AR GALATA 5

1Ar tsi Hmu Hesukristo bi gu̱gagihu̱ ha ya 'be̱pate mi ja mam'e̱t'o, ne njap'u̱ hinga 'bu̱hu̱ xi ze̱bgathogihu̱. Jange ma ga umba ma mu̱ihu̱ hinga penju̱ man'agi da ze̱bgagihu̱ nuya 'be̱pateyu̱. 2Nuga dar Pablo, 'yo̱xu̱ nö'ö di xi'ahu̱: Nu'mu̱ gi nehu̱ da thus'ahu̱ ar nse̱gi tuta yá ndo'yo ya xodyo, hinte gi nuhu̱ 'mu̱ ár 'be̱fi ar tsi Hmu Hesukristo. 3Di xi'ahu̱ man'agi, nu'mu̱ togo da hñuxa ar nse̱gi hár ndo'yo, mahyoni da 'yo̱t'a gatho nu'u̱ ya 'be̱pate bi zo ar Moise. 4Nu'ahu̱ gi hurimu̱ihu̱ hingi ma gi tuxu̱ ri ts'okihu̱ ngetho gi te̱ñhu̱ ya 'be̱pate bi zo ar Moise. Nu'mu̱ gi beñhu̱ njap'u̱, xka 'wehu̱ xka hye̱hu̱ ar tsi Hmu Hesukristo, ne hinte xka nuhu̱ teme xi hwëgagihu̱. 5Ha nuju̱, di to̱'mhu̱ da t'engagihu̱ hinte ma ts'oki di tuhu̱ ngetho xta nzimfu̱ ár Hñö Jö, ne di ñ'emu̱ihu̱. 6Nu'u̱ xta jamfihu̱ ar tsi Hmu Hesukristo, hinter me̱'ö nu'mu̱ ga huxu̱ ar nse̱gi ha ma ndo'yohu̱ wa hin'ö. Nö'ö xiñhohmö, da nheki ma jamfihu̱ ga o̱thu̱ ya hoga 'be̱fi di pe̱wi ar mhöte. 7Ngi pa̱hu̱ xiñho. Togo bi k'as'ahu̱ hingi te̱ñhu̱ nö'ö majöni. 8Nunar nk'ats'inu̱, hinxpa pe̱hna Jö togo bi zoñ'ahu̱. 9Nu'u̱ togo k'as'ahu̱, ñhe̱hwi ngu ar njoxthuhme, mödi n'ar tsi tu̱i japi da fo̱nsa gatho ar ju̱ni. 10Nuga di ka̱xmbeni Jö, hinxka pa̱thu̱ ri mfenihu̱. Ha nö'ö togo k'as'ahu̱, hinda ma da k'ont'i da hñönga ár mfe̱i Jö, ne hinda ma da thantho togo'ö. 11Tsi kuhu̱, nu'mu̱ di mömbatho ar nse̱gi tuta hár ndo'yo ya xodyo, hinjo'o togo di kukagi. Nu'mu̱ di njap'u̱hmö, hinto da k'a'spa ár pont'i ar tsi Hmu. 12Nu'u̱ togo k'as'ahu̱, di nehmö da ñhe̱ni n'agitho. 13Tsi kuhu̱, xi ts'onkagihu̱ ga po̱ñhu̱ xki ze̱bgagihu̱ yá 'be̱pate ar Moise. Mödi hinxi the̱gagihu̱ ga o̱thu̱ gatho nö'ö di nehu̱. Nö'ö ga o̱thu̱, ga mhöhu̱ ne ga mfa̱xtehu̱ n'a ngu n'a. 14Da tsa̱ ga o̱thu̱ gatho nuya 'be̱pate xi zogagihu̱ ar Moise nu'mu̱ ho̱nse̱ ga o̱thu̱ nuna enö njawa: Mö ri ñ'ohu̱ ngu gi mhöse̱hu̱. 15Ha nu'mu̱ gi nto̱xu̱ ne gi ntsothu̱ n'a ngu n'a, pöhu̱ 'mu̱, ma gi tese̱hu̱ ri ñ'ohu̱. 16Di xi'ahu̱, ga 'bu̱hu̱ ngu utgagihu̱ ár Hñö Jö, hinga o̱thu̱ gatho nö'ö di nese̱hu̱. 17Ngetho nö'ö di nehu̱, hingi ne ár Hñö Jö, ha nö'ö ne ár Hñö Jö, hindi nehu̱. Nuya yohoyu̱ ntuhna ha ma mfenihu̱, jange hingi tsa ga o̱thu̱ xiñho n'a wa man'a. 18Ha nu'mu̱ tsixkagihu̱ ár Hñö Jö, hingi 'be̱pkagihu̱ yá 'be̱pate ar Moise 'mu̱. 19Nu'u̱ togo o̱t'a gatho nö'ö ne'u̱, fötwatho yá ts'o'be̱fi pe̱'u̱: Ya tsinganthöti, 'be̱ngwi ya jö'i, o̱t'a nö'ö xints'otho, ne bendar ts'oki. 20Nuya jö'i'u̱ xa̱ta yá tsita hokse̱, ya ñ'ete, ya ñ'u̱tsate, ya 'yo̱t'atuhni, ya gese̱, ya kwe̱, ya nemhñö, ya ntsa̱hñöki, ne 'weka ya jö'i. 21Ya 'ñöxte, ya hyote, ya mihni, ne te gatho o̱t'e ha ya ts'oda̱ngo, ne o̱t'a ma'ra ya ts'oki njanu̱. Xta xi'ahu̱, ne di xi'ahu̱ man'agi, nu'u̱ togo o̱t'a nuya ts'o'be̱fiyu̱, hinda ma da yu̱t'a hár ts'u̱t'wi Jö. 22Ha nu'mu̱ ga 'bu̱hu̱ ngu utkagihu̱ ár Hñö Jö, nu'mú̱ ga pe̱'su̱ ar mhöte, ar johya, ar hogamu̱i, ar ts'e̱ti, ar hogajö'i, ar nhwëki, ne ar ñ'emu̱i, 23ar nts'a̱'mi, ar ntsuni. Gehyu̱ 'raju̱ ár Hñö Jö, ne hiñ'otho 'ra ya 'be̱pate habu̱ di högagihu̱ ga o̱thu̱. 24Nu'u̱ togo xi jamfi ar tsi Hmu Hesukristo, wande xi ts'u̱twi har pont'i gatho nö'ö ne ár ndo'yo. 25Ha nupya ár Hñö Jö xi 'rakagihu̱ n'ar 'ra'yo te, ma ga 'bu̱hu̱ ngu utkagihu̱'ö. 26Hinga ma ga ñ'ets'ihu̱, hinga nxaxtehu̱ n'a ngu n'a, hinga ñö'sfu̱ nö'ö te pe̱'sa ma'ra.

will be added

X\