YA 'BE̱FI 6

1Nuya pa'u̱ xa mi xönda ya ku. Ne nu'u̱ ya ku mi ñö ar griego bi ñömañ'u̱bi ya ku mi ñö ar ebreo. Ne mi eñ'u̱, nuyá 'ranxu himi t'umba mahye̱gi ar ñhuni mi thekwabi hyax'mu̱, ngu nu ma'ra ma ya ebreo. 2Nu'mú̱ nu'u̱ 're̱t'amayoho ya mpo̱te bi zohna gatho ya ku ha n'ar mhunts'i, ne bi 'ñembabi'u̱: 3Jange hwañhu̱ yoto'ihu̱ nu'u̱ xka hyanthu̱ 'bu̱i xiñho, xi nzimba ár Hñö Jö, ne xa di ja ár mfödi. Nu'u̱ go ma da me̱'sa nuna ar 'be̱finu̱. 4Nuje hinga ma ga tsa̱ya̱he ga a̱fe Jö, ne ga mömfe ár mhö'ö. 5Ha nu mi 'yo̱xa nö'ö xki nsipabi, gatho bi numañho njap'u̱. Ne bi nhwahna ar Teba nö'ö mi pe̱'sa n'ar döta ñ'emu̱i, ne xki nzimba ár Hñö Jö, ar Lipe, ar Prokoro, ar Nikanor, ar Timon, ar Parmena, ne ar Nikola mar me Antiokia, xki nxodyo ngetho xki de̱mba yá nt'umbi'u̱. 6Ne bi ts'ixa habu̱ mi 'bu̱ ya mpo̱te, ne nuyu̱ bi te̱t'wa Jö'u̱, mi huspa yá 'ye̱. 7Ne njap'u̱ dama mi nxanga ár mhö Jö, ne ya ku hyax'mu̱ xa mi xu núnu̱ Herusalen, ne nze̱ye̱ ya möjö bi gamfi n'ehe. 8Ha nu ar ku Teba xa mi pe̱'spa ár ts'e̱di Jö ne ár nthekate. Mi o̱t'a ya döta nt'udi ha yá nthandi ya jö'i. 9Ne núnu̱ ha yá nijö ya xodyo, nö'ö mar thuhu Nu'u̱ xi The̱gi, bi nju̱xa 'ra ya ñ'o̱ho̱, ne bi mfa̱xkwi 'ra ya me Sirene, ma'ra ya me Alejandria, ya me Nsilisia, ne ya me Asia. Gatho'u̱ bi ntsa̱hñökiwi ar Teba. 10Himi tsa̱ te nda döt'u̱, ngetho nö'ö mi pe̱'sa ar hoga mfödi, ne mi hömpa ár ts'e̱di ár Hñö Jö mi ñö. 11Nep'u̱ nuya jö'i'u̱ bi 'yu̱t'a 'ra ya ñ'o̱ho̱, ne bi gu'twabi nda mönga ya nhemhñö, ne nda 'ñeñ'u̱, xki 'yo̱'u̱ mi tsanga ar Moise, ne mi tsanga Jö n'ehe. 12Njap'u̱ bi po̱mpa yá kwe̱ ya jö'i, yá dönziandö ya xodyo, ne ya böt'ofo. Nep'u̱ bi nju̱ ar ku Teba, ne ntukitho bi ts'ixa hár mhunts'a ndö ya xodyo. 13Ne bi njapabi 'ra ya jö'i nda hyo̱xa ya nhemhñö ar ku Teba, ne bi 'ñeñ'u̱: 14Nuje go xta o̱he teme xi mö, xi 'ñenö, nunar Hesu mar me Nasare ma da hwata nunar nijönu̱, ne ma da pa̱ta ma nt'umbihu̱ nu'u̱ bi utkagihu̱ ar Moise ga o̱thu̱. 15Nu'mú̱ gatho nu'u̱ togo mi 'bu̱hnu̱ har mhunts'i, nú'mu̱ mi k'öt'a ar ku Teba, bi hyandwabi ár hmi mi ñhe̱hwi ár hmi n'ár e̱nxe̱ Jö.

will be added

X\