AR EFESIO 1

1Nuga dar Pablo ár mpo̱tegi ar tsi Hmu Hesukristo, ngetho njap'u̱ xki ko ár mu̱i Jö bi 'ñexkagi nga pe̱pabi. Di pe̱ñ'ahu̱ nunar he̱'minu̱ gar menguhu̱ Efeso, gi nkuhu̱ ne gi te̱ñhu̱ ar tsi Hmu. 2Jö ma Dadahu̱ ne ma tsi Hmuhu̱ Hesukristo da 'ra'ahu̱ n'ar hogam'u̱i ne da hwëk'ahu̱ yá ñho. 3Ga ndöñhu̱ Jö ár Dada ar tsi Hmu Hesukristo, togo xi 'rakagihu̱ gatho ya jöpi xi 'wegagihu̱nu̱ mhets'i, ngetho di n'at'wihu̱ ar tsi Hmu Hesukristo. 4Nú'mu̱ hinxki hoktho ar ximha̱i, Jö xki hwankagihu̱ nga n'at'wihu̱ ar tsi Hmu, ne njap'u̱ nda t'axkagihu̱, ne hinte ma ts'oki nga pe̱'su̱ hár nthandi'ö. 5Jö pe̱'sa n'ar döta mhöte, ne xki hñuts'i nda tedegihu̱ hár ndöte ar tsi Hmu Hesukristo, ngetho njap'u̱ xki beñ'ö. 6Nö'ö bi ko ár mu̱i ba pe̱hna ár hmöka T'u̱ bi tedegihu̱, ne njap'u̱ xa ga ndömfu̱ ár thuhu ga beñhu̱ ár nhwëki bi 'rakagihu̱. 7Bi me̱hna ár T'u̱, bi nö'ma ár ji bi pumga ma ts'okihu̱, ne bi gutka ma tha̱ihu̱. Njap'u̱ bi zimgagihu̱ hár 'ye̱ ar ts'oki, ngetho xa döta ár nhwëki Jö. 8Xa bi hwëgagihu̱ n'ar hoga mfeni ne n'ar döta mfödi. 9Ne bi za̱ da pöhu̱ nö'ö himi tsa̱ nda fö mam'e̱t'o, tema xki ko ár mu̱i Jö nda 'yo̱t'e. Gese̱ xki benga njap'u̱, 10nda njapa ar tsi Hmu Hesukristo nda ndö, di huxa mañö gatho nu'u̱ bi 'bu̱ mhets'i ne gatho nu'u̱ 'bu̱kwa har ximha̱i. Njap'u̱ ma da thogi nu xta zo̱nga ar pa xi hñuxa Jö. 11Jö xki beñ'ö nda hñuxkagihu̱ nga höñhu̱ yá ñho, ngetho di n'at'wihu̱ ar tsi Hmu. Ha Jö o̱t'a gatho nö'ö xi benga hár mu̱i. 12Jö bi hwankagihe m'e̱t'o nga jamfihe ar tsi Hmu Hesukristo ne njap'u̱ nga ndömfe ár thuhu. 13Ne nu'ahu̱ xka 'yo̱xu̱ ar mhö majöni, nunar mhönu̱ no̱nga ri mpo̱ho̱hu̱. Ne nga jamfihu̱ ga n'at'wihu̱ ar tsi Hmu Hesukristo, bi thus'ahu̱ ár Hñö Jö ha ri mu̱ihu̱ ngu n'ar nthixt'i yá me̱ti'ihu̱ Jö, ngu xki ñötkagihu̱. 14Ár Hñö Jö gehnu̱ ngu n'ar ñho xi m'e̱t'ogihu̱ yá bötsigihu̱ Jö, ho̱nse̱ ga to̱'mhu̱ da zo̱ ar pa da zixkagihu̱ n'agitho ma ga 'bu̱hwihu̱. Gatho xi 'yo̱t'a Jö, ne njap'u̱ nda t'e'spabi ár nsu. 15Jange nuga nú'mu̱ nda o̱de xka jamfihu̱ ar tsi Hmu Hesukristo, ne xi zo ma gu xa gi möhu̱ nu'u̱ ma'ra ya gamfi, 16hindi tsa̱ya̱ di umba njamödi Jö, ne di a̱pi da ma̱x'ahu̱, 17da 'ra'ahu̱ ar hoga mfödi, ne da xok'a ri da̱hu̱ gi pöthwu̱ ár m'u̱i ár Dada ma tsi Hmuhu̱ Hesukristo 'bu̱ hár nsunda. 18Di a̱pa Jö n'ehe da yot'a ri mfenihu̱ gi pöhu̱ xiñho te gatho di to̱'mhu̱ ngetho xi zonkagihu̱, ne gi pöhu̱ tengu ár nza̱tho ne ár döta ya ñho da 'raju̱ xka m'u̱hwihu̱, nuya xta ñ'emu̱ihu̱. 19Ne di a̱pabi gi pöhu̱ tengu ár döta ár ts'e̱di mpe̱ ha ri mfenihu̱. Getnu̱ ar döta ts'e̱di xi utkagihu̱, 20nú'mu̱ bi japi bi nte man'agi ar tsi Hmu Hesukristo, ne bi gu̱xa habu̱ xki t'a̱hwi nu'u̱ xi du, ne bi 'ñexa hár ñ'e̱i núnu̱ mhets'i habu̱ bi 'bu̱hwi'ö. 21Ne bi umba n'ar döta nsu töta gatho ya ndö, nu'u̱ hö yá ts'u̱t'wi, nu'u̱ ja yá ts'e̱di, nu'u̱ ja yá nsu, ne gatho nu'u̱ nho̱mba yá thuhu har ximha̱i, töte ár nsu nuya payu̱ ne hiñham'u̱ da göts'i. 22Ne bi hñuxa da ndö gatho nö'ö te jawa ne 'bu̱i, ne bi 'ñex'ö ngu ár ñöxhmu ar nijö. 23Ha nu ar nijö jwatwabi da nxo̱ge ár ndo'yo, ha nunar tsi Hmu jwatwabi da nxo̱ge gatho nö'ö te ja ne te 'bu̱i.

will be added

X\