AR EBREO 12

1Ngetho xa xi gokathogihu̱ ra nze̱ye̱ togo xi da̱majöni mi pe̱'sa ar ñ'emu̱i, ma ga he̱hu̱ 'mu̱ gatho ma 'be̱nihu̱, ne ya ts'oki hingi he̱gagihu̱ ga 'yohu̱. Ne ga nixt'ihu̱ hinga tsa̱ya̱hu̱ ga tso̱ñhu̱ ár ñöni nunar 'ñu di te̱ñhu̱. 2Hinga höju̱ ma da̱hu̱ xta huxu̱ ar tsi Hmu Hesukristo, togo bi du̱'mi ne bi jwatka ma jamfihu̱. Himbi jamasu hangu ma nda tho ya nt'u̱tsa, mi handar johya ma nda 'ñepa m'e̱fa, bi netho nda ts'u̱ta har pont'i, ne bi hñúxa hár ñ'e̱i ár thuxandö Jö. 3Beñhu̱ nö'ö togo bi me̱'spa ar tse̱ti ya ts'okte xa mi u̱tsa, ne njap'u̱ hinda went'ahu̱ hingi ne gi pe̱fu̱. 4Nu'ahu̱ hinxi zo̱ta ar pa gi uñhu̱ ri tehu̱ gi ntsa̱wihu̱ ar ts'oki. 5Hage xka pumhnihu̱ ya mhö bi hñup'a ri mu̱ihu̱ ngu yá bötsi'ihu̱ Jö, bi t'eñ'ahu̱ njawa: Ma tsi bötsi'ihu̱, yo gi tsamfu̱ ár nju̱tgu 'ra'ahu̱ ar tsi Hmu, ne yo gi wenthu̱ nu'mu̱ tsu̱'ahu̱'ö. 6Ngetho ar tsi Hmu umba ár mfu̱ki nu'u̱ togo mödi, ne umba ár mfe̱i gatho nu'u̱ embabi yá bötsi. 7Tse̱thu̱ ar mfu̱ki 'ra'ahu̱ Jö, ngetho hant'ahu̱ ngu yá bötsi. Hinjo'o n'ar bötsi togo ár dada hingi umba ár mfu̱ki. 8Ha nu'mu̱ hingi 'ra'ahu̱ ar mfu̱ki ngu nu ma'ra, hingyá bötsi'ihu̱ 'mu̱, go yá ho̱t'u̱'ihu̱. 9Nupya ma ga beñhu̱ xta 'ñehu̱wa ma dadahu̱ har ximha̱i, mi fe̱bgagihu̱ ne ndi möhu̱. Yo'ö hinga o̱thu̱ ár Dada ma hñöhu̱, ne ga pe̱'su̱ ar te. 10Majöni numa dadahu̱wa mi tsu̱kagihu̱ 'ra ya tsi pa, ngu mi beñ'u̱ mar ñho. Ha Jö fe̱bgagihu̱ homga ma ñhohu̱, ne ga pe̱'su̱ n'ar te xint'axi ngu'ö. 11Majöni hiñ'otho n'ar mfe̱i ga johya ga höñhu̱, gatho tso̱tkagihu̱ ma mu̱ihu̱. Ha nu'mu̱ da zo ma mfenihu̱, m'e̱fa ga pe̱'su̱ n'ar hogamu̱i, ne da tsa̱ ga o̱thu̱ nö'ö xiñho. 12Jange ju̱xu̱ ri 'ye̱hu̱ xi da̱tho, ne nuya ri ñöhmuhu̱ xi nzatho. 13Ne hyoju̱ n'ar 'ñu njöntho. Njap'u̱ nuna ri wahu̱ xi wengi hinda k'oxa ar ndo'yo, da mengi da zo xiñho man'agi. 14Umba ri mu̱ihu̱ gi 'bu̱hwihu̱ n'ar hogam'u̱i gatho nu ma'ra, ne gi pe̱'su̱ n'ar mfeni xint'axi. Ngetho nu'u̱ hinte pe̱ts'i, hinda ma da hyandwa ár hmi ar tsi Hmu. 15Ntsuñhu̱, yo ma da bo̱mp'u̱ n'a da hye̱p'u̱ ár nhwëki Jö. Ne da mu̱di da zo̱t'a ár mu̱i, ne da 'yo̱t'a nö'ö hingi ho. Ne njap'u̱ da mu̱di da ts'okwa yá mfeni ma'ra. 16Yo ma da m'u̱p'u̱ n'a di 'be̱ngwi ya jö'i, wa hindi ne da numansu nö'ö di 'ñe mhets'i. Ngu ar Esau bi thoka nö'ö mi t'embabi mar 'be̱t'o t'u̱, bi pa̱ti nda t'umba n'a mohi ar ñhuni. 17Xka pöhu̱ himbi t'e̱kwabi, mödi m'e̱fa mi nemhö nda hñönga ar njöpi, ne himbi tsa̱. Bi nö'mahmö yá gida̱, ha himbi t'umbabi ar se̱ki. 18Nu'ahu̱ hinxka kwathu̱ har t'o̱ho̱ mi tsa̱ ngi tha̱ñhu̱, ngu ya me Israel bi tho mam'e̱t'o, ne ngi hyanthu̱ mi po̱xa ar tsibi, xa mar m'e̱xui, ne mi ja ar 'yomndöhi. 19Hinga 'yo̱hu̱ ár ñheti ar k'axt'athu̱xi, ne hinga 'yo̱hu̱ nunar mhö mi nzote. Nu'u̱ togo bi 'yo̱de bi 'ya̱di nda ñhe. 20Ngetho himi tsa̱ nda ze̱ta nö'ö mi nsipabi, mi enö: Nu'u̱ togo nda 'ñexa ár wa har t'o̱ho̱ mödi mar me̱ti, nda tho nk'ahni wa nda nsu̱'sa n'ar maza. 21Xa mar döta ár nsu mi nheki. Gese̱ ar Moise bi 'ñenö: Xa di nhwöt'i di ntsu. 22Nu'ahu̱ xka kwathu̱ har t'o̱ho̱ ár thuhu Sion, hár hnini Jö togo te, har Herusalen mhets'i, po̱ntho xka 'bu̱hwihu̱ nu'u̱ ra nze̱ye̱ ya e̱nxe̱. 23Xka kwathu̱ hár mhunts'i nu'u̱ ya hmökabötsi xi thu'spa yá thuhunu̱ mhets'i, ne xka tsu̱hu̱ Jö togo o̱t'wa ar ts'u̱t'wi gatho. Ne xka nthöskwihu̱ ya hogajö'i xi du xi zo̱nga xiñho hár ñöni. 24Xka kwathu̱ xka tsu̱hu̱ gese̱ ar tsi Hmu Hesukristo, togo 'ñu ar 'ra'yo nkohi. Ne ár ji bi nö'mi xa döta ar ñho ñ'udi, hingi ñhe̱hwi ár ji ar Abel. 25Jamasuhu̱ yo ma gi fe̱'sfu̱ ár mhö togo zoju̱. Ngetho nu'mu̱ himbi k'ont'a nu'u̱ bi me̱'spa ár mhö togo mi zokwa har ximha̱i, hanja ga k'onthu̱ nu'mu̱ ga fe̱'sfu̱ ár mhö Jö bi e mhets'i. 26Nunar mhö bi japi bi nhwöt'a gatho nuwa har ximha̱i, nupya xi ñötkagihu̱ xi 'ñenö: Ho̱nse̱ man'agi ma ga japa da nhwöt'a hinge ho̱nse̱ ar ximha̱i, xo̱ge mhets'i n'ehe. 27Nú'mu̱ enö, man'agi, ne da 'ñenö ma da hwönga gatho nö'ö tsa̱ da 'ñöni ne xi thoki. Ho̱nse̱ da gohi nu'u̱ hingi tsa̱ da 'ñöni. 28Jange nu'mu̱ xta höñhu̱ n'ar ts'u̱t'wi hingi tsa̱ da 'ñöni, ma ga umfu̱ njamödi Jö, ne ga pe̱pabihu̱ ngu ne'ö, ga pe̱'sfu̱ ar ntsu ne ar ntsuni. 29Ngetho ma tsi Dadahu̱ ñhe̱hwi n'ar tsibi tsöt'a xo̱ge.

will be added

X\