AR EFESIO 3

1Nuga ar Pablo, di owa har fa̱di ngetho di zo'ahu̱ ár hoga mhö ar tsi Hmu Hesukristo nu'ahu̱ hingar xodyohu̱. 2Zage gi pöhu̱ bi hwëgagi Jö ar 'be̱fi ga hös'ahu̱ ar hoga mhö. 3Jö bi utkagi nö'ö hinxki fö mam'e̱t'o, ngu xta ot'ahu̱ n'a tsi tu̱i. 4Nu xki néhu̱ ma gi pöhu̱ tengu dí pödi nö'ö himi fö mam'e̱t'o, tema nda 'yo̱t'a ma tsi Hmuhu̱ Hesukristo. 5Nunar mfeninu̱ xki jwatatho, hinte ma jö'i xki t'uti, ngu xi utwabipya ár Hñö Jö yá hoga mpo̱te ne yá m'e̱hni Jö. 6Xi t'utkagihe, nu'u̱ hingya xodyo mahye̱giwi nu ma'ra, ma da hñönga ya ñho n'ehe, ne da n'adar ndo'yowi ya xodyo. Ne da ñhehwi yá ñhöt'i pe̱s'u̱, ngetho mi 'yo̱ ar hoga mhö mi mhö, bi jamfi ar tsi Hmu Hesukristo. 7Nunar mhö'ö Jö bi hñuxkagi ga mö. Bi njap'u̱ ngetho bi hwëgagi ár nt'uni, ne nunár döta ts'e̱di bi mpe̱ ha ma mu̱i. 8Xi t'aka nunar 'be̱finu̱, mödi hinda tsa̱ ga ñhux'be nu ma'ra ya gamfi, di ko ya ha̱i. Xi nhwëgagi nunar 'be̱finu̱, ga hö'spabi nu'u̱ hingya xodyo ya hoga mhö no̱nga gatho ya ñho pe̱'sa ar tsi Hmu Hesukristo, hingi tso xo̱ge ma mfenihu̱. 9Ne ga ot'wa ar 'ñu gatho nö'ö tema xki benga Jö nda 'yo̱t'e ne xki 'ñögi, nú'mu̱ hinxki hoktho gatho nö'ö te japya. 10Ne njap'u̱ da nheki hár nijö nuya ár nze̱ye̱ ár mfödi Jö, ne da bö nu'u̱ togo bi the̱ yá nsu ne nu'u̱ togo bi the̱ yá ts'e̱dinu̱ mhets'i. 11Gehnu̱ ar mfeni xki benga Jö mam'e̱t'o, m'e̱fa bi 'ñu hár te ma tsi Hmuhu̱ Hesukristo. 12Ngetho di ñ'emu̱ihu̱ ar tsi Hmu Hesukristo, hinga ntsuhu̱ ne hinga ntsa̱hu̱ ga kwathu̱ ga ñöwihu̱ Jö. 13Jange di a̱'ahu̱, hingi tu ri mu̱ihu̱ gi hanthu̱ di tho ya nt'u̱tsa ngetho di hös'ahu̱ ar hoga mhö. Njohyahu̱, gehnu̱ es'ahu̱ ri nsuhu̱. 14Jange di nda̱ndihmö hár nthandi ár Dada ma tsi Hmuhu̱ Hesukristo. 15Gehnu̱ ár Dada togo bi umba yá te gatho ya m'u̱i 'bu̱kwa har ximha̱i, ne gatho nu'u̱ 'bu̱hnu̱ mhets'i. 16Di a̱pabi ngu ár nt'e̱ni yá ñho pe̱'sa hár nsunda, da ze̱t'a ri mu̱ihu̱ hár Hñö Jö gi 'bu̱hwihu̱. 17Di a̱pabi n'ehe da m'u̱ ha ri mu̱ihu̱ ar tsi Hmu Hesukristo, ngetho gi jamfihu̱, ne njap'u̱ gi m'a̱thu̱ xiñho hár mhöte. 18Ne gatho nu'ahu̱, ngu nu ma'ra ya gamfi, da tsa̱ gi pöhu̱ tengu ár nxidi, ár ma, ár ñhe ne ár ñhets'i ár mhöte ar tsi Hmu Hesukristo. 19Ne gi pöthwu̱ nunar döta mhötenu̱ hinto tsa̱ da zo xiñho hár mfeni, ne xa da ziñ'ahu̱ ár m'u̱i Jö. 20Nsunda Jö togo pe̱'sa ar ts'e̱di da 'yo̱t'a gatho nö'ö ne'ö, töta ár nze̱ye̱ nö'ö tsa̱ da zo ma mfenihu̱ ga a̱fu̱. Gathonu̱ o̱t'a ár ts'e̱di mpe̱ ha ma mu̱ihu̱. 21Dá nsundabi ar nijö 'bu̱hwi ar tsi Hmu Hesukristo hyax'mu̱ ne hiñham'u̱ da göts'i. Dá njap'u̱.

will be added

X\