AR GALATA 3

1Nu'ahu̱ gar menguhu̱ Galasia, xa xka 'be̱ ri mfenihu̱. Togo xi pomp'a ri mfenihu̱ hingi ne gi te̱ñhu̱ nö'ö majöni. Ngetho dá ot'ahe xiñho ar 'ñu hanja bi du ar tsi Hmu Hesukristo har pont'i. 2Di ne gi xikagihu̱: Hage ga hñöñhu̱ ár Hñö Jö ngetho ngi te̱mfu̱ yá 'be̱pate ar Moise. Hage hinga hñöñhu̱ ngetho ga ñ'emu̱ibihu̱ ár mhö Jö ga 'yo̱hu̱. 3Xi'mu̱, hanja xka 'be̱ ri mfenihu̱. Nu'ahu̱ ga ku̱thu̱ hár 'ñu Jö ngi hömpabihu̱ ár ts'e̱di ár Hñö Jö, xipya, hage gi beñhu̱ da tsa̱ gi nehu̱ nunar 'ñunu̱ ha ri ts'e̱dise̱hu̱. 4Hage ma da m'e̱p'u̱tho gatho nö'ö xka thohu̱. Hin'ö, hinda ma da njap'u̱tho. 5Jö xi 'ra'ahu̱ ár Hñö, ne xi ut'ahu̱ nze̱ye̱ ya döta ñho. Hage xi 'yo̱t'a njap'u̱ ngetho gi umba ri mu̱ihu̱ gi te̱mfu̱ yá 'be̱pate ar Moise. Hin'ö. Nunu̱ xi 'yo̱t'a njap'u̱ ngetho xka ñ'emu̱ihu̱ ar hoga mhö. 6Njap'u̱ n'ehe ar Abra, har T'ofo enö bi ñ'emu̱ibi Jö, ne bi nhu hinte ma ts'oki mi tu. 7Jange pöhu̱, nu'u̱ togo ñ'emu̱i, gehyu̱ yá bötsi ar Abra. 8Maha'mu̱ Jö xki beni, nu'ahu̱ hingya xodyohu̱, nda nhu'ahu̱ hinte ma ts'oki gi tuhu̱ nu'mu̱ gi jamfihu̱. Jange mam'e̱t'o bi xipa ar Abra ar hoga mhö, ngu mönga hár T'ofo Jö habu̱ enö: Ngetho xka ñ'emu̱igi, jange ma ga jöp'a'i, ne nunar jöpinu̱ ma da zu̱ gatho ya jö'i 'bu̱ hár nxidi ar ximha̱i. 9Jange nu'u̱ togo pe̱'sa ar jamfi, gehyu̱ njöpi mahye̱giwi ar Abra togo m'e̱t'o bi jamfi. 10Ha nu'u̱ hu yá mu̱i ma da mpo̱ho̱ o̱t'wa yá 'be̱pate ar Moise, hinda ma da k'ont'i da zu̱pa ár kwe̱ Jö. Ngetho har T'ofo enö: Nö'ö togo hinda 'yo̱t'a gatho ngu mönga ya 'be̱pate, hinda ma da k'ont'i da zu̱pa ár kwe̱ Jö. 11Di pöhu̱ nu'mu̱ di ñ'emu̱ihu̱, nhugagihu̱ hinte ma ts'oki di tuhu̱, hinge nu'mu̱ di te̱ñhu̱ ya 'be̱pate. Ngetho enga har T'ofo: Nö'ö togo ñ'emu̱i, 'bu̱i xiñho hár nthandi Jö, ne pe̱'sa ar te hiñham'u̱ da göts'i. 12Nö'ö togo te̱nga ya 'be̱pate, hingi 'bu̱ har jamfi. Ngetho hár T'ofo Jö enö njawa: Nö'ö togo te̱nga ya 'be̱pate, gehnu̱ ár m'u̱i'ö. 13Ha nunar tsi Hmu Hesukristo, bi ñöngagihu̱ hinda zu̱ju̱ ár kwe̱ Jö huxa har T'ofo. Bi hñönse̱ ár kwe̱ Jö ndi 'ñepkagihu̱hmö nú'mu̱ mi du har pont'i. Ngetho enga hár T'ofo Jö: Nö'ö togo zu̱ har za, gehnu̱ xi zu̱twa ár kwe̱ Jö. 14Bi jap'u̱, ne nu'ahu̱ hingya xodyohu̱ bi tsa̱ ga hñöñhu̱ ar njöpi xki ñhöt'wa ar Abra, ngetho xka ñ'emu̱ihu̱ ar tsi Hmu Hesukristo. Ne nu'ahu̱ nguje, xka hñömfu̱ ár Hñö Jö ngetho xka ñ'emu̱ihu̱. 15Ma tsi ku'ahu̱, ma ga he̱ju̱ ár nkohi Jö ne ár nkohi ar jö'i. Nu'mu̱ yoho ya jö'i da 'yo̱t'a n'ar nkohi, ne da ñö'u̱ xiñho da 'yo̱t'u̱, hinto tsa̱ togo da hñöki wa da pa̱ta nuna nkohi'ö, mödi bi nko ya jö'itho. 16Jö bi umba n'ar ñhöt'i ar Abra ne ár n'ogi. Himbi 'ñembabi: Nu'u̱ ri n'ogi. Himbi no̱mba yá 'be̱to ne yá ma̱nga'be̱to. Bi no̱nga n'adar n'ogi, ne bi 'ñembabi: Nuna ri n'ogi. Ne nupya di pöhu̱ togo nunar n'oginu̱, gehnu̱ ar tsi Hmu Hesukristo. 17Nupya ma ga xi'ahu̱ 'mu̱: Nö'ö ar nkohi Jö bi nkohwi ar Abra ne bi ñöwi xiñho, no̱nga ar tsi Hmu Hesukristo. Bi tho gohonthebe ne n'a̱tema're̱t'a nje̱ye̱, ne ka bi t'unga ya 'be̱pate. Nuya 'be̱pateyu̱ himbi tsa̱ bi hñökwa ár ts'e̱di nunar nkohi ne da m'e̱ ar ñhöt'i. 18Nu'mu̱ Jö xi 'rakagihu̱hmö ya njöpi ngetho di te̱ñhu̱ ya 'be̱pate, hingi 'rakagihu̱ xi ñötkagihu̱ 'mu̱. Ha nunar Abra bi hñönga ar njöpi ngetho xki ñhötwabi nda t'umbabi. 19Nu'mú̱, yo'ö bi t'unga ya 'be̱pate. Bi t'uni bi utkagihu̱ tengu ar ts'oki. Bi me̱'sa ár ts'e̱di ne bi göxa nú'mu̱ mi zo̱ ar tsi Hmu Hesukristo, gehnu̱ ar n'ogi xki t'umbabi ar ñhöt'i. Nuya 'be̱pate bi t'umba ya e̱nxe̱, ne nu'u̱ bi umba n'a togo bi thokwabi gatho nu'u̱ ma'ra ya jö'i. 20Gese̱ Jö togo unga nunar ñhöt'inu̱, himi njo'o man'a to bi thoki. 21Xi'mu̱, hage yá 'be̱pate ar Moise nto̱xkwi ár ñhöt'i Jö. Hin'ö. Ngetho nu'mu̱ ya 'be̱pate xi za̱hmö xi 'rakagihu̱ n'ar 'ra'yo te, nu'mú̱ xi za̱ xi nhugagihu̱ hinte ma ts'oki di tuhu̱ ndi te̱ñhu̱ ya 'be̱pate. 22Ha nu hár T'ofo Jö, xikagihu̱ gatho xki jokagihu̱ har ts'oki, ne nu'mu̱ nga ñ'emu̱ihu̱ ar tsi Hmu Hesukristo, nda tsa̱ nga höñhu̱ nunar ñhöt'inu̱. 23Bi ñötkagihu̱ nú'mu̱ hinxki zo̱ta ar tsi Hmu Hesukristo ne nda tsa̱ nga ñ'emu̱ihu̱. Ge'mu̱ xki gokagihu̱ ya 'be̱pate, ne xki t'e̱ntkagihu̱ nga jamfihu̱ nunar jamfi ma nda ñ'udi. 24Jange ya 'be̱pate bi njangu n'ar 'be̱go su ya bötsi. Bi utkagihu̱ hanja nga 'bu̱hu̱, ne nga ñ'emu̱ihu̱ ar tsi Hmu Hesukristo nú'mu̱ mi ñ'udi. Ne njap'u̱ nda nhugagihu̱ hinte ma ts'oki di tuhu̱. 25Ha nú'mu̱ dá ñ'emu̱ihu̱, bi wadi mi sugagihu̱pya ar 'be̱go. 26Nupya gatho yá bötsigihu̱ Jö, ngetho xta ñ'emu̱ihu̱ ar tsi Hmu Hesukristo. 27Nuju̱ xta höñhu̱ ar xixthe ngetho xta ñ'emu̱ihu̱ ar tsi Hmu Hesukristo. Ne ar tsi Hmu kobgathogihu̱ ngu n'ar 'ra'yo he nza̱tho. 28Nupya hingi nthahni togo ya xodyo togo hingya xodyo, togo ya 'be̱go togo hingya 'be̱go, togo ar ñ'o̱ho̱ togo ar 'be̱hñö. Gathogihu̱ di n'ase̱hu̱ ngetho xta ñ'emu̱ihu̱ ar tsi Hmu Hesukristo. 29Nu'mu̱ yá me̱tigihu̱ ar tsi Hmu Hesukristo, yá n'ogigihu̱ ar Abra 'mu̱, ne go ma me̱tihu̱ nunar njöpi bi ñhöt'a ar Abra.

will be added

X\