1 Jö nze̱ye̱ ya pengi ba pe̱hna yá m'e̱hni mam'e̱t'o, hagatho bi japabi mi zo ma palehu̱. 2 Ne nuya ngöxapayu̱ xi me̱nse̱ ár T'u̱ da zokagihu̱. Gehnu̱ xi zokwabi gatho ár me̱ti, ne bi 'ye̱nt'wa hár 'ye̱ bi hyoka gatho ar mhets'i ne ar ximha̱i. 3 Gehnu̱ togo ñ'u ár hyats'i ár nsunda ñhe̱hwitho Jö, ne o hár 'ye̱ da do̱xa xo̱ge, ho̱nse̱ da mönga ár mhö pe̱'sa ar ts'e̱di. Gehnu̱ bi xu̱gagihu̱ ma ts'okihu̱ mi unga ár tese̱, ne bi hñuxa hár ñ'e̱i ar Ndö bi 'bu̱ mhets'i. 4 Ne bi hñuxa ár nsu ár T'u̱ bi döta ya e̱nxe̱. Njap'u̱tho ár thuhu bi thu'spabi töpa ár nsu yá thuhu'u̱. 5 Ngetho tema e̱nxe̱ xi 'ñemba Jö: Go ma T'u̱'i, nupya di ñ'udi go ri Dadagi. Ne embabi man'agi: Nuga go ár Dadagi, ha nö'ö go ma T'u̱. 6 Man'agi enö nú'mu̱ ba pe̱hna ár 'be̱t'o T'u̱ har ximha̱i: Gatho yá e̱nxe̱ Jö dá ndöñ'ö. 7 Ha nú'mu̱ no̱nga ya e̱nxe̱ enö: Nuyá e̱nxe̱ japi da ñhö, ne nuyá 'be̱go japi da mfagi. 8 Ne nú'mu̱ no̱nga ár T'u̱ enö: Nuna ri ndö, tsi Jö, hiñham'u̱ da göts'i, ha nuna ri ts'u̱t'wi xa n'ar hoga ts'u̱t'wi. 9 Xka mö nö'ö xiñho, ne xka u̱tsa nö'ö hingi ho. Jange bi hñus'a ri nsu togo ri Jö. Bi gox'a ar nziki johya, gi töta gatho ri ñ'ohu̱. 10 Xi 'ñenö n'e: Nu'ge, tsi Hmu, ga hyoka ar ximha̱i hár ndu̱i, ne ar mhets'i go xi hyoka ri 'ye̱. 11 Gatho'u̱ ma da göts'i, ha nu'ge gi 'bu̱i hiñham'u̱ da göxa ri te. Ne gatho'u̱ ma da thege ngu n'ar dutu. 12 Ngu n'ar he ma da m'a̱ts'i ne da 'boni. Ha nu'ge go get'a'i, ne nuya ri je̱ye̱ hinda ma da thege. 13 Ngetho tema e̱nxe̱ xi 'ñemba njawa: Hñu ha ma ñ'e̱i ga huxkwi, to̱'mi ga tsiñ'a nuya ri ñ'u̱ni ga tse̱p'a ha ri wa. 14 Gatho ya e̱nxe̱ yá 'be̱go Jö, bi pe̱hni da ma̱xa nu'u̱ togo ma da hñönga ar mpo̱ho̱.
