AR GALATA 2

1Mi tho 're̱t'amagoho nje̱ye̱, da penga ár yo'gi man'agi har hnini Herusalen. Da me̱'be 'mu̱ ar ku Berhnabe, ne da tsixa ar ku Tito n'ehe. 2Da manu̱ ngetho Jö bi utkagi nga ma. Ne da ñö'bese̱nu̱ nu'u̱ ma ya ndö har nijö, ndi ne nda bö'u̱ ar hoga mhö di xipabi ya jö'i hingya xodyo. Da jap'u̱ ndi honi hinge nda m'e̱ ma 'be̱fi. 3Nunar ku Tito ndi ñ'o'be, mödi mar me Gresia, himbi njapi bi nthuspa ar nse̱gi hár ndo'yo ngu o̱t'a ya xodyo. 4Himbi njapi nda jap'u̱, mödi nuya hya̱te gamfi mi ku̱t'a mi 'ñöxte ha ya mhunts'i. Mi ne nda bö'u̱ yo'ö hinge ndi te̱mfe yá 'be̱pate ar Moise, ho̱nse̱ ndi te̱ñhe ar tsi Hmu Hesukristo, togo bi gu̱gagihe ha ya 'be̱pateyu̱. Mi ne nda jajeyu̱ nga te̱ñhe ya 'be̱pate man'agi. 5Ha nuje hinda o̱the nö'ö mi möñ'u̱, ne njap'u̱ hingi 'be̱hu̱ nö'ö majöni mönga ar hoga mhö xta hös'ahe. 6Nu'u̱ ma ya ndö har nijö hinte bi hñu'sa nö'ö ndi mönga. Nuga hindi jamasu tema nsu xi me̱ts'i, ngetho hár nthandi Jö gatho ya jö'i mahye̱tho. 7Nuya ndö bi bö'u̱ xiñho, xki me̱nkagi Jö ga zo nu'u̱ hingya xodyo, ngu xki me̱hna ar ku Pedro nda zohna ya xodyo. 8Nunar tsi Hmu bi ma̱xa ar ku Pedro bi zohna ya xodyo, getnu̱ ar tsi Hmu togo xi ma̱xkagi ga zohna nu'u̱ hingya xodyo n'ehe. 9Nú'mu̱ mi bö ya ndö xki hwëgagi Jö nunar 'be̱finu̱ ga zo nu'u̱ hingya xodyo, nu'mú̱ ar ku Hakobo, ar ku Pedro ne ar ku Xuwa nu'u̱ ma ya ñöxhmu, bi 'raje yá 'ye̱, nuga ne ar ku Berhnabe. Da mhi'ye̱he ngu n'ar nkohi ga zoje nu'u̱ hingya xodyo, ne nu'u̱ da zo ya xodyo. 10Ho̱nse̱ bi xikagihe hinga pumhnihe ya hyoya, ne nuga ndi umba ma mu̱i ndi fa̱x'u̱. 11M'e̱fa ar Pedro ba e har hnini Antiokia. Da ñhant'be ne da tsu̱i, ngetho himi ho nö'ö mi o̱t'e. 12Ja mi zo̱ntho hö, mi o̱t'e xiñho, mi ñungwi mahye̱gi ya ku himya xodyo. Ha mi zo̱ ma'ra ya ku xki me̱hna ar Hakobo, nu'mú̱ ar Pedro bi ndu̱i bi 'wege, bi hye̱ ya ku himi ne nda ñungwi. Mi jap'u̱ ngetho mi tsu te nda mönga nu'u̱ ya ku mi te̱mba ár nt'umbi ya xodyo, thutwa ar nse̱gi ha yá ndo'yo. 13Ma'ra ya ku nu'u̱ ma ya xodyo n'ehe, bi de̱nga ar Pedro, ne bi pongyá hmi. Har Berhnabe himbi bongi, bi nkadi bi de̱ñ'u̱ n'ehe. 14Jange nú'mu̱ nda pödi himi te̱nga xiñho nö'ö majöni mönga ar hoga mhö, da zofo ar Pedro ha yá nthandi ya ku, ne da embabi: Nu'ge gar xodyo, ne ga hye̱p'u̱ ya 'be̱pate, ngi ñhe̱hwitho nu'u̱ hingya xodyo. Xi'mu̱, hanja gi ne gi japi da de̱nga ya 'be̱pate nuya ku hingya xodyo. 15Nuju̱ dar xodyohu̱ ngu nda m'u̱thu̱, ne ndi te̱mfu̱ yá 'be̱pate ar Moise, hinge ngu nu'u̱ hingya xodyo hingi te̱nga nuya 'be̱pateyu̱, jange nhu ngu ya 'yo̱t'ats'oki. 16Ha nupya di pöhu̱, nö'ö togo da ñ'emu̱i ar tsi Hmu Hesukristo, nhu hinte ma ts'oki tu, hinge nú'mu̱ da 'yo̱twa gatho yá 'be̱pate ar Moise. Nuju̱ n'ehe xta ñ'emu̱ihu̱ ar tsi Hmu Hesukristo, hinga tuxu̱ ma ts'okihu̱ ngetho xta jamfihu̱, hinge xi ma̱xkagihu̱ nö'ö di te̱ñhu̱ nuya 'be̱pateyu̱. Ngetho di pöhu̱, gatho nu'u̱ te̱nga ya 'be̱pate, hinto ma da nsipabi hinte ma ts'oki tu. 17Nú'mu̱ nda ñ'emu̱ihu̱ ar tsi Hmu Hesukristo ne bi nhugagihu̱ hinte ma ts'oki ndi tuhu̱, hage da o̱thu̱ n'ar ts'oki njap'u̱ 'mu̱. Wa ar tsi Hmu Hesukristo uta ar ts'oki ya jö'i. Hin'ö hingi njap'u̱. 18Ha nu'mu̱ ga penju̱ ga te̱ñhu̱ man'agi ya 'be̱pate xta tho̱hu̱p'u̱, njap'u̱ hö, dar ts'oktehu̱. 19Gese̱ ya 'be̱pate po̱ntho bi hyogagi, ne nupya xta pengi ga 'bu̱i ga pe̱pabi Jö. 20Nú'mu̱ mi mpont'a ar tsi Hmu Hesukristo, wande bi mpontk'agi n'ehe. Jange hindi 'bu̱i ga o̱t'a nö'ö di bense̱. Nupya ar tsi Hmu Hesukristo 'bu̱ ha ma mu̱i. Ne nö'ö di o̱t'a hyax'mu̱, di o̱t'e di ñ'emu̱ibi ár T'u̱ Jö, togo bi mökagi ne bi unga ár te bi po̱kagi. 21Nuga hindi u̱tsabi nö'ö xi hwëgagi Jö. Ngetho nu'mu̱ di möñhu̱ xi za̱mhö ga mpo̱hu̱ di te̱mfu̱ yá 'be̱pate ar Moise, njap'u̱ di möñhu̱ hinter me̱'ö ár te ar tsi Hmu Hesukristo bi um'u̱.

will be added

X\