AR KOLOSENSE 3

1Nu'mu̱ majöni ga penju̱ ga ntehu̱ mahye̱giwi ar tsi Hmu Hesukristo, hyoñhu̱ m'e̱t'o nuya ñho bi ja mañö mhets'i, habu̱ bi huxa ar tsi Hmu hár ñ'e̱i ár Dada. 2Hñuxu̱ ri mfenihu̱ nuya ñho bi ja mhets'i, hinge nu'u̱ jawa har ximha̱i. 3Ngetho xka tuwihu̱ mahye̱gi ar tsi Hmu Hesukristo, ne ri tehu̱ juta Jö, ngetho gi 'bu̱hwihu̱ ar tsi Hmu. 4Ne nú'mu̱ xta penga man'agi, ma da thant'ahu̱ mahye̱giwi hár nsunda, ngetho gi n'at'wihu̱ ri tehu̱. 5Jange hye̱hu̱ gatho nuya ts'oki jawa har ximha̱i: yo gi tsimfu̱ yá nthöti ma'ra, yo gi o̱thu̱ ya ts'oki xi nts'otho, yo gi o̱thu̱ nuya ts'oki ne ri ndo'yohu̱, hingi ñhe̱hu̱ da dö'ahu̱ ar ts'omfeni. Yo xa gi möhu̱ ar bojö, ngetho nu'mu̱ gi jahu̱p'u̱, po̱ntho gi ndöñhu̱ ar bojö, hingi ndöñhu̱ Jö. 6Ngetho nuya ts'o'be̱fiyu̱ tsixa ya me̱'sku da zu̱twa ár kwe̱ Jö. 7Nu'ahu̱ maham'u̱ ngi 'bu̱hu̱nu̱ ha ya ts'o'be̱fiyu̱ n'ehe. 8Hinge ho̱nse̱'u̱, di xi'ahu̱ gi hye̱hu̱ gatho nu ma'ra ya ts'oki n'ehe, ngu ar nt'u̱tsa, ar kwe̱, ar ts'om'u̱i, ar ts'ate ne ma'ra ya ts'one. 9Yo gi mpehu̱ ar nhemhñö n'a ngu n'a, ngetho nö'ö ar m'e̱t'o m'u̱i ngi pe̱'su̱ maham'u̱, xka 'ye̱ñhu̱p'u̱ ngu n'ar ze̱ dutu. 10Ha nupya ngu n'ar 'ra'yo he, gi pe̱'su̱ n'ar 'ra'yo te di hñöxa nö'ö togo bi hyoki. Hyax'mu̱ di hogi da ñhe̱hwi xiñho ár m'u̱i'ö. 11Ne har 'ra'yo m'u̱i gi 'bu̱hu̱, hindi nhekinu̱ togo ar xodyo togo hingar xodyo, togo xi nse̱mba ár ndo'yo togo hin'ö, togo hinte pödi ne togo xa jár mfödi, togo m'e̱go ne togo hinte 'ñe ar hmu. Ngetho gatho gi ohu̱ hár 'ye̱ ar tsi Hmu Hesukristo, ne nö'ö mahye̱githo 'bu̱hwi gatho. 12Dá nheki ri 'ra'yo m'u̱ihu̱ ngu n'ar 'ra'yo he, ngetho Jö xi mö'ahu̱ ne xi hwañ'ahu̱ ngu ár me̱ti'ö. Jange nupya 'bu̱hu̱ gi pe̱'su̱ n'ar döta nhwëki, ne ar ñhogajö'i, hingi ñ'exu̱, pe̱'su̱ n'ar hogamu̱i ne ar ts'e̱ti. 13Pe̱'sfu̱ ar ts'e̱ti n'a ngu n'a ri ñ'ohu̱, mpuñhu̱ n'a ngu n'a, ha nu'mu̱ n'ar ku xi tso̱t'a ri mu̱ihu̱, pumbabihu̱. Mahye̱gi ngu xi pump'ahu̱ ar tsi Hmu Hesukristo, jahu̱p'u̱ n'ehe. 14Jange mahyoni da gop'atho'ihu̱ ar mhöte. Njap'u̱ gi n'athohu̱, ne da tsa̱ gi 'bu̱hu̱ n'adar mfeni gi pe̱'su̱. 15Ar hogam'u̱i 'ra'ahu̱ ar tsi Hmu Hesukristo da zis'a ri mu̱ihu̱, ngetho xi zoñ'ahu̱ gi n'adar ndo'yohu̱ gi 'bu̱hwihu̱ xiñho ma'ra ya ku. Ne hyax'mu̱ umfu̱ njamödi Jö. 16Di oda ri mfenihu̱ ár mhö ar tsi Hmu Hesukristo. Ngetho xka hñöñhu̱ ar hoga mfödi, ñ'uthu̱ ne hu'ma ri mu̱ihu̱ n'a ngu n'a. Ndöñhu̱ ar tsi Dada gi tuthu̱ ya nsa̱di ne ya thuhu no̱nga Jö. Umfu̱ njamödi ha ri mu̱ihu̱. 17Gatho nö'ö gi 'yo̱thu̱ wa gi möñhu̱, 'yo̱thu̱ gi nsundahu̱ ar tsi Hmu Hesukristo, ne hár thuhu'ö umfu̱ njamödi Jö ar Dada. 18'Be̱hñöhu̱, 'yo̱thu̱ ri dömehu̱ ngu di 'ñepi da 'yo̱t'a nu'u̱ xi jamfi ar tsi Hmu. 19Ñ'o̱ho̱hu̱, möhu̱ ri 'be̱hñöhu̱, ne yo gi o̱thu̱ ndöta. 20Bötsihu̱, 'yo̱thu̱ gatho nö'ö da xi'ahu̱ ri dadahu̱, ngetho ar tsi Hmu go ne njap'u̱. 21Dadahu̱, yo gi tsu̱hu̱ nts'e̱di ri bötsihu̱, xi'mu̱ da zo̱t'a yá mu̱i. 22'Be̱gohu̱, pe̱fu̱ gatho nö'ö da 'be̱p'ahu̱ ri hmuhu̱. Hinge ho̱nse̱ nú'mu̱ hant'ahu̱ gi ne gi kohwihu̱ xiñho. Pe̱fu̱ xiñho di po̱nga ri mu̱ihu̱, ngetho gi tsufu̱ Jö. 23Ne gatho nö'ö gi pe̱hu̱, umba ri mu̱ihu̱ gi 'yo̱thu̱, wande gi o̱t'wabihu̱ ar tsi Hmu, hinge gi o̱thwu̱ ya jö'i. 24Gi pöhu̱, nunar tsi Hmu Hesukristo go ma da 'ra'ahu̱ ar nthöhö, ngetho gi pe̱pabihu̱'ö. 25Ha nö'ö togo o̱t'a ar ts'om'u̱i, ar tsi Dada ma da gut'wa ngu xi 'yo̱t'e, ngetho nö'ö hingi hwanta ya jö'i.

will be added

X\