AR GALATA 4

1Beñhu̱ n'ehe, nu'mu̱ n'ar bötsi xi ts'okwabi gatho nö'ö mi pe̱'sa ár dada, mödi gor me̱ti gatho nö'ö xi ts'okwabi, hinda tsa̱ da 'ye̱nse̱ nu'mu̱ hinxi zo̱ndyá je̱ye̱. Njap'u̱ di hñöxkwitho n'ar 'be̱go. 2Nunar bötsi'ö o hár 'ye̱ nu'u̱ togo su, ne togo supabi gatho nö'ö teme bi ts'okwabi. Ma da 'ye̱nse̱ nú'mu̱ xta jwata yá je̱ye̱ bi mönga ár dada. 3Nuju̱ n'ehe, mam'e̱t'o ndi ñhe̱hwihu̱ ngu nö'ö ar bötsi himi jwata yá je̱ye̱, hyax'mu̱ ndi pe̱pabihu̱ yá nt'umbi ar ximha̱i. 4M'e̱fa bi zo̱ ar pa xki benga Jö, ba pe̱hna ár T'u̱, bi 'yo̱nga n'ar 'be̱hñö, ne bi m'u̱ nú'mu̱ mi jár ts'e̱di yá 'be̱pate ar Moise. 5Bi jap'u̱ nda zimgagihu̱ xki gokagihu̱ ya 'be̱pate, ne nda tekagihu̱. 6Ne nupya nuju̱ yá bötsigihu̱ Jö. Jange xpa pe̱nkagihu̱ ár Hñö ár T'u̱ da m'u̱ ha ma mu̱ihu̱, ne xta nziñhu̱ ár ts'e̱di'ö di emfu̱: Ma tsi Dada'ihe. 7Jange nupya, hindi njanguhu̱ n'ar 'be̱go. Yá bötsigihu̱ Jö, ne go ma me̱tihu̱ gatho ya ñho ma da 'rakagihu̱ ngetho xta ñ'emu̱ihu̱ ar tsi Hmu Hesukristo. 8Nu'ahu̱ mam'e̱t'o nú'mu̱ hinge ngi pöhu̱ Jö, ngi pe̱pabihu̱ nu'u̱ ya tsita ngi hokase̱hu̱, ne hinga ge'u̱ ar Jö majöni. 9Ha nupya hö, gi pöhu̱ Jö, tsa̱ ga möñhu̱ go bi bö'ahu̱ m'e̱t'o'ö. Xi'mu̱, yo'ö gi ne gi penju̱ man'agi gi te̱mfu̱ yá nt'umbi ar ximha̱i nu'u̱ hinte pe̱'sa ar ts'e̱di, ne hinter me̱'u̱. Yo'ö gi nehu̱ da mengi da go'ahu̱ man'agi. 10Xa gi jamasuhu̱ ya pa, ya zönö ne ya je̱ye̱, ne gi o̱thu̱ ma'ra ya da̱ngo. 11Jange nuga di tsu da m'e̱ gatho nunar 'be̱fi xta ut'ahu̱. 12Tsi kuhu̱, di a̱'ahu̱ gi te̱ngagihu̱ ma m'u̱i, ngu nuga xta te̱ñ'a ri m'u̱ihu̱ hinge ngi te̱mfu̱ yá 'be̱pate ar Moise. Nú'mu̱ da jwadi nda tso̱mp'u̱, hinga u̱tsagihu̱. 13Gi pöhu̱, hár ndu̱i da zo'ahu̱ ár mhö Jö ngetho ndi tho n'ar hñeni. 14Hinga kot'a ri mu̱ihu̱, ne hinga u̱tsagihu̱, mödi mar ñhembi'ihu̱, ngetho ndi tho nö'ö ar hñeni'ö. Mödi njap'u̱, ga 'rakagihu̱ ar se̱ki, ne ngi nugagihu̱ ngu n'ár e̱nxe̱ Jö, ngu gi nuse̱hu̱ ar tsi Hmu Hesukristo. 15Habu̱ima ri johyahu̱ ngi pe̱'su̱ nú'mu̱ ndi 'bu̱p'u̱. Nuga di da̱majöni xa ngi mökagihu̱. Nu'mu̱ xi tsa̱hmö, xka hñöhu̱ ri da̱hu̱ ne xka 'rakagihu̱. 16Xi'mu̱, hage gi u̱tsagihu̱pya ngetho da xi'ahu̱ nö'ö majöni. 17'Yop'u̱ 'ra togo 'bu̱tho da du hoñ'ahu̱, mödi hingi honga ri ñhohu̱. Nuyu̱ ne da 'wek'ahu̱ hingi jajemasu gi te̱ñhu̱'u̱. 18Xiñho'ö nu'mu̱ togo 'bu̱tho da du da 'yo̱t'a nö'ö xiñho. Di ne gi 'bu̱hu̱ njap'u̱ hyax'mu̱, hinge ho̱nse̱ nú'mu̱ di 'bu̱p'u̱. 19Ma tsi bötsi'ihu̱, di tho ya u̱gi man'agi ngu n'ar 'be̱hñö ñ'o̱nte, di hant'ahu̱ hindi hñöx'atho'ihu̱ ar tsi Hmu Hesukristo. 20Di nemhö ga 'bu̱hwihu̱pya, ne ga honi hanja ga zo'ahu̱. Xa gi tubgagihu̱ ma mu̱i, te ga pe̱pya. 21Nu'ahu̱ gi ne gi te̱ñhu̱ yá 'be̱pate ar Moise, xikagihu̱: Hage hinxka 'yo̱hu̱ nö'ö mönga nuya 'be̱pate. 22Hár T'ofo Jö enö njawa: Ar Abra bi dinga yoho yá t'u̱. N'ár t'u̱ ar 'be̱hñö mi m'e̱go, ha nö'ö man'a, ár t'u̱ ar 'be̱hñö himi m'e̱go. 23Nu ár bötsi ar 'be̱hñö mi m'e̱go, bi m'u̱i ngu m'u̱ gatho nu ma'ra ya bötsi. Ha nö'ö ár bötsi ar 'be̱hñö himi m'e̱go, bi m'u̱i ngetho Jö xki ñöt'wa ar Abra. 24Nuya yoho ya nönö, ma ga he̱ju̱ nu'u̱ yoho ya nkohi bi nkohwi Jö ya jö'i. Nunar 'be̱hñö mar thuhu ar Agar mi m'e̱go, ñhe̱hwi nunar nkohi bi t'unga har t'o̱ho̱ Sinai. Jange nuya xodyo te̱nga nunar nkohi'ö, m'e̱go ngu mi m'e̱go ar Agar. 25Ar Agar ngu ar t'o̱ho̱ Sinai núnu̱ Arabia, ñhe̱hwi ar Herusalen nuya payu̱. Ngetho ngu n'ar nönö m'e̱gowi yá bötsi, di hñöxa nuya mengunu̱ pe̱patho yá 'be̱pate ar Moise. 26Ha nö'ö ar Herusalen 'bu̱ mañö mhets'i, ngu ma nönöhu̱ hinto pe̱pabi. 27Nu hár T'ofo Jö bi mönga njawa maham'u̱: Njohya, nu'ge hingi tsa̱ gi tinga ya bötsi, ne hinxka ñ'o̱nte. Hye̱xa ar mhafi gi njohya, nu'ge hinxka ntsa̱wi ar u̱gi xi m'u̱i ri bötsi. Ngetho nu'ge xi hye̱k'a ri dömebya, ma gi 'ñe nze̱ye̱ ya bötsi, ne gi töta togo 'ñe ár döme. 28Tsi kuhu̱, nuju̱ yá bötsigihu̱ Jö xki ñhötkagihu̱, jangu ar Isa bi m'u̱i xki ñhöt'a Jö. 29Nö'ö ár t'u̱ ar 'be̱hñö mi m'e̱go, bi m'u̱i ngu m'u̱ gatho nu'u̱ ma'ra ya bötsi, ne xa bi u̱tsa nö'ö ar t'u̱ togo bi m'u̱i ngu xki ñhöt'i. Njap'u̱ nuya payu̱ n'ehe. Nuju̱ xta m'u̱hu̱ hár ts'e̱di ár Hñö Jö, t'u̱tsagihu̱ n'ehe. 30Ha te mönga ár T'ofo Jö. Ar Abra bi nsipabi nda gu ar 'be̱hñö mi m'e̱go, nda me̱wi ár bötsi. Ngetho nö'ö ár t'u̱p'u̱'ö, hinda ñhehwi ar hño bi ts'okwabi ár t'u̱ ar 'be̱hñö himi m'e̱go. 31Jange tsi kuhu̱, di njanguhu̱ ár bötsi ar 'be̱hñö himi m'e̱go, hinge ngu ár bötsi ar 'be̱hñö m'e̱go.

will be added

X\