1 Nuga dar Pablo, ár mpo̱tegi ar tsi Hmu Hesukristo. Hinxi hñuxkagi ar jö'i, hinxi me̱nkagi n'ar meximha̱i. Gese̱ ar tsi Hmu Hesukristo bi zokagi, ne gese̱'ö Jö ma Dadahu̱, gehnu̱ bi ko'spa ár te man'agi. 2 Nuga ne gatho ya ku di 'bu̱'bewa, di pe̱ñ'ahe nunar he̱'minu̱, gatho nu'ahu̱ gi mhunsu̱ ha ya nijö hár ha̱i Galasia. 3 Jö ma Dadahu̱ ne ma tsi Hmuhu̱ Hesukristo da 'ra'ahu̱ n'ar hogam'u̱i ne da hwëk'ahu̱ yá ñho. 4 Jö ma Dadahu̱ bi nese̱ nda me̱hna ma tsi Hmuhu̱ Hesukristo nda unse̱ ár te, ne njap'u̱ nda hñögagihu̱ ma ts'okihu̱. Ha nupya ñöngagihu̱ hinte da jakagihu̱ nunar ts'oximha̱i nuya payu̱. 5 Jö di 'ñepabi da t'e'spa ár nsu hiñham'u̱ da göts'i. Dá njap'u̱. 6 Xa di 'yo̱tho hanja ngut'a xka hye̱hu̱ Jö, togo bi zoñ'ahu̱ gi hñöñhu̱ nö'ö te xi hwëk'ahu̱ ar tsi Hmu Hesukristo. Ne gi ne gi 'weñhu̱ gi te̱ñhu̱ man'ar mhö nö'ö hinxi xikagihu̱ ar tsi Hmu. 7 Xa majöni, hiñ'otho man'ar hoga mhö, mödi xi zo̱ 'ra nu'u̱ togo ne da pomp'a ri mfenihu̱, ne da ts'okwahmö ár hoga mhö ar tsi Hmu Hesukristo. 8 Nu'u̱ togo o̱t'a njap'u̱, hinda ma da k'ont'i da hñömba ár kwe̱ Jö. Mödi n'aje, wa n'ar e̱nxe̱ di 'ñe mhets'i, ne da pa̱ta nö'ö ar hoga mhö xta ut'ahe, hinda ma da k'ont'i da hñömba ár kwe̱ Jö. 9 Xta xi'ahe, ne di xi'ahu̱ man'agi, nu'mu̱ n'ar jö'i da e da xi'ahu̱ man'ar mhö n'añ'o, hingi ñhe̱hwi nuna xka ñ'emu̱ihu̱, nor jö'i'ö hinda ma da k'ont'i da hñömba ár kwe̱ Jö. 10 Ngu gi pöhu̱ xiñho, hindi mönga njap'u̱ di honi da numañhogi ya jö'i. Di honi da numañhogi Jö. Hindi umba ma mu̱i ga ko'be xiñho ya jö'i, ngetho nu'mu̱ ga o̱t'a njap'u̱, hindi pe̱pa ar tsi Hmu Hesukristo. 11 Ma tsi kuhu̱, di ne gi pöhu̱, nunar hoga mhö di mönga, hingo di mönse̱ga, ne hinxi xikagi ya jö'i. 12 Nunar hoga mhö di mö, gese̱ ar tsi Hmu Hesukristo bi utkagi. Hinxi utkagi ya jö'i, hinxta höni xi 'rakagi'u̱. 13 Nu'ahu̱ xka pöhu̱ hanja ndi 'bu̱ mam'e̱t'o nú'mu̱ ndi te̱mba yá nt'umbi ma mixodyo'be. Nuga xa ndi e ar m'u̱i yá gamfi Jö, xa ndi nemhö nga ho gatho'u̱. 14 Ndi töta nze̱ye̱ ma mixodyo'be mi 'bu̱ nuya pa'u̱. Xa ndi umba ma mu̱i ndi te̱nga ya nt'umbi xki zogagihe ma palehe. 15 Ha nú'mu̱ hinge ndi m'u̱tho, Jö xki 'wegagi nga pe̱pabi, ne bi hwëgagi bi zonkagi. Ne nu mi zo̱ ar pa xki beñ'ö, 16 bi utkagi togo ár T'u̱, ne nga xipa ár thuhu nu'u̱ hingya xodyo. Nú'mu̱ nda ndu̱i da mpe̱fi, hinda a̱mba m'e̱t'o n'ar jö'i. 17 Hinda ma Herusalen ma da a̱par se̱ki nu'u̱ ma yá mpo̱te m'e̱t'o. Nö'ö da o̱t'e, da ju̱ ar 'ñu da ma har ha̱i Arabia. M'e̱fa da penga har hnini Ndamasko. 18 Mi tho hñu nje̱ye̱ da ndu̱i da ñ'emu̱i, nu'mú̱ hö, da ma Herusalen ma da k'ö'sa ar Pedro, ne da 'bu̱'benu̱ n'e̱tku̱t'a. 19 Hinto ma'ra ya mpo̱te da nthe̱'benu̱, ho̱nse̱ ar Hakobo nö'ö ár jödö ar tsi Hmu go da nthe̱'benu̱'ö. 20 Jö pödi nö'ö di xi'ahu̱ majöni, hindi ka'ahu̱. 21 M'e̱fa da ma har ha̱i Nsiria ne Nsilisia. 22 Nuya pa'u̱ himi pökagi nuya ku me Nhudea xki ñ'emu̱i ar tsi Hmu Hesukristo nguga n'ehe. 23 Nuyu̱ ho̱nse̱ xki 'yo̱de mam'e̱t'o ndi e ar m'u̱i ya ku. Ha nupya di xipa ma'ra xiñho nö'ö ar jamfi mam'e̱t'o ndi ne nga hwati. 24 Jange ya ku xa mi nsunda Jö, ngetho xki bödi xta ñ'emu̱iga n'ehe.
