AR EBREO 11

1Ar ñ'emu̱i gehnu̱ ga pöhu̱ xiñho ma ga höñhu̱ nö'ö di to̱'mhu̱, ne di ñ'emu̱ihu̱ ga höñhu̱ nö'ö hindi handathohu̱. 2Nunar ñ'emu̱inu̱ bi ma̱xa ma palehu̱ mi 'bu̱ mam'e̱t'o nda numañho Jö. 3Nunar ñ'emu̱inu̱ fa̱xkagihu̱ ga pöhu̱ ho̱nse̱ bi mönga Jö, ne bi ho xo̱ge nö'ö di hanthu̱pya. Gathonu̱ ba e habu̱ himi nhekitho 'mu̱. 4Nunar ñ'emu̱inu̱ bi ma̱xa ar Abel bi unga n'ar m'o̱ñho̱ mi töpa ár ñho nö'ö bi unga ár jödö Kain. Jange Jö bi da̱majöni mar hogajö'i, ngetho bi hñömba ár m'o̱ñho̱. Ne mi tho ya pa, mödi xi du, nho̱mbatho ár ñ'emu̱i. 5Nunar ñ'emu̱inu̱ bi ma̱xa ar Enok bi ts'its'i hinge nda nu ar ndöte. Ne himbi thini, ngetho bi zixa Jö. Núm'u̱ hinxki ts'ixtho, Jö bi damajöni mi numañho. 6Ha nu'u̱ hinte pe̱'sa ar ñ'emu̱i, Jö hingi tsa̱ da numañho, ngetho nö'ö togo ne da hyoni, m'e̱t'o mahyoni da ñ'emu̱i di 'bu̱i, ne go ma da umba ár nthöhö togo honi. 7Nunar ñ'emu̱inu̱ bi ma̱xa ar Noe bi hyoka ar motsa habu̱ bi k'ont'ö ne gatho yá mëni, nú'mu̱ mi xipa Jö nö'ö ma nda thogi, mödi himi handatho. Nunar jamfinu̱ bi japi bi nheki yá ts'oki ya meximha̱i, ha nö'ö bi t'embabi mi 'bu̱i xiñho hár nthandi Jö. 8Nunar ñ'emu̱inu̱ bi ma̱xa ar Abra nu mi ts'ohni, ba po̱nga hár hnini ndi ma ha n'ar ha̱i nda t'umbabi. Bi 'yo̱ta Jö mödi himi pödi habu̱ ndi ma. 9Ar ñ'emu̱i bi ma̱ts'i bi m'u̱ ngu n'ar nzo̱ho̱ har ha̱i xki ñhöt'wabi, nuyu̱ ma yá ha̱i ma'ra. Mi 'bu̱ta ha ya ngudutu. Bi njap'u̱ ar Isa ne ar Hakob, nu'u̱ togo bi hñönga ar ñhöt'i n'ehe. 10Ngetho mi to̱'ma ar hnini xi t'ei xiñho, gese̱ Jö togo xi beni hanja da thoki. 11Nunar ñ'emu̱inu̱ bi ma̱xa ar Sara togo himi tsa̱ nda ñ'o̱nte. Bi hñönga ar ts'e̱di nda nda̱thi, ne bi m'u̱ ár bötsi, mödi xki tho ya je̱ye̱ ñ'o̱nte n'ar 'be̱hñö. Ha bi ñ'emu̱i mi tsa̱ nda 'yo̱t'a togo bi ñöt'wabi. 12Bi njap'u̱ n'ehe ar Abra. Po̱ntho xki du, bi me̱'sa ngu ár nze̱ye̱ ya tso̱ nuyá 'be̱to bi dini, ne ngu ar 'bomu ja har ñönthe hingi tsa̱ da 'bede. 13Bi du mi ñ'emu̱i gatho'u̱, mödi himbi hñönga ar ñhöt'i. Bi hyant'u̱ yap'u̱tho ne mi ñ'emu̱i, mi ze̱ngwatho ne mi da̱majöni'u̱ ma ya nzo̱ho̱ ne thota nuwa har ximha̱i. 14Ngetho nu'u̱ mönga njap'u̱, nheki xiñho honga n'ar ha̱i habu̱ da m'u̱i. 15Nu'mu̱ di bemhö nda penga habu̱ ba po̱ñ'u̱, mi tsa̱ nda mengi. 16Ha nuyu̱ mi hoñ'u̱ man'a, mi töte ár nsu bi 'bu̱ mhets'i. Jange Jö hingi ntsa̱ da 'ñembabi ár Dada'u̱, ne xpa hokwa n'ar hnininu̱. 17Nunar ñ'emu̱inu̱ bi ma̱xa ar Abra nú'mu̱ mi tsa̱ta Jö. Dama bi netho bi da̱twa ar Isa nö'ö n'ase̱ ár t'u̱ mi ñ'ehe, mödi xki hñönga ya ñhöt'i, 18nu xki wadi xki t'embabi: Nuya ri 'be̱to xta ñöt'a'i, ma da bo̱nga ha yá bötsi ar Isa. 19Mi ñ'emu̱i pe̱'sa ar ts'e̱di Jö da gu̱xa nu'u̱ xi du, ngetho po̱ntho bi du ne bi mengi bi nte man'agi, ne bi mengi bi zits'i. 20Nunar ñ'emu̱inu̱ bi ma̱xa ar Isa bi xipa ar Hakob ne ar Esau nö'ö ma nda hwëkwa Jö m'e̱fa. 21Nunar ñ'emu̱inu̱ bi ma̱xa ar Hakob nú'mu̱ mi da̱t'i nda du, bi xipa nö'ö ma nda hwëkwa Jö yá bötsi ar Huse, ne bi ndönga Jö mi njwaxa hár ndo̱ho̱. 22Nunar ñ'emu̱inu̱ bi ma̱xa ar Huse nú'mu̱ mi 'ba̱p'u̱tho ár ndöte, bi 'ñenö ma nda bo̱nga Ehipto nuya me Israel, ne bi 'be̱pabi'u̱ nda gu̱kwa yá ndo'yo. 23Nunar ñ'emu̱inu̱ bi ma̱xa yá dada ar Moise, bi 'ñö hñu nzönö, ngetho bi hyant'u̱ mar nza̱tho bötsi, ne himbi zu'u̱ nö'ö xki mönga ar ndö. 24Nunar ñ'emu̱inu̱ bi ma̱xa ar Moise nú'mu̱ mi ndöta, himbi ne bi t'embabi már t'u̱ ár t'inxu ar ndö me Ehipto. 25Bi hwahna nda mfe̱i mahye̱giwi ár hnini Jö, himbi ne bi njohya 'ra ya tsi pa ha yá ñho ar ts'oki. 26Bi hyandi ngu n'ar döta m'e̱ts'i yá nt'u̱tsa ar tsi Hmu Hesukristo, ne himbi nepa yá m'ets'i ya me Ehipto, ngetho xki hñuxa ár da̱ har nthöhö unga Jö. 27Ar ñ'emu̱i bi ma̱ts'i ba tsop'u̱ Ehipto, himbi zupa ár kwe̱ ar ndö, ngetho bi ze̱twa ár jamfi Jö togo hingi nheki. 28Bi ma̱ts'i n'ehe nda du̱'ma ar baxjwa ne ar nhöxa ji nú'mu̱ nda thohnu̱ togo mi ho ya 'be̱t'o bötsi, hinte nda japabi'u̱. 29Ar ñ'emu̱i bi ma̱ts'i bi thot'u̱ har The̱nga Ñho̱nthe ngu ar 'yoñha̱i, ha nuya me Ehipto bi tsa̱ti nda tho'u̱ n'ehe, ne bi jöt'u̱ xo̱ge. 30Ar ñ'emu̱i bi mfa̱xte bi yo̱t'a ya jödo mi kot'a ar hnini Heriko, nu mi wadi bi nthet'a yoto mpa. 31Nunar ñ'emu̱inu̱ bi ma̱xa nunar ts'o'be̱hñö már thuhu ar Rahab. Himbi duwi gatho nu ma'ra ya me̱'sku, ngetho bi umba n'ar hoga tsa̱ya̱ nu'u̱ togo bi ma ba thexa ar ha̱i xki ñhöt'i. 32Tema man'a ga xi'ahu̱. Ngetho hinda zu̱kagi ga pet'ahu̱ gatho tema bi tho ar Gedeon, ar Barak, ar Sanson, ar Hefte, ar Dabi, njap'u̱ ar Samuel ne ma'ra yá m'e̱hni Jö. 33Nunar ñ'emu̱i bi ma̱ts'i bi dö ma'ra ya ndö, bi 'yo̱t'a ar hoga ts'u̱t'wi, bi zu̱ ya ñhöt'i, ne bi got'wa yá ne ya 'muhu. 34Bi ma̱ts'i bi k'ont'a ha ya tsibi xa mi fagi, ne ha ya ndo̱jwai. Bi t'umba ar ts'e̱di ha yá ngwent'i ne ha ya tuhni, ne bi japi nda 'be̱ ar 'ñu yá ndogu ma'ra ya ha̱i. 35'Ra ya 'be̱hñö bi mengi bi hyanda yá mëni xki mengi xki nte man'agi. Ma'ra bi ñhe̱gi bi mfe̱i, himbi ne togo nda ñöni, ne nda mengi nda nte ha n'ar m'u̱i töte ár nsu. 36Ma'ra bi tho ya nt'u̱tsa ne ya mfe̱i. Hinge ho̱nse̱'ö, bi nthöt'a ya bo̱jö ne bi jot'a ha ya fa̱di. 37Bi ts'oxa ya nk'ahni, bi nju̱ ya nthe̱gi bi theka made, bi ts'a̱ti. Ma'ra bi tho ndo̱jwaitho, himi ñ'otho habu̱ nda m'u̱i, hagatho mi 'yotho, ho̱nse̱ mi hempa yá ximhni ya de̱ti, ya t'öxi, xa mi hyoya, xa mi tho ya dumu̱i, mi tho ya mfe̱i. 38Ar ximha̱i hinge ndi 'ñepabi nda m'u̱kwa. Mi 'yo'u̱ ha ya ot'aha̱i, ha ya t'o̱ho̱, ha ya ñeke ne ya oki ja ha ya ma'ye. 39Mödi bi numañho Jö yá jamfi, himbi hyant'u̱ nda tho gatho nö'ö xki ñhöt'wabi. 40Ngetho Jö xki 'ye̱gagihu̱ ma'ra ya döta njöpi, ne nu'u̱ mahye̱gi nguju̱ nda hñönga nunar ñhonu̱, ne hinge nda hñönse̱'u̱ ya njöpi.

will be added

X\