AR EBREO 3

1Jange tsi kuhu̱, xi t'axk'a'ihu̱ ri m'u̱ihu̱ ne xi ts'oñ'ahu̱ ma gi 'bu̱hu̱ mhets'i, beñhu̱ ar tsi Hmu Hesukristo, ár mpo̱te Jö ne ar döngamöjö togo tsiska ma jamfihu̱. 2Nunu̱, o̱t'a xiñho ngu xi xipabi nö'ö togo xi 'ñets'i, ngu bi 'yo̱t'a ar Moise n'ehe hár nijö Jö. 3Mahyoni di töte ar nsu di t'umba ar tsi Hmu Hesu, m'e̱fa ar Moise. Ngu di töte ar nsu di t'umba n'a di hoka ar ngu, ne m'e̱fa ar nguse̱. 4Ngetho ja togo hoka n'ar ngu, ha Jö bi hyoka gatho. 5Majöni ar Moise bi 'yo̱t'a gatho nö'ö xki xipa Jö nda 'yo̱t'a hár nijö, ngu ár 'be̱go. Gehnu̱ bi da̱majöni nö'ö ma nda mhönga m'e̱fa. 6Ha nunar tsi Hmu Hesukristo, ngu n'ar t'u̱ su xiñho ar ngu. Ne nuju̱ go dar nguhu̱ nu'mu̱ hinga he̱hu̱ ar ndo̱'mi, ne ga tse̱thu̱ ma jamfihu̱ ga to̱'mhu̱ da göxa xo̱ge. 7Jange ngu enga ár Hñö Jö: Nu'mu̱ ar pania gi 'yo̱'sfu̱ ár mhö Jö, 8yo gi kothu̱ ri mu̱ihu̱ ngu bi 'yo̱t'a ri palehu̱ nunar pa bi tso̱t'wa ár mu̱i Jö, ba tsa̱tnu̱ har ot'at'o̱ho̱. 9Ka gehnu̱ ri palehu̱ bi tsa̱tkagi ne bi hyomgagi'u̱. Yon'a̱te nje̱ye̱ bi hyandga ma döta nt'udi ndi o̱t'wabi'u̱. 10Jange bi po̱nka ma kwe̱ gatho nuya jö'i mi 'bu̱ nuya pa'u̱. Ne da ense̱ga: Hingi tsa̱ya̱ te gatho benda ha yá mu̱i, ne hinxi bötka ma 'ñu. 11Ngetho xki mbo̱ ma kwe̱, da et'ase̱ made ma te, hinda ma da yu̱t'a har tsa̱ya̱ di uni. 12Tsi kuhu̱, hyanthu̱ hinte di 'bu̱p'u̱ n'a di pe̱'sa n'ar ts'omu̱i hingi ne da ñ'emu̱i, ne da 'we hár 'ñu Jö togo hö ar te. 13Nö'ö gi 'yo̱thu̱, hñu'mba ár mu̱i ri kuhu̱ n'a ngu n'a hyax'mu̱, núpya tsa̱ ga eñhu̱ di 'bu̱hu̱ ar pania. Hingi hye̱hu̱ da me ri mu̱ihu̱ gi o̱xu̱ yá nhemhñö ar ts'oki. 14Ngetho nu'mu̱ xi t'akagihu̱ ar se̱ki ga 'bu̱hwihu̱ ar tsi Hmu Hesukristo, da njap'u̱ nu'mu̱ ho̱nse̱ hinga he̱hu̱ nunar ñ'emu̱i da pe̱'su̱ hár ndu̱i. 15Núpya tsa̱ gi 'yo̱hu̱ da t'enö: Nu'mu̱ ar pania gi 'yo̱'sfu̱ ár mhö Jö, yo gi kot'a ri mu̱ihu̱, ngu bi 'yo̱t'a ri palehu̱ nunar pa bi ntso̱t'wa ár mu̱i Jö. 16Togo'u̱ bi 'yo̱twa ár mhö Jö ne bi tso̱t'wa ár mu̱i. Hage hinge nu'u̱ ba ju̱ka ar Moise har ha̱i Ehipto. 17Togo xi tso̱t'wa ár mu̱i yon'a̱te nje̱ye̱. Hage hinge nu'u̱ togo bi 'yo̱t'a ya ts'oki, ne bi go yá ndo'yo ha ya ot'at'o̱ho̱. 18Ne togo bi 'ñet'ase̱ made ár te, bi 'ñembabi'u̱ hinge nda hñönga ar tsa̱ya̱ uñ'ö. Hage himbi xipabi njap'u̱ nu'u̱ togo himbi 'yo̱te. 19Ne da nuhu̱ himbi yu̱t'u̱, ngetho himbi ñ'emu̱i.

will be added

X\