AR EFESIO 2

1Nu'ahu̱ xka m'e̱hmöhu̱ mam'e̱t'o ha ya ts'oki, ne ngi 'bu̱hu̱ har ts'om'u̱i, po̱ntho hinge ngi tehu̱, ha nupya Jö xi 'ra'ahu̱ n'ar 'ra'yo te. 2Ngi 'bu̱hu̱ njap'u̱ ngetho ngi te̱mfu̱ ár m'u̱i ar ximha̱i. Ne ngi pe̱pabihu̱ ár ndö ya ts'ondöhi, pe̱'sa ár ts'e̱di har ndöhi, ne pumbyá mfeni ya me̱'sku. 3Mam'e̱t'o gathogihu̱ ngu 'bu̱'u̱ n'ehe, ndi umbabihu̱ gatho nö'ö mi ne ma ndo'yohu̱, ne ndi o̱thu̱ gatho nö'ö mi benga ma mfenihu̱. Jange nuju̱ ho̱nse̱ ár kwe̱ Jö ndi to̱'mhu̱, ngu to̱'ma nu'u̱ hinxi ñ'emu̱i. 4Ha Jö xa döta ár nhwëki ne xa bi mökagihu̱. 5Jange ngu bi japi bi nte man'agi ar tsi Hmu Hesukristo, njap'u̱ nuju̱ n'ehe, bi 'raju̱ n'ar 'ra'yo te, ngetho xki m'e̱ ma tehu̱ har ts'oki, po̱ntho ngu xta tumhöhu̱, ne Jö bi hwëgagihu̱, bi 'raju̱ ar mpo̱ho̱. 6Ne ngu bi gu̱xa ar tsi Hmu Hesukristo, njap'u̱ bi gu̱xkagihu̱ n'ehe, ne bi 'ñexkagihu̱ ga 'bu̱hwihu̱nu̱ mhets'i. 7Bi 'yo̱tkagihu̱ njap'u̱, mi honga nuya pa di 'ñep'u̱ da födi hangu ar ñho xi hwëgagihu̱, bi ko ár mu̱i ba pe̱nkagihu̱ ar tsi Hmu Hesukristo. 8Ngetho Jö bi hwëgagihu̱ ar mpo̱ho̱ nú'mu̱ nda ñ'emu̱ihu̱. Himbi po̱kagihu̱ ma ts'e̱dise̱hu̱, gehnu̱ n'ár nt'uni Jö. 9Hinto xi po̱se̱ yá hoga 'be̱fi. Nu'mu̱ bi njap'u̱, tsa̱ da 'ñexhmö ár nsu 'mu̱. 10Jö go bi mengi bi hyógagihu̱ ma'ra'yo ngetho di n'at'wihu̱ ar tsi Hmu Hesukristo, ne njap'u̱ nga o̱thu̱ nö'ö ar ñho xki 'ye̱gagihu̱ Jö nga o̱thu̱. 11Jange nu'ahu̱ hingar xodyohu̱, beñhu̱ mam'e̱t'o hinge xki thus'ahu̱ ar nse̱gi ha ri ndo'yohu̱ ngu pe̱'sa ya xodyo. Jange mi eñ'ahu̱ ngar ts'oktehu̱, mödi nunar nse̱ginu̱ mi huxase̱ ya jö'i. 12Mam'e̱t'o hinge ngi 'bu̱hwihu̱ ar tsi Hmu Hesukristo, ngi 'bu̱hu̱ yap'u̱. Hinge ngar menguhu̱ Israel, ne hinge ndi 'ñep'ahu̱ nuya ñhöt'i xki nkohwi'u̱. Hinte ngi to̱'mhu̱, hinge ngi pöhu̱ Jö, ngi 'bu̱se̱hu̱ har ximha̱i. 13Mapa'ö ngi 'bu̱hu̱ yap'u̱ xka hye̱hu̱ Jö. Ha nupya xka ñ'emu̱ihu̱ ar tsi Hmu Hesukristo, xi ja'ahu̱ xka kwathu̱, ngetho bi nö'ma ár ji har pont'i. 14Nuje dar xodyohe ne nu'ahu̱ hingar xodyohu̱, nú'mu̱ mi du ar tsi Hmu Hesukristo bi text'a ar jödo nt'u̱tsa xki 'wegagihu̱. Njap'u̱ nda za̱ ngar n'ada ar hninihu̱ ne nga ñhogamu̱ihu̱ n'a ngu n'a. 15Nú'mu̱ mi ts'u̱twa ár ndo'yo har pont'i, ge'mu̱ bi hwata ar nt'u̱tsa, ngetho bi hñökwa ár ts'e̱di ya 'be̱pate ne gatho yá nt'umbi. Mi yoho ya hnini bi hyoka n'ase̱, ngetho n'at'wu̱ te̱ñ'ö ba e ar hogam'u̱i. 16Gehnu̱ har pont'i bi hwata ar nt'u̱tsa mi pe̱'sa nu'u̱ yoho ya hniniyu̱, bi mhödi ne bi ñhogamu̱iwi Jö, ngetho bi n'atwi ndo'yo'u̱ ar tsi Hmu Hesukristo. 17Jange ar tsi Hmu Hesukristo ba hönkagihu̱ ar hoga mhö xta ñhogamu̱iwihu̱ Jö, nu'ahu̱ ngi 'bu̱hu̱ yap'u̱, ne nuje ya xodyo ndi 'bu̱he get'u̱tho. 18Ngetho bi ungár te ma tsi Hmuhu̱ Hesukristo, gathogihu̱ ngu ya xodyo ne nu'u̱ hingya xodyo, da tsa̱ ga ku̱thu̱ habu̱ bi 'bu̱ Jö ma Dadahu̱, ngetho di 'bu̱hwihu̱ ár Hñö Jö mahye̱gi xi t'akagihu̱. 19Jange nupya hingar n'añ'ohu̱, ne hingar nzo̱ho̱hu̱. Gar menguhu̱ ár hnini Jö ngu gatho nu ma'ra ya gamfi, ne yá bötsi'ihu̱ n'ehe. 20Ne mahye̱gi di 'bu̱hu̱ hár nijö Jö 'yo di thoki. Numa tsi Hmuhu̱ Hesukristo ñhe̱hwi ar mu̱dido. Nuje yá mpo̱tegihe ne nu ma'ra yá m'e̱hni Jö, di janguhe ár wa ar jödo. 21Gathogihu̱ ya gamfi di njanguhu̱ n'ar ngu thoki, 'yo di hets'i mahye̱tho ya do, ne da ho n'ar nijö xint'axi ngetho n'at'wi di 'bu̱hwihu̱ ar tsi Hmu. 22Ngu'ahu̱ ne nguje di n'at'wihu̱ ar tsi Hmu Hesukristo, ne di 'yo di tehu̱ mahye̱gi gatho ma'ra ya gamfi, ga tso̱ñhu̱ ngu ár nijögihu̱ Jö habu̱ 'bu̱ ár Hñö.

will be added

X\