AR KOLOSENSE 1

1Nuga dar Pablo, ár mpo̱tegi ar tsi Hmu Hesukristo ngetho njap'u̱ xi ne Jö. Di ze̱ngwa'ihe, nuga ne ar ku Timoteo. 2Di pe̱ñ'ahe nunar he̱'minu̱ nu'ahu̱ gar gamfihu̱ me Kolosa, gi te̱ñhu̱ ar tsi Hmu Hesukristo. Jö ma Dadahu̱ ne ma tsi Hmuhu̱ Hesukristo da 'ra'ahu̱ n'ar hogam'u̱i ne da hwëk'ahu̱ yá ñho. 3Hyax'mu̱ di a̱fe da ma̱x'ahu̱ Jö ár Dada ma tsi Hmuhu̱ Hesukristo, ne hindi tsa̱ya̱he di umfe njamödi. 4Xta o̱he tengu ri jamfihu̱ gi pe̱'spabihu̱ ar tsi Hmu Hesukristo, ne ar mhöte gi pe̱'sfu̱ n'a ngu n'a ya gamfi, 5ngetho gi ndo̱'mhu̱ ma gi hñöñhu̱ nö'ö xi t'e̱k'ahu̱nu̱ mhets'i, habu̱ xpa hok'ahu̱ Jö, gatho nu'ahu̱ xka 'yo̱hu̱ no̱ngar hoga mhö majöni. 6Nunar hoga mhö xka 'yo̱hu̱ xi nu̱nga gatho ár nxidi ar ximha̱i, ñhe̱hwi n'ar 'ba̱iza te ne unga ar sofo. Xka njahu̱p'u̱ nú'mu̱ mi zo ri guhu̱ ne ga pötwabihu̱ nö'ö majöni ár hoga nhwëki Jö, 7ngu xi ut'ahu̱ ma hmöka kuhu̱ ar Epafra, ma mi'be̱gohe. Gehnu̱ n'ár hoga 'be̱go ar tsi Hmu Hesukristo 'bu̱i da ma̱x'ahu̱. 8Xi xikagihe n'ehe, nuna ri döta mhöte gi pe̱'su̱ xi 'ra'ahu̱ ár Hñö Jö. 9Nu nda jwadi da o̱he, hindi tsa̱ya̱he di a̱fe Jö da yot'a ri mfenihu̱ gi pöhu̱ te ne'ö, ne da 'ra'ahu̱ ar hoga mfeni ne ar hoga mfödi di 'ñe mhets'i. 10Di a̱'ahu̱ gi 'bu̱hu̱ ngu di 'ñepi da m'u̱ n'ár bötsi Jö, ne xa da numañho'ihu̱. Da nheki ri hogam'u̱ihu̱, ne hyax'mu̱ 'yo gi pöhu̱ togo Jö. 11Ne di a̱pabihe Jö da ze̱t'a ri mu̱ihu̱ ngu ár nt'e̱ni bi e hár nsunda. Njap'u̱ gi tse̱thu̱ gatho nö'ö gi thohu̱, ne gi pe̱'su̱ ar ts'e̱ti n'a ngu n'a. 12Ga njohyahu̱ ga umfu̱ njamödi Jö, ngetho bi 'raju̱ ar se̱ki ne ar ts'e̱di ga höñhu̱ ya ñho ma da hyengagihu̱, nuju̱ ne gatho nu ma'ra yá bötsi. 13Jö xi zimgagihu̱ hár ts'e̱di ar 'be̱xui ndi 'bu̱hu̱, ne bi thógagihu̱ di 'bu̱hu̱pya hár ts'u̱t'wi ár hmöka T'u̱. 14Gehnu̱ bi nö'ma ár ji bi zimgagihu̱ har ts'oki, ne bi pumgagihu̱. 15Ma tsi Hmuhu̱ Hesu togo di hñöxa Jö hingi nheki, mi 'bu̱'ö nú'mu̱ hinxki thoktho gatho nö'ö te japya, ne xa töpa ár nsu gathoyu̱. 16Jö bi 'ye̱nt'wa hár 'ye̱ bi hyoka gatho nö'ö te janu̱ mañö mhets'i, gatho nö'ö te jawa har ximha̱i, gatho nö'ö nheki ne nö'ö hingi nheki, gatho nu'u̱ ya ndö, nuya ts'u̱t'wi, nu'u̱ ja yá ts'e̱di ne nu'u̱ ja yá nsu. Gatho go bi hyok'ö nda nsundabi. 17Nú'mu̱ hinxki thoktho gatho nö'ö teme japya, mi 'bu̱'ö, ne gatho o hár 'ye̱'ö. 18Gehnu̱ ár ñöxhmu ar nijö, togo ár ndu̱i gatho te ja, ne ar 'be̱t'o gatho nö'ö te 'bu̱i. M'e̱t'o bi mengi bi nte'ö xki du, ne njap'u̱ gatho di 'be̱t'o'ö. 19Jö ar Dada go bi ne'ö nda hñömpa ár T'u̱ gatho ár nsunda. 20Ne nunár ndöte ár T'u̱'ö, bi japi bi ñhogamu̱iwi gatho nu'u̱ 'bu̱hnu̱ mhets'i ne nu'u̱ 'bu̱kwa har ximha̱i. Ne nú'mu̱ mi nö'ma ár ji ár T'u̱ har pont'i, bi jakagihu̱ da ntsixkwihu̱. 21Nu'ahu̱ mam'e̱t'o ngi 'bu̱hu̱ yap'u̱, hinge ngi mpöhwihu̱ Jö. Ngi u̱tsahu̱ ha ri mfenihu̱, ngi o̱thu̱ nö'ö hingi ho. Ha nupya ár T'u̱'ö xi ja'ahu̱ xka ñhogamu̱iwihu̱. 22Bi njap'u̱ nú'mu̱ mi njö'i ne bi unga ár te har pont'i. Njap'u̱ nda tsa̱ nda 'ba̱p'ahu̱ xint'axi hár nthandi Jö, hinte ma ts'oki ngi pe̱'su̱ ne hinto nda k'as'ahu̱. 23Jange mahyoni hingi hye̱hu̱ ar ñ'emu̱i, ne xa gi ze̱ta ri mu̱ihu̱ gi to̱'mhu̱ hyax'mu̱ nunar ndo̱'mi xka 'yo̱xu̱ har hoga mhö. Ne nunar mhönu̱ xi mhömba gatho ár nxidi ar ximha̱i, ha nuga ar Pablo xi thuxkagi ga xani. 24Xa di johya ngetho di tho ya thogi, di honga ri ñhohu̱. Ne njap'u̱ 'yo di jwatwa yá u̱gi ma tsi Hmuhu̱ Hesukristo, di homba ár ñho ar nijö n'ehe, gehnu̱ ár ndo'yose̱. 25Ne nuga bi thuxkagi ngu ár 'be̱go hár nijö. Jö xi 'raka nunar 'be̱finu̱ honga ri ñhohu̱. Xi thuxkagi ga xi'ahu̱ gatho ngu mönga hár mhö'ö. 26Nunar mhönu̱ xki t'ögi, ho̱nse̱ mi pöse̱ Jö. Bi njap'u̱ gatho nuya je̱ye̱ bi thogi, ha nupya hö, xi utwa yá bötsi Jö. 27Jö go bi ne njap'u̱, nda ut'ahu̱ hingya xodyohu̱ nö'ö hinxki fö mam'e̱t'o: nunar tsi Hmu Hesukristo tsa̱ da m'u̱ ha ri mu̱ihu̱. Gehnu̱ ar ndo̱'mi ma gi 'bu̱hwihu̱ hár nsunda. 28Nuje yá 'be̱gogihe Jö, habu̱ gatho di mömfe ár thuhu, di höhe ar hoga mfödi. Di uthe ne di hu'mbabihe yá mu̱i gatho ya jö'i, di hoñhe ga 'ba̱'mhe n'a ngu n'a hár nthandi Jö, di nxo̱ge ngetho 'bu̱hwi ar tsi Hmu Hesukristo. 29Jange gehnu̱ di umba ma mu̱i di pe̱fi, di hömpa ár ts'e̱di mpe̱ ha ma mu̱i.

will be added

X\