AR EFESIO 5

1Umba ri mu̱ihu̱ gi te̱mfu̱ ár m'u̱i Jö, ngetho go yá hmöka bötsi'ihu̱. 2'Bu̱hu̱ gi mhöhu̱ n'a ngu n'a ngu bi mökagihu̱ ar tsi Hmu Hesukristo. Bi gutka ma tha̱ihu̱ nú'mu̱ mi unga ár te har pont'i, ngu n'ar m'o̱ñho̱ yu̱ni xiñho m'o̱'spa Jö. 3Nu'u̱ xka jamfihu̱, yo gi 'be̱ngwihu̱ n'ar jö'i nö'ö hingo ri nthötihu̱, yo gi benthu̱ nö'ö xints'otho, yo xa gi möhu̱ ar bojö, hingi no̱ñhu̱ nuya ts'okiyu̱. 'Bu̱hu̱ ngu di 'ñepi da m'u̱ n'ar gamfi. 4Yo gar ts'onehu̱, yo gi ñöhu̱ ñ'entho, yo gi ñ'önt'u̱hu̱, ngetho hingi ho da 'yo̱t'a njap'u̱ ya gamfi. Nö'ö xiñho gi 'yo̱thu̱, umfu̱ njamödi Jö. 5Pöhu̱ xiñho hinda ma da yu̱t'a da ndöwi ar tsi Hmu Hesukristo bi 'bu̱hwi Jö, gatho nu'u̱ 'be̱ngwi ya jö'i, nu'u̱ te̱nga ar ts'oki, ne nu'u̱ xa mö ar bojö, po̱ntho ndöñ'u̱. 6Yo ma gi ñhe̱hu̱ togo da hya̱'ahu̱ ya nemhñö, ngetho nuya ts'okiyu̱ japi da e ár kwe̱ Jö da zu̱ nuya me̱'sku. 7Jange yo gi ñ'owihu̱ nu'u̱ togo o̱t'a nuya ts'o'be̱fiyu̱. 8Mam'e̱t'o ngi 'bu̱hu̱ har 'be̱xui, ha nupya gi 'bu̱hwihu̱ ar tsi Hmu har hyats'i. 'Bu̱hu̱ ngu nu'u̱ 'yo hár hyats'i Jö. 9Ngetho nuya 'bu̱ har hyats'i, ár Hñö Jö fa̱ts'i da ñhogajö'i, da me̱'sa ar hogam'u̱i, ne di mönga nö'ö majöni. 10Umba ri mu̱ihu̱ gi 'yo̱thu̱ nö'ö numañho ar tsi Hmu. 11Ne yo gi te̱mfu̱ yá 'be̱fi nu'u̱ togo 'bu̱ har 'be̱xui, hinte ár ñho. Nö'ö gi 'yo̱thu̱, xipabihu̱ hingi ho nö'ö pe̱'u̱. 12Ngetho n'ar m'e̱tsa̱ ga no̱ñhu̱ nö'ö o̱t'u̱ ñ'öntho. 13Ha nu'mu̱ da t'e'spa ar ñot'i nuya ts'o'be̱fi pe̱'u̱, nu'mú̱ hö, da födi tema di bo̱nga nuya te pe̱'u̱, ngetho har ñot'i ka nhekinu̱ xo̱ge. 14Jange xi t'enö njawa: Nu'ge gi öhö, nuhu, po̱nga nup'u̱ hár t'a̱gi nu'u̱ xi du, ne ar tsi Hmu Hesukristo da yot'a'i. 15Pöhu̱ xiñho hanja gi 'bu̱hu̱. 'Bu̱hu̱ ngu nu'u̱ pe̱'sa yá mfödi, hingi 'bu̱hu̱ ngu nu'u̱ hinte pödi. 16Yo gi huhu̱, umba ri mu̱ihu̱ gi 'yo̱thu̱ nö'ö xiñho, ngetho nuya payu̱ di 'bu̱hu̱ xints'otho. 17Yo gi ñhe̱hu̱tho, umba ri mu̱ihu̱ gi pöhu̱ nö'ö ne Jö gi 'yo̱thu̱. 18Yo gi ntihu̱, ngetho ar mihni ma da ja'ahu̱ gi nts'oju̱. Nö'ö xiñho gi 'yo̱thu̱, hyoñhu̱ xa di ziñ'ahu̱ ár Hñö Jö. 19Nú'mu̱ gi ñöhu̱, no̱ñhu̱ ya hoga nsa̱di, ya jöhñö ne ya hoga thuhu. Tuthwu̱ ne gi 'ye̱nt'a ri mu̱ihu̱ gi xa̱thu̱ Jö. 20Gatho nö'ö di 'ñep'ahu̱, umfu̱ njamödi Jö ar Dada hár thuhu ma tsi Hmuhu̱ Hesukristo. 21Ngetho gi tsufu̱ ar tsi Hmu, ñ'o̱thu̱ n'a ngu n'a. 22'Be̱hñöhu̱ xka nthöthu̱, 'yo̱thu̱ ri dömese̱hu̱ ngu gi o̱thu̱ ar tsi Hmu Hesukristo. 23Ngetho ar döme gehnu̱ ár ñöxhmu ar 'be̱hñö, ngu ar tsi Hmu Hesukristo ár ñöxhmu ar nijö, ne ar nijö gehnu̱ ár ndo'yo ar tsi Hmu togo ár Po̱ho̱te. 24Jange ngu ar nijö o̱ta ar tsi Hmu Hesukristo, njap'u̱ nuya 'be̱hñö da 'yo̱t'a gatho nö'ö te da xipa yá döme. 25Dömehu̱, mö ri 'be̱hñöhu̱ ngu ar tsi Hmu Hesukristo bi mö ár nijö, ne bi unse̱ ár te bi po̱ho̱. 26Bi du, ne njap'u̱ bi hñögagihu̱ ma ts'okihu̱, mi xu̱ga ma mu̱ihu̱ ndi o̱'sfu̱ ne ndi o̱thwu̱ ár mhö. 27Bi xu̱gagihu̱ ne nda 'ba̱bgagihu̱ hár nthandise̱ ngu ár nijö xa nza̱tho, hinte xi ja̱xt'i ne hinxi gu̱xt'i, da thandi dar nt'axi ne xa 'bu̱i xiñho. 28Njahu̱p'u̱ nu'ahu̱ gar dömehu̱ n'ehe, möhu̱ ri 'be̱hñöhu̱ ngu gi möse̱ ri ndo'yohu̱. Nö'ö to mö ár 'be̱hñö, mhöse̱ n'ehe. 29Ngetho hinto u̱tsase̱ ár ndo'yo, gi pöhu̱ 'wini ne su, jangu ar tsi Hmu Hesukristo su ar nijö. 30Geju̱ ár ndo'yogihu̱ ar tsi Hmu Hesukristo, ne n'a ngu n'a dar n'a xe̱nigihu̱ ár ndo'yo'ö. 31Jange enga hár T'ofo Jö, ar ñ'o̱ho̱ da zop'u̱ ár dada ne ár nönö, ne da m'u̱hwi ár 'be̱hñö, ne nuya yohoyu̱ ma da n'atho. 32Xa xi ñhembi nunar nt'utinu̱, mödi nuga di he̱ka ar tsi Hmu Hesukristo ne ár nijö. 33Jange ma ga xi'ahu̱: N'a ngu n'a möhu̱ ri 'be̱hñöhu̱ ngu gi mhöse̱hu̱, ne nuya 'be̱hñö dá 'yo̱ta yá döme.

will be added

X\