AR EBREO 13

1Yo ma gi hye̱hu̱ da the ar mhöte di pe̱'su̱ n'a ngu n'a nuya di nkuhu̱. 2Yo ma gi hye̱hu̱ gi umfu̱ ar tsa̱ya̱ ma'ra ha ri nguhu̱. Ngetho 'ra mödi hinxi bödi, xi umba ar tsa̱ya̱ ya e̱nxe̱ ha yá ngu. 3Beñhu̱ ya 'yofa̱di, hu ri mu̱ihu̱ wande gi owihu̱ mahye̱gi har fa̱di. Yo gi pumhnihu̱ nu'u̱ xi mfe̱i, ngetho gi pe̱'sase̱hu̱ ri ndo'yohu̱ n'ehe. 4Tsuñhu̱ ar nthöti ne suhu̱ dar nt'axi. Ha nu'u̱ 'be̱ngwi nu'u̱ hinxi nthötwi ne nu'u̱ ka yá nthöti, Jö ma da hñö'spa majöni. 5Nzöñhu̱ hingi hyo̱ju̱ ar bojö, ñhogamu̱ihu̱ nö'ö gi pe̱'su̱. Ngetho Jö bi 'ñenö: Hinga he̱k'a'i, hinga pumhni'i. 6Jange hinga tu ma mu̱ihu̱ ga eñhu̱: Ar tsi Hmu go fa̱xkagi, hinga ntsu. Te da jakaga ar jö'i. 7Beñhu̱ ri ma̱'yohu̱ togo bi xi'ahu̱ ár mhö Jö. Hyanthu̱ tengu bi njöpabi yá m'u̱i, ne te̱mfu̱ yá jamfi. 8Ar tsi Hmu Hesukristo get'ö ngu maham'u̱, ar pania, ne hiñham'u̱ da mponi. 9Yo ma gi ñhe̱hu̱ da ka'ahu̱ ma'ra ya nt'uti hingi o yá 'ñu. Ngetho xiñho gi ze̱ta ri jamfihu̱ hár nhwëki ar tsi Hmu, hinge ha ya ñhuni. Nuyu̱ hinte bi ma̱xa nu'u̱ togo mi jap'u̱. 10Di pe̱'su̱ n'ar m'o̱xm'o̱ñho̱ habu̱ nuya möjö mi mpe̱ hár nijö Jö mi 'bu̱ maham'u̱, hingi tsa̱ da hñöka ar m'o̱ñho̱ da zi. 11Nunar döngamöjö mi ku̱t'a har nijö ár ji ya me̱ti nda t'unga ngu ar m'o̱ñho̱, ne nda thökwa yá ts'oki ya jö'i. Ne nuyá ndo'yo nuya me̱tiyu̱ nda ts'öt'a yap'u̱ habu̱ hinto mi 'bu̱i. 12Jange ar tsi Hmu Hesukristo n'ehe, bi tho nthi har hnini, ne njap'u̱ nunár jise̱ bi nö'mi, da hñökwa yá ts'oki ya jö'i. 13Ma ga po̱ñhu̱ 'mu̱ ga thöhu̱ nthi, ne ga e̱nthu̱ ma tehu̱ ga thohu̱ nuya u̱gi ngu bi tho'ö n'ehe. 14Ngetho hindi pe̱'su̱wa n'ar hnini hiñham'u̱ da göts'i. Di hoñhu̱ nö'ö man'a xi 'ñep'u̱. 15Nu'mú̱, ma ga tutwabihu̱ Jö n'ar thuhu ngu n'ar m'o̱ñho̱, ngetho di 'bu̱hwihu̱ ar tsi Hmu Hesukristo. Ma ga eñhu̱ nunar m'o̱ñho̱nu̱, po̱nga ha ma nehu̱ mat'wa ár thuhu Jö. 16Ne ga o̱thu̱ xiñho hinga pumhnihu̱ ga mfa̱xu̱ n'a ngu n'a, ngetho nuya m'o̱ñho̱yu̱ numañho Jö. 17'Yo̱thu̱ ri ma̱'yohu̱, yo ma gi thöthu̱ nö'ö xi'ahu̱. Ngetho nu'u̱ hingi tsa̱ya̱ su'ahu̱, pödi ma da thö'spa majöni. Jahu̱p'u̱ ne da njohya da 'yo̱t'e, hinge di tu yá mu̱i, ngetho nunu̱ hinte fa̱x'ahu̱. 18'Ya̱fu̱ Jö da ma̱xkagihe. Di beñhe hinte tsu̱kagihe ma mfenihe, ngetho di nehe ga o̱the xiñho gatho. 19Ho̱nse̱ m'e̱t'o di xi'ahu̱ gi 'ya̱fu̱ ngut'a da tsa̱ ga map'u̱ man'agi. 20Jö unga ar hogam'u̱i, ne bi japi bi mengi bi nte ar tsi Hmu Hesukristo man'agi, nuna ar hoga Ma̱'yo bi nö'ma ár ji bi du̱'ma n'ar 'ra'yo nkohi hiñham'u̱ da göts'i. 21Gese̱ Jö da ma̱x'ahu̱ gi 'yo̱thu̱ ya hoga 'be̱fi ngu ne'ö, ne da mpe̱ ha ri mu̱ihu̱ da tsa̱ gi 'yo̱thu̱ nö'ö numañho. Da njap'u̱ ngetho tsix'ahu̱ ar tsi Hmu Hesukristo, togo di 'ñepi da t'umba ar nsunda hiñham'u̱ da göts'i. Dá njap'u̱. 22Di a̱'ahu̱ tsi kuhu̱, gi hñöñhu̱ nunar mhönu̱ hup'a ri mu̱ihu̱, nuna n'a tsi tu̱i xta ot'ahu̱. 23Pöhu̱, xi nthe̱ ma tsi kuhu̱ Timoteo. Nu'mu̱ ngut'a da thokwa, ga me̱'be ma ga k'ös'ahe. 24Ze̱ngwagihu̱ gatho ri ma̱'yohu̱ ne gatho ya ku. Pe̱ñ'ahu̱ nze̱ngwa nuya ku me Italia. 25Dá hyex'atho'ihu̱ ár nhwëki Jö. Dá njap'u̱.

will be added

X\