AR EFESIO 6

1Bötsihu̱, 'yo̱thu̱ ri menguhu̱ ngetho gi 'bu̱hwihu̱ ar tsi Hmu. Gehnu̱ xiñho'ö. 2'Yo̱thu̱ ngu mönga ár mhö Jö habu̱ enö: 'Ñe'sfu̱ ár nsu ri dada ne ri nönö, gehnu̱ ar 'be̱t'o 'be̱pate ñöt'ahu̱ ar ñhöt'i. 3Nunar ñhöt'inu̱ mö gi pe̱'sa n'ar hogam'u̱i ne gi 'bu̱kwa nze̱ye̱ ya pa har ximha̱i. 4Ha nu'ahu̱ gar dadahu̱ ne nu'ahu̱ gar nönöhu̱, yo gi po̱mfu̱ ár kwe̱ ri bötsihu̱. Hñöjwu̱ nö'ö hingi ho ne uthwu̱ ár 'ñu ar tsi Hmu. 5Nu'ahu̱ gi m'e̱gohu̱, 'yo̱thu̱ ri hmuhu̱wa har ximha̱i. 'Ñe'sfu̱ ár nsu, ne tsit'a ri mu̱i gi pe̱fu̱, to da 'ñenö gi pe̱fu̱ ar tsi Hmu Hesukristo. 6Mpe̱hu̱ xiñho, hinge ho̱nse̱ nú'mu̱ hant'ahu̱ ri hmuhu̱ gi ne gi kohu̱ xiñho. Ngu yá 'be̱go'ihu̱ ar tsi Hmu Hesukristo, di tsit'a ri mu̱ihu̱ gi 'yo̱thu̱ Jö. 7Xa gi nese̱hu̱ gi mpe̱hu̱, hinge jangu gi pe̱fu̱ n'ar jö'i, 'yo̱thu̱ wande gi pe̱pabihu̱ ar tsi Hmu. 8Beñhu̱, nunar tsi Hmu ma da 'ra'ahu̱ ar njut'i, ngu nö'ö ar ñho xka 'yo̱thu̱ n'a ngu n'a, wa gi 'ñehu̱ ri hmuhu̱, wa gar hmuhu̱. 9Nu'ahu̱ gar hmuhu̱, 'yo̱t'wabihu̱ ar ñho ri 'be̱gohu̱, yo gi pihu̱. Beñhu̱, nu'ahu̱ ngu'u̱ bi 'bu̱ n'a ri Hmuhu̱ mañö mhets'i, ne nö'ö hingi hwanta ya jö'i. 10Nupya tsi kuhu̱, gi hömfu̱ ár döta ts'e̱di ar tsi Hmu, gehnu̱ da ze̱t'a ri mu̱ihu̱. 11Ngu ñhoka n'ar ndogu di ma har tuhni, njap'u̱ nu'ahu̱ n'ehe, hyehu̱ ar he xi 'ra'ahu̱ Jö, da ma̱x'ahu̱ gi tse̱thwu̱ yá nhemhñö ar ts'ondöhi. 12Ngetho hindi ntunkwihu̱ ma mijö'ihu̱. Di nto̱xkwihu̱ nu'u̱ pe̱'sa yá nsu, ne pe̱'sa yá ts'e̱di, ne ya ndö har 'be̱xui nuya payu̱, ne gatho nuya ts'ondöhi bi nsa̱nga mañö har ndöhi. 13Jange hyehu̱ xiñho nö'ö ar he tuhni xi 'ra'ahu̱ Jö, ne gi tse̱thu̱ nuya pa gi thohu̱ ya thogi. Ne xki ntötehu̱, yo ma gi ñhe̱hu̱ da hyo̱m'ahu̱ ha̱i. 14Jange umba ri mu̱ihu̱ gi tse̱thu̱, ne gi pe̱'su̱ nö'ö majöni ngu n'ar böt'i xka ngu̱thu̱ xiñho, ne ar hogajö'i ngu n'ar hebo̱jö ta̱k'ahu̱. 15Ngu su yá wa n'ar ndogu da za̱ da ñ'o xiñho har tuhni, njap'u̱ nu'ahu̱ n'ehe, ñhoju̱ habu̱ gatho gi möhu̱ gi mömfu̱ ár mhö Jö unga ar hogam'u̱i. 16Ne gi pe̱'su̱ ar jamfi, ngu n'ar ntha̱ki gi ta̱jwu̱ gatho yá nk'ahni ngu ya tsibi bi e̱mp'ahu̱ ar ts'ondöhi. 17Gi suhu̱ ar mpo̱ho̱, ngu n'ar fu̱ibo̱jö da da̱k'ahu̱ ri ñöhu̱. Ne gi hñöhu̱ ár mhö Jö, ngu n'ar ndo̱jwai 'ra'ahu̱ ár Hñö Jö. 18Ne hyax'mu̱ hinda za̱'ahu̱ gi 'ya̱fu̱ Jö gi hömfu̱ ár ts'e̱di ár Hñö. Hingi tsa̱ya̱ gi to̱'mthohu̱ da ma̱x'ahu̱. Hinge ho̱nse̱ nu'ahu̱, 'ya̱fu̱ da ma̱xa gatho nu ma'ra ya gamfi n'ehe. 19'Ya̱pabihu̱ Jö da ma̱xkagiga n'ehe. Nú'mu̱ xka ñö, da t'aka tema ga mö. Ne hinga ntsu ga zo ya jö'i, ne da zo yá mfeni nunar hoga mhö hinxki fö mam'e̱t'o. 20Jange nuga dar m'e̱hni di mönga ar hoga mhö, ne xi thutka nuya bo̱jöyu̱. 'Ya̱fu̱ Jö da ma̱xkagi hinga ntsu ga mönga nunar hoga mhönu̱, ngu xiñho ga ñö. 21Di pe̱ñ'ahu̱ ma hmöka ku Tikiko, gehnu̱ da xi'ahu̱ tema di pe̱fi ne tengu di thokwa. Nu xta zo̱mp'u̱, nuhu̱ ngu n'ár hoga 'be̱go ar tsi Hmu. 22Jange di pe̱ñ'a'ihu̱p'u̱ da met'ahu̱ tengu di 'bu̱hewa, ne da hup'a ri mu̱ihu̱. 23Jö ar Dada ne ar tsi Hmu Hesukristo da jöp'ahu̱ mahye̱gi gatho nu ma'ra ya ku, gi 'bu̱hu̱ ter entho, gi mhöhu̱ n'a ngu n'a, di pe̱wi ar jamfi. 24Jö da hwëk'ahu̱ yá ñho, gatho nu'ahu̱ gi möhu̱ ar tsi Hmu Hesukristo ha n'ar mhöte hingi thege. Dá njap'u̱.

will be added

X\