AR EFESIO 4

1Nuga di owa har fa̱di ngetho di mömba ár mhö ma tsi Hmuhu̱, di a̱'ahu̱ gi 'bu̱hu̱ ngu di 'ñepi da m'u̱ nu'u̱ togo xi ts'ohni da mbötsi Jö. 2Yo gi ñ'exu̱, nts'a̱'mthohu̱. Pe̱'su̱ n'ar hogamu̱i ne ar ts'e̱ti, ne gi mhöhu̱ n'a ngu n'a. 3Nu'ahu̱ gi n'ase̱hu̱ ngetho n'ada ár Hñö Jö 'bu̱ ha ri mu̱ihu̱. Jange umba ri mu̱ihu̱ gi pe̱'su̱ n'adar mfeni, ne gi 'bu̱hu̱ n'ar hogam'u̱i. 4Ngetho di n'adar ndo'yohu̱, n'adár Hñö Jö 'bu̱ ha ma mu̱ihu̱, jangu xi ts'onkagihu̱ n'ehe ga pe̱'su̱ n'adar ndo̱'mi. 5N'adar tsi Hmu di zohu̱, n'ada ma ñ'emu̱ihu̱, ne n'adar xixthe xta höñhu̱. 6N'adar Jö togo ma Dadahu̱ gatho nu'u̱ di 'bu̱hu̱. Ár ts'e̱di hexkagihu̱, ne 'rakagihu̱ ár mfa̱ts'i di gathohu̱, ne 'bu̱ ha ma mu̱ihu̱. 7N'a ngu n'a bi hwëgagihu̱ ar tsi Hmu Hesukristo n'ar hogant'uni ngu ár nt'e̱ni'ö. 8Jange bi thogi ngu mönga ár T'ofo Jö habu̱ enö: Ar tsi Hmu bi ntöte ne bi bo̱xa mhets'i, bi zixa nu'u̱ xki döhö, ne bi hyemba ya nt'uni ya jö'i. 9Te di bo̱nga nö'ö enö bi bo̱xa mañö mhets'i. Ne da 'ñenö, nö'ö mi 'bu̱ mhets'i ba kökwa har ximha̱i. 10Nö'ö togo ba e har ximha̱i bi mengi bi bo̱xa man'agi har ngöxa mhets'i, ne njap'u̱ bi hyexta ár nsunda xo̱ge nö'ö xi thoki. 11Gese̱ bi 'ñex'ö 'ra ngu yá mpo̱te, ma'ra yá m'e̱hni, ma'ra nda mömba ár hoga mhö, ma'ra da mfa̱'yo ha yá nijö, ma'ra da utwa ár mhö Jö. 12Gathoyu̱ fa̱xte da ñöxa ár ñ'emu̱i ya ku, ne da me̱pa Jö'u̱ n'ehe. Ne njap'u̱ da te ar nijö, gehnu̱ ár ndo'yo ar tsi Hmu Hesukristo. 13Njap'u̱ ga jwahu̱ gatho ga pe̱'su̱ n'adar ñ'emu̱i, ne ga pötwabihu̱ xiñho ár T'u̱ Jö. Ga tso̱ñhu̱ ga ñhogajö'ihu̱, ne gatho ga ñhe̱hwihu̱ ár m'u̱i ar tsi Hmu Hesukristo. 14Hindi hñöxkagihu̱ ya t'u̱lo bötsi hingi pötetho, to gatho tsa̱ da kadi da me̱wi te̱mba yá jamfi. Nuya jö'iyu̱ ju̱ ar nhemhñö ne ya ts'omfeni japa ya ku da de̱nga nö'ö hingi ho. 15Nö'ö ma ga o̱thu̱, ga te̱ñhu̱ nö'ö majöni ne ga pe̱'su̱ ar mhöte. Njap'u̱ da ñöxa ma jamfihu̱, ne ga ñhe̱hwihu̱ ar tsi Hmu Hesukristo togo ár ñöxhmu ar nijö. 16Nunar nijö hömba ár ts'e̱di ar tsi Hmu, ne njap'u̱ n'a ngu n'a ya ku 'yo di ma̱xa ma'ra, ngu ar 'be̱fi xi t'umbabi. Ne 'yo di te, ne da me̱'sa yá ts'e̱di te̱nga ar mhöte. 17Di 'be̱p'ahu̱ hár thuhu ma tsi Hmuhu̱, gi hye̱hu̱ gi te̱mbathohu̱ yá m'u̱i nu'u̱ hinxi ñ'emu̱i, ngetho hinte mañho beñ'u̱. 18Xi me yá ñö, hingi ne da hñöñ'u̱ ar te unga Jö, ngetho hinte pö'u̱ ne xi got'a yá mu̱i. 19Bi 'be̱ yá mfeni, bi ñ'e̱nt'atho'u̱ bi 'yo̱t'a gatho nu'u̱ ya ts'oki mi ne'u̱, ne gor johya'u̱ da 'yo̱t'a nö'ö xints'otho. 20Ha nu'ahu̱ hinxi ut'ahu̱ njap'u̱ ar tsi Hmu Hesukristo, 21nu'mu̱ xa majöni xka 'yo̱hu̱ nö'ö xi möñ'ö, ne xka 'yo̱xu̱ nö'ö xa majöni ut'ö. 22Nö'ö ar m'u̱i ngi pe̱'su̱ maham'u̱, hye̱hu̱p'u̱ n'agitho. Ngu n'ar ze̱ dutu k'othu̱ 'ye̱ñhu̱p'u̱, xi zu̱ ar ts'o'yo, kate o̱t'a ar ts'oki. 23Hye̱hu̱ da n'a'yo ri mu̱ihu̱ ne ri mfenihu̱. 24Ne 'bu̱hu̱ nunar 'ra'yo m'u̱i xi t'a'ahu̱, ngu n'ar 'ra'yo he gi hyehu̱ xi thoki di hñöxa Jö, xa majöni ar hogajö'i ne xint'axi. 25Jange hye̱hup'u̱ ar nhemhñö. Möñhu̱ nö'ö majöni nú'mu̱ gi ñöwi ri ñ'owihu̱, ngetho di n'adar ndo'yohu̱ n'a ngu n'a. 26Nu'mu̱ da mbo̱ ri kwe̱hu̱, yo ma da hya̱'ahu̱ ri mfenihu̱ gi 'yo̱thu̱ n'ar ts'oki. Ñhogamu̱ihu̱, yo gi to̱'mhu̱ da tho ar pa. 27Yo gi hofu̱ da hya̱'ahu̱ ar ts'ondöhi. 28Nö'ö togo mar bë, dá hye̱p'u̱ ar mfë. Dá hyonga n'ar hoga 'be̱fi, ne njap'u̱ da me̱'sa teme da mfa̱xkwi nö'ö togo hinte pe̱ts'i. 29Yogar ts'onehu̱, hyoñhu̱ hanja gi ñöhu̱ xiñho, ne njap'u̱ nu'u̱ togo da 'yo̱x'ahu̱ da ma̱ts'i ne da numañho. 30Ne yo gi tso̱thwu̱ ár mu̱i ár Hñö Jö. Xi thus'ahu̱ ngu n'ar nkohi, ne xta zo̱nga ar pa da ts'iñ'ahu̱, da fötho yá bötsi'ihu̱ Jö. 31Hye̱hu̱p'u̱ gatho ar ntso̱tmu̱i, ar kwe̱, ar nt'u̱tsa, ya mhafi, ya ts'ate, ne gatho ya ts'omfeni. 32Nö'ö xiñho gi 'yo̱thu̱, ñhogajö'ihu̱ n'a ngu n'a, mpe̱'su̱ ar nhwëki mpuñhu̱ n'a ngu n'a, ngu ar tsi Dada bi pumgagihu̱ mi unga ár te ar tsi Hmu Hesukristo.

will be added

X\