1 Nuya 'be̱pate bi t'unga maham'u̱, ho̱nse̱ ngu ár xudi nuya döta ñho ma nda t'aju̱ m'e̱fa, hinge mi gehyu̱. Nuya m'o̱ñho̱ ta̱t'a je̱ye̱ mi o̱t'a nu'u̱ mi e nda hyonga Jö, hinto bi tsa̱ bi hyokwa ár m'u̱i. 2 Ngetho nu'mu̱ xi hñökwahmö yá ts'okiyu̱, hinte di tsa̱'u̱ ha yá mu̱i, ne xi hye̱hmö da 'yo̱t'a nuya m'o̱ñho̱yu̱. 3 Ha nuya m'o̱ñho̱yu̱, ho̱nse̱ mi japi da benga yá ts'oki ta̱t'a je̱ye̱. 4 Ngetho nuyá ji ya boi ne yá ji ya t'öxi hingi tsa̱ da hñöka ya ts'oki. 5 Jange nu mi yu̱t'a har ximha̱i ar tsi Hmu Hesukristo, bi 'ñenö: Ya m'o̱ñho̱ ne ya ñhöt'i hinga ne, ha ga 'rakawa n'ar ndo'yo har ximha̱i. 6 Nuya m'o̱ñho̱ ts'öt'i ne nuya ñhöt'i thöñ'a'i gi pungya ts'oki, hinga numañho. 7 Jange da enga: Ma Jö'i, di 'bu̱kwa xta e ga o̱t'a nö'ö gi nege, ngu xi nt'ot'a ha ya t'ofo habu̱ no̱ngagi. 8 Ngu enga m'e̱t'o: Ya m'o̱ñho̱ ne ya ñhöt'i t'a'i gi pungya ts'oki, hinga ne, ne hinga numañho. (Gathoyu̱ 'bo̱ts'e ngu mönga ha ya 'be̱pate.) 9 M'e̱fa bi 'ñenö: Ma Jö'i, di 'bu̱kwa xta e ga o̱t'a nö'ö gi nege. Njap'u̱ bi 'ñenö, bi göxa nö'ö m'e̱t'o, ne bi thuxa man'a 'ra'yo. 10 Xi t'axkagihu̱, ngetho ar tsi Hmu Hesukristo bi 'yo̱ta Jö, bi unga ár te ngu n'ar m'o̱ñho̱ n'agitho, ne hinda ma da tho ár ts'e̱di. 11 Ha nuya möjö hyax'mu̱ pe̱pa Jö, ne unga get'ö ar m'o̱ñho̱ hiñham'u̱ da hñöka ya ts'oki. 12 Ha nunar tsi Hmu Hesukristo, mi wadi bi unga n'adar m'o̱ñho̱ bi gut'wa yá ts'oki ya meximha̱i, bi hñuxa hár ñ'e̱i Jö. 13 Bi ndu̱ nuya pa'u̱ di njawa, ho̱nse̱ to̱'mi da ts'impa gatho yá ñ'u̱ni da ts'e̱m'a ha yá wa. 14 Ngetho nuna n'adar m'o̱ñho̱nu̱, bi umba n'ar hoga te hinda thege nu'u̱ xi t'axk'ö. 15 Ár Hñö Jö mahye̱gi da̱majöni nú'mu̱ bi 'ñenga m'e̱t'o: 16 Nu xta tho nuya payu̱, gehnu̱ ar nkohi ma ga nko'be, enga ar tsi Hmu: Ma ga köt'wa ma 'be̱pate ha yá mu̱i, ne ga ot'wa ha yá mfeni. 17 Ne bi 'ñenga m'e̱fa: Hiñham'u̱ ma ga benga yá ts'oki, ne ga puhni ma ya me̱'sku. 18 Nu habu̱ xi mpumbabiyu̱, hiñ'otho ma'ra ya m'o̱ñho̱ da dukwa yá ts'oki. 19 Jange tsi kuhu̱, di pe̱'su̱pya ar se̱ki ga ku̱thu̱ har xe̱ni Xa Ar Nsunda, gehnu̱ bi gut'a nú'mu̱ mi nö'ma ár ji ar tsi Hmu Hesukristo. 20 Ga nehu̱ ar 'ra'yo 'ñu tsixju̱ har te, bi xogagihu̱ madeda ar döta xu̱ni dutu bi xoki, gehnu̱ ár ndo'yo. 21 Ne di 'ñehu̱ hár nijö Jö n'ar döta döngamöjö xa pe̱'sa ár nsu. 22 Ma ga kwathu̱ habu̱ 'bu̱ Jö, hinte di tsu̱ka ma mfenihu̱, ne di tse̱ ma jamfihu̱. Ngetho xi nxu̱gagihu̱ ma mu̱ihu̱ xi thögagihu̱ ya ts'omfeni, ne xi nsu̱ga ma ndo'yohu̱ har t'axdehe. 23 Hinge te gatho ga benthu̱. Ma ga umba ma mu̱ihu̱ ga ñ'uhu̱ nunar ndo̱'minu̱ di pe̱'su̱, ngetho nu togo bi ñötkagihu̱ hingi kate. 24 Ne n'a ngu n'a ga beñhu̱ ma ñ'ohu̱, ga nkahu̱ ga pe̱'su̱ ar mhöte, ne ga pe̱hu̱ ya hoga 'be̱fi. 25 Yo ma ga he̱hu̱ ga kwathu̱ ha ya mhunts'i ngu xi nzönga 'ra. Nö'ö ga o̱thu̱, ga humfu̱ ár mu̱i n'a ngu n'a ma kuhu̱, ngetho di pöhu̱ 'ba̱p'u̱tho ar pa da penga ma tsi Hmuhu̱ Hesukristo. 26 Ngetho nu'u̱ xi bö nö'ö majöni, ne di nese̱ da 'yo̱t'a ya ts'oki, hinda ma da t'o̱t'a man'ar m'o̱ñho̱ da thökwa yá ts'okiyu̱. 27 Ho̱nse̱ to̱'ma nunar pa xa ñ'u̱tho da thö'spa majöni, ne ar tsibi nthu̱ni da dut'a gatho nu'u̱ hingi ne da 'yo̱ta Jö. 28 Nu'u̱ togo ts'okwa yá 'be̱pate ar Moise, nu'mu̱ yoho wa hñu ya jö'i da da̱majöni hö bi 'yo̱t'e, hinda k'ont'i da tho. 29 Tengu ár dötahmö ar mfe̱i gi beñhu̱ to̱'ma nö'ö togo hinda numansubi ár T'u̱ Jö, ne da 'ñenö, hingi ho ár ji nuna bi japabi bi t'axki, ne da nto̱xkwi ár Hñö Jö xi nhwëgagihu̱. 30 Di pöhu̱ togo bi 'ñenö: Go di ko'spaga yá ñöni, go ga umga yá njut'i, enga njap'u̱ ar tsi Hmu. Ne man'agi enö: Ar tsi Dada ma da hñö'spa majöni yá bötsi. 31 Ñ'u̱tho da zo n'a ha yá 'ye̱ Jö togo te. 32 Beñhu̱ nuya pa xi thogi, nú'mu̱ ja ngi jwahu̱ bi 'ra'ahu̱ ár hyats'i ar tsi Hmu, xa ga tse̱ta ri mu̱ihu̱ ga thohu̱ ya thogi. 33 Mödi ngi thohu̱ ya thogi ne ya nt'u̱tsa, ga tse̱thu̱ ya jö'i mi theñ'ahu̱, ne njap'u̱ ga thohwihu̱ mahye̱gi nu'u̱ ma'ra mi tho ya thogi n'ehe. 34 Ngetho ga hwëju̱ nu'u̱ mi ku̱ har fa̱di. Ha nuya ri ñhohu̱ bi thömp'ahu̱, ga njohya ga tse̱thu̱, gi to̱'mhu̱ gi hñöñhu̱ ya ñho xa nza̱tho ne hinda thege, bi to̱p'ahu̱nu̱ mhets'i. 35 Jange yo ma gi hye̱hu̱ gi ndö'mhu̱, ngetho bi to̱p'ahu̱ n'ar döta nthöhö. 36 Ngetho mahyoni gi tse̱thu̱ ya thogi, ne xki jwahu̱ gi 'yo̱thu̱ nö'ö ne Jö, gi hñöñhu̱ nö'ö xi ñöt'ahu̱. 37 Enga har T'ofo: Ga to̱'mhu̱ da tho man'a tsi tu̱i, ne ngut'a ma da zo̱ nö'ö da ehe. 38 Ha nö'ö togo 'bu̱ xiñho ha ma nthandi, ma da m'u̱i di ñ'emu̱igi, ha nu'mu̱ da mengi, hinga numañho. 39 Mödi nuju̱ hinga gekagihu̱ nu'u̱ di penju̱ ga m'e̱hu̱. Nuju̱ di pe̱'su̱ ar ñ'emu̱i, ne hinda m'e̱ ma pahu̱.
