AR KOLOSENSE 4

1Hmuhu̱, pe̱'su̱ n'ar hogamu̱i gi 'be̱fu̱ ri 'be̱gohu̱. Beñhu̱ gi 'ñehu̱ n'a ri Hmuhu̱ n'ehe bi 'bu̱ mañö mhets'i. 2Umba ri mu̱ihu̱ gi 'ya̱fu̱ Jö, ne hingi tsa̱ya̱hu̱ gi umfu̱ njamödi nö'ö 'ra'ahu̱. 3'Ya̱pabihu̱ Jö da ma̱xje da xoka ya goxthi ga mömfe ár mhö, ne ma'ra da bö nö'ö himi fötwa mam'e̱t'o ar tsi Hmu Hesukristo. Ngetho di pe̱ nunar 'be̱finu̱, jange xi joka har fa̱di. 4'Ya̱fu̱ Jö da tsa̱ ga mönga xiñho nö'ö mahyoni ga mö. 5Jamasuhu̱ hanja gi 'yohu̱. 'Yohu̱ gi pe̱'su̱ n'ar döta mfödi ha yá nthandi nu'u̱ hingya gamfi. Yo gi tsa̱ya̱hu̱ mömfu̱ ár mhö Jö. 6Nú'mu̱ gi ñöhu̱, möñhu̱ ya hoga mhö ne di 'be̱nga nt'ek'ei. Beñhu̱ xiñho nö'ö ma gi thöthu̱ togo gi ñöwihu̱. 7Nuna ma hmöka ku Tikiko, gehnu̱ n'ár hoga 'be̱go Jö xta mpe̱he mahye̱gi. Nu xta zo̱mp'u̱nu̱, da xi'ahu̱ hanja di 'bu̱kwa. 8Jange di pe̱ñ'a'ihu̱p'u̱ da xi'ahu̱ tema di thohe, ne da hñup'a ri mu̱ihu̱. 9Xi me̱wi n'ehe ma tsi hmöka hoga ku Onesimo, ngu gi pöhu̱ ar mengup'u̱. Xta zo̱mp'u̱yu̱ ma da xi'ahu̱ gatho nö'ö di thokwa. 10Pe̱ñ'a'ihu̱ nze̱ngwa ar ku Aristarko di o'bewa har fa̱di. Ze̱ngwa'ihu̱ ar ku Mörko ár mëni ar ku Berhnabe. Gehnu̱ xi nsi'ahu̱; nú'mu̱ xta zo̱mp'u̱, nuhu̱ xiñho. 11Pe̱ñ'a'ihu̱ nze̱ngwa ar ku Hesu t'embabi ar Hogajö'i. Gatho ya xodyo xi jamfi, ho̱nse̱yu̱ xi ma̱xkagi xta mömfe ár hoga ts'u̱t'wi Jö, ne njap'u̱ xi hubga ma mu̱i. 12Ze̱ngwa'ihu̱ ar ku Epafra n'ár 'be̱go ar tsi Hmu Hesukristo. Gehnu̱ n'ar mengup'u̱ n'ehe. Hyax'mu̱ umba ár mu̱i a̱pa Jö da ze̱t'a ri jamfihu̱, gi 'bu̱hu̱ xiñho, ne hinte da 'be̱di gi 'yo̱thu̱ gatho nö'ö ne Jö. 13Nuga di da̱majöni 'bu̱tho da du homp'a ri ñhohu̱. Hinge ho̱nse̱'ihu̱, benga ya ku me Laodisea ne ya me Yerapolis n'ehe. 14Pe̱ñ'a'ihu̱ nze̱ngwa ar hmöka ku Luka togo ar unga ñ'ethi, ne ar ku Dema. 15Ze̱ngwagihu̱p'u̱ ya ku 'bu̱hnu̱ Laodisea, ne ar ku Nimfa ne gatho ya ku mhunsa hár ngu. 16Nú'mu̱ xki jwahu̱ gi nehu̱ nunar he̱'minu̱, thokwabihu̱ ar nijö 'bu̱hnu̱ Laodisea, ne nunár he̱'mi'u̱ 'ya̱fu̱ gi nehu̱. 17'Ñembabihu̱ ar ku Arkipo: Jwata xiñho nunar 'be̱fi xi 'ra'a ar tsi Hmu. 18Nuga dar Pablo, xta ja ma 'ye̱ xta ot'ase̱ nunar nze̱ngwanu̱. Yo ma gi pumhnihu̱ di owa har fa̱di. Jö da hwëk'ahu̱ yá ñho. Dá njap'u̱.

will be added

X\