AR EBREO 2

1Jange xa ma ga umba ma mu̱ihu̱ ga o̱thu̱ nö'ö xta o̱hu̱, ne hinga m'e̱hu̱. 2Ngetho nunar mhö bi mönga ya e̱nxe̱ bi me̱'sa ár ts'e̱di, ne nu'u̱ togo himbi ne bi 'yo̱te, bi hñönga ár mfe̱i. 3Hinda tsa̱ ga k'onthu̱ 'mu̱, nu'mu̱ hinga suhu̱ nunar döta mpo̱ho̱ xi t'akagihu̱. Gese̱ ar tsi Hmu togo bi xikagihu̱, ne m'e̱fa bi da̱majöni nu'u̱ togo bi 'yo̱de. 4Ne gese̱ Jö mi da̱majöni mi ñ'u ya döta nt'udi, ya 'be̱fi hingi tsa̱ da 'yo̱t'ase̱ ar jö'i, ne bi hyemba ár Hñö Jö ngu bi ne'ö. 5Jö himbi da̱twa ha yá 'ye̱ ya e̱nxe̱ nunar te xi 'ñep'u̱ ne di no̱ñhu̱pya. 6'Bu̱i togo bi da̱majöni habu̱ enö njawa: Teme ar ñ'o̱ho̱ xa gi beni, wa ar jö'i xa gi honi. 7Tx'u̱tho bi 'be̱di xka hye̱kwa ya e̱nxe̱. Xa ga umba ar nsunda ne ga hñu'spa ár nsu, ne ga 'ye̱nt'wa hár 'ye̱ gatho nö'ö xi hyoka ri 'ye̱. 8Gatho ga po̱kwa ha yá wa. 9Ha nupya xta hanthu̱ ar Hesu, nö'ö togo 'ra ya tsi pa bi thuxa ha̱i ya e̱nxe̱, xi t'umbabi ar nsunda ne ar nsu, ngetho bi tho ar u̱gi nú'mu̱ mi thökwabi ár te. Njap'u̱ xki benga Jö ar Dada nda unga ár te ne nda hwëgagihu̱ ar mpo̱ho̱. 10Gatho te jawa ne janu̱ mhets'i, go bi hyok'ö ne go o hár 'ye̱'ö. Bi beñ'ö nda zixa nze̱ye̱ yá bötsi hár nsunda, jange bi japi bi tho ya u̱gi ár T'u̱, ne njap'u̱ bi hyokwa ár m'u̱i yá Po̱ho̱te'u̱. 11Ngetho nu'u̱ togo xi nt'axkwabi yá te ne nö'ö togo t'axkwabi, n'atho togo yá me̱ti. Jange hingi ntsa̱ embabi gehyu̱ yá ku. 12Ne enö njawa: Ma ga xipabi ri mhö ma ku, Madeda ar mhunts'i ga tut'a ya thuhu. 13Ne man'agi enö: Nuga ga ñ'emu̱ibi'ö. Ne enö n'ehe: Di 'bu̱'bewa nuya bötsi bi 'raka Jö. 14Ngetho nuya bötsi pe̱'sa ha yá ndo'yo ar ji ne ar ngo̱, nö'ö n'ehe bi m'u̱i njap'u̱. Ne nú'mu̱ mi du, bi hwata togo hö ar ndöte, gehnu̱ ar ts'ondöhi. 15Ne njap'u̱ bi umba ar hogam'u̱i nu'u̱ togo mi 'bu̱i mi pe̱pa ar ndöte ngetho mi tsu'u̱. 16Nunu̱ himba ehe bi ma̱xa ya e̱nxe̱, ba ehe bi ma̱xa yá 'be̱to ar Abra. 17Jange mi mahyoni nda ñhe̱hwi nuyá ku. Ne bi ndöngamöjö xa pe̱'sa ar nhwëki, ne o̱t'a gatho nö'ö di 'ñepi hár 'be̱fi Jö. Ne bi unse̱ ár te ngu n'ar m'o̱ñho̱ da gut'wa yá ts'oki ya meximha̱i. 18Ngetho gese̱'ö bi tho ar ts'a̱ti, jange pe̱'sa ar ts'e̱di da ma̱xa nu'u̱ togo ts'a̱ti.

will be added

X\