YA 'BE̱FI 28

1Nu nda jwadi da po̱ñhe har dehe, da pöhe nunar xe̱niha̱inu̱ már thuhu Malta. 2Nuya mengunu̱ xa bi numañhogihe. Bi 'ñutkagihe n'ar tsibi nga mpathe, ngetho mi ra ntse̱ mi 'wöi. 3Ar Pablo bi gu̱xa 'ra ya t'o nda 'yu̱'sa har tsibi. Ka mi op'u̱ n'ar k'eñö, mi za̱ ár mpa ar tsibi, bi bo̱ni ne bi m'a̱t'a hár 'ye̱ ar Pablo. 4Nu mi hyanda nuya mengunu̱ mi zu̱ta ar k'eñö hár 'ye̱ ar Pablo, mi eñ'u̱ n'a ngu n'a: 5Ha nunar Pablo bi hwöt'a ár 'ye̱ har tsibi nda da̱ ar k'eñö, ne hinte bi ja. 6Nuya mengunu̱ mi to̱'mtho ham'u̱ nda neni, wa nda hwangi xi du. Xa bi do̱'mi ne hinte bi ja. Nu mi hyanda njap'u̱ bi pongyá mfeni, mi eñ'u̱ nunar Pablo mi n'ar jö. 7Habu̱ da tso̱ñhe, ka mi the̱nu̱ 'ra yá ha̱i n'ar ñ'o̱ho̱ már thuhu Publio, togo mar ndö gatho ar ha̱i'ö. Xa mar hogajö'i, bi 'raje nse̱ki hñupa hár ngu. 8Nór dada'ö mi oxar t'oxi, mi umbar mpat'i ne ar 'biji. Ar Pablo bi ma ba k'öts'i, ne mi 'ya̱pa Jö bi hñuxpa yá 'ye̱, ne dama bi dits'i. 9Njap'u̱, gatho nu'u̱ ma'ra ya mengunu̱ har ha̱i'ö mi hñeni, mi e nda k'öts'i ne mi thits'i. 10Xa bi numansugihe, bi 'raje n'ar hoga tsa̱ya̱. Ne nda po̱ñhenu̱, bá tutkagihe gatho nö'ö nga hoñhe har 'ñu. 11Da 'bu̱henu̱ hñu nzönö. Nep'u̱ da ju̱henu̱ n'ar motsa mar me Alejandria, xki thohnu̱ ya tse̱ n'ehe. Mi tu hár ñö ar motsa yoho yá ja̱t'i yá jö'u̱, n'a már thuhu Kasto, ha nö'ö man'a már thuhu Polu. 12Nep'u̱ da tso̱ñhe ha n'ar hnini ár thuhu Sirakusa, ka da 'bu̱henu̱ hñupa. 13Da ka̱tathohe nor xe̱niha̱i'ö, ne da möhe har hnini Regio. Ha nu ár hyax'ö bi ñ'o ar ndöhi ndi 'ñe mak'angi, jange ár yopa da tso̱ñhe har hnini Puteoli. 14Ka da nthe̱henu̱ 'ra ya ku, bi 'ya̱kagihe nga kohenu̱ yoto mpa. Ne ka da po̱ñhe da möhe har hnini Nroma. 15Nuya ku me Nroma, xki 'yo̱'u̱ ma nga tso̱ñhe, bi bo̱ñ'u̱ ma ba thöje har dö'ñu get'u̱ ar ta̱i ár thuhu Apio, ne ma'ra har hnini Hñu Ngu. Ar Pablo mi hyanda ya ku, bi umba njamödi Jö, ne bi ze̱ta ár mu̱i. 16Nu nda tso̱ñhe Nroma, ar döndogu bi 'ye̱nt'wa ár 'ye̱ ar ndösufa̱di nu'u̱ ya 'yofa̱di mi tsi'ö. Ha nunar Pablo bi t'umba nse̱ki bi m'u̱ n'amp'u̱, mi su n'ar ndogu. 17Mi tho hñupa xki zo̱nga ar Pablo Nroma, bi zohna gatho ya ndöxodyo mi 'bu̱hnu̱. Nu mi wat'u̱, bi 'ñembabi'u̱: 18Ha nu mi thö'ska majöni, hinte ma ts'oki bi thimgagi ndi 'ñepki nda hyogagi'u̱, jange mi ne nda hye̱gahmö'u̱. 19Ha numa mixodyohu̱, himbi ne'u̱, jange da a̱di nda hñöska majöni ar ndö Sesar. Mödi hinte di ne te ga ho̱xa ma mixodyohu̱. 20Jange xta zoñ'ahu̱ ga hant'ahu̱ ne ga ñöhu̱. Ngetho di pe̱'spa ár ndo̱'mi ya me Israel, xi nthötkagi nuya nthöhibo̱jöyu̱. 21Nu'mú̱ nuya ndö xodyo bi 'ñembabi: 22Ndi to̱'mhe ngi xikagihe nö'ö gi beni, ngetho ho̱nse̱ di pöhe habu̱ gatho ya jö'i ñömañ'u̱ nuna ar 'ra'yo 'ñunu̱. 23Nep'u̱ bi nko'u̱ ham'u̱ nda penk'u̱. Bi zo̱ ar pa, bi zo̱hnu̱ nze̱ye̱ habu̱ mi 'bu̱ ar Pablo. Gatho ar pa mi zofo ne mi da̱twa majöni ár ts'u̱t'wi Jö. Mi ot'wa ar 'ñu ár t'ofo ar Moise ne nö'ö bi 'yot'a yá m'e̱hni Jö maham'u̱, mi ne'ö nda ñ'emu̱i'u̱ ar tsi Hmu Hesu. 24'Ra mi ñ'emu̱i nö'ö mi mönga ar Pablo, ha ma'ra himi ne nda jamfi. 25Ne himi n'at'wu̱ mi ñ'emu̱i, jange mi ma'u̱ bi 'ñenga ar Pablo: 26Di ma ba zo nuya jö'iyu̱, ne gi 'ñembabi: Ma gi 'yo̱hu̱, ne hinte da zo ri mfenihu̱. Ma gi hyanthu̱, ha hingi pöhu̱ tema di bo̱nga nö'ö gi hanthu̱. 27Ngetho nuya jö'iyu̱ xi japi xi më yá ñö, hingi ne da 'yo̱xa nö'ö o̱de. Xi ts'a̱nt'a yá da̱, njap'u̱ hinda xo yá da̱ da hyandi, ne hinda zo yá gu, hinda kwata ha yá mu̱i, ne da hñuxka yá da̱, ha nuga da tsa̱ ga umba ár nzaki. 28Jange pöhu̱ 'mu̱, nuna ar mpo̱ho̱nu̱ unga Jö, ma da t'umbabi nu'u̱ hingya xodyo, ngetho nu'u̱ ma da 'yo̱ts'e ne da ñ'emu̱i. 29Nu mi wadi bi mönga njap'u̱ ar Pablo, ya xodyo bi ma'u̱, xa mi ñöxhnatho n'a ngu n'a. 30Ha nor Pablo bi m'u̱hnu̱ xo̱ yo nje̱ye̱ ha n'ar ngu njut'i, ne mi thöta gatho nu'u̱ mi tso̱ho̱ nda ñöwi. 31Mi xipabi ya jö'i ár ts'u̱t'wi Jö, ne mi utwabi'u̱ togo ar tsi Hmu Hesukristo. Himi ntsu nda ñö, ne hinto bi hñökwabi.

will be added

X\