ togo da 'yo̱te. 10Ne Jö bi hñuxa ngu ar döngamöjö, ngu ar nsu mi pe̱'sa ar Melkisedek. 11Ja nze̱ye̱ te ga möñhu̱ nunar mhönu̱ xta no̱ñhu̱, mödi hingi tsa̱ ga ut'ahu̱ xo̱ge, ngetho xka kot'a ri mu̱ihu̱ hingi ne gi pöhu̱ nö'ö t'ut'ahu̱. 12Ngetho nze̱ye̱ nuya je̱ye̱ xi thogi, xi za̱mhö gi uthu̱ ma'ra. Ha gi hoñhu̱tho da t'ut'ahu̱ nunár ndu̱i ár mhö ar tsi Hmu, ngu n'ar le̱le̱ ne da t'umbatho ar 'ba, hinge ar ñhuni. 13Ne gatho nu'u̱ ngu ya le̱le̱ tsu̱tho, hingi pötho tema xiñho ne tema hingi ho. 14Ha nu'u̱ togo xi ñöts'i, xi bötwabi ar ñhuni, xi xo yá mfeni, ne pödi ndana xiñho ne ndana hingi ho.

will be added

X\