YA 'BE̱FI 27

1Nu mi beñ'u̱ nda 'be̱nkagihe ga 'yohe ar dehe gár möhe har ha̱i Italia, ar Pablo ne ma'ra ya 'yofa̱di bi t'e̱nt'wár 'ye̱ n'ar döndogu már thuhu Hulio, yá ndogu ar Augusto Sesar. 2Da po̱xe ne da möhe ha n'ar döta motsa xki 'ñe har hnini Adramitio, ne nda mengi nda thota ha ya hnini 'bu̱ har ñönthe har ha̱i Asia. Mi panu̱ ndi ñ'ohe n'ehe ar Aristarko me Ntesalonika har ha̱i Nmasedonia. 3Ár hyax'ö da tso̱ñhe har hnini Sidon. Ar Hulio xa bi ñhogajö'i bi hye̱ ar Pablo nda k'ö'sa yá mpödi mi 'bu̱hnu̱, ne nda t'umba nö'ö mi k'at'i. 4Da po̱ñhenu̱ Sidon, da thothe habu̱ mi ta̱gagihe ar ndöhi ar xe̱niha̱i Txipre, ngetho ndi nto̱xkwihe. 5Da 'ranthe njöntho har dehe, da thothe get'u̱ ar ha̱i Nsilisia ne Panfilia, da tso̱ñhe har hnini Mira har ha̱i Lisia. 6Ar döndogu ka bi dinu̱ n'ar motsa mar me Alejandria, ndi ma har ha̱i Italia. Ka bi 'ñexkagihenu̱. 7Dá 'yohe 'ramtx'u̱ nze̱ye̱ ya pa, xa n'ar döta 'be̱fi'ö dá tso̱ñhe 'randitho ar hnini Gnido. Xa mi nts'e̱di ar 'yomndöhi, ne himi he̱gagihe nga 'yohe, da thothe har xe̱niha̱i Kreta habu̱ mi ta̱gagihe ar ndöhi get'u̱ ar xe̱niha̱i Salmon. 8Da ka̱tathohe ar xe̱niha̱i Kreta, 'ramtx'u̱ ndi 'yohe ndi nto̱xkwihe ar 'yomndöhi. Da tso̱ñhe ha n'ar ñönthe xki thu'spabi Ya Hoga Goxthi get'u̱ ar hnini Lasea. 9Xki tho nze̱ye̱ ya pa ndi 'yohe har dehe, ne mar ñhembi, ngetho xki tho ar ndöbëhë ne xki zo̱ ya tse̱. Jange ar Pablo mi xipabi'u̱: 10—Ha gi o̱hu̱, ndadahu̱. Di handi ma ga thohu̱ nze̱ye̱ ya thogi har 'ñu. Da tsa̱ ga 'be̱hu̱ ar motsa ne gatho nö'ö hö. Hinge ho̱nse̱'ö, tsa̱ ga jöthu̱ n'ehe. 11Ha nunar döndogu himbi japamasu nö'ö mi mönga ar Pablo. Mi te̱nda nö'ö mi mönga togo mi e̱t'a ar motsa ne togo már me̱ti. 12Ngetho hints'u̱ mar ñho nda gohnu̱ ar motsa ha Ya Hoga Goxthi nuya pa mar ntse̱. Jange nze̱ye̱ nu'u̱ mi panu̱ bi beñ'u̱ mar ñho nda bo̱nu̱, xömhö nda tsa̱ nda zo̱nga har hnini ñhanda mahyats'i ár thuhu Fenise har xe̱niha̱i Kreta, ne nda thohnu̱ ya tse̱. 13N'a mbi ñ'oda n'ar ndöhi ndi 'ñe mak'angi, jange bi beñ'u̱ gehnu̱ mi hoñ'u̱. Dama bi gu̱xa ya bo̱jö mi to̱'sa ar motsa, ne da ka̱tathohe ár ñönthe ar xe̱niha̱i Kreta. 14Hingar ya'ö bi zu̱je n'ar 'yomndöhi xa mi nts'e̱di, ndi 'ñe mahwifi ne mahyats'i. 15Nor 'yomndöhi xa mi ts'e̱di bi duxa ar motsa, da tsa̱hmöhe nga ñhanthwe, ne himbi tsa̱. Jange da he̱he bi duts'i. 16Da thothe get'u̱ n'ar xe̱niha̱i ár thuhu Klauda habu̱ mi ta̱gagihe ar ndöhi. Xa da o̱the ar ts'e̱di da ju̱xenu̱ ar t'u̱lo motsa mi ju̱t'i. 17Da jwahe da ju̱xe ar t'u̱lo motsa, bi xo̱t'u̱ nor döta, hinge nda nhwati. Nu'u̱ togo mi e̱t'a ar motsa, mi tsu nda nthe̱xkwi ya bo'sa'bomu ja mbo ar dehe yá thuhu Sirte. Jange bi gö'ma ya dutu nu'u̱ tuxa ar motsa nda ñ'o, ne bi hye̱'u̱ nda ñ'ose̱. 18Ár hyax'öp'u̱ mi nto̱xkwitho ar 'yomndöhi, jange bi ndu̱i bi 'ye̱nga har dehe gatho nö'ö mi tu ar motsa. 19Ár hñupap'u̱, man'agi bi menk'u̱ bi 'yu̱t'a har dehe nuya tema pongwa ar motsa. 20Bi tho nze̱ye̱ ya pa himbi nheki ar hyadi wa ya tso̱, ngetho xa mi 'yo ar 'yomndöhi. Ho̱nse̱ ndi to̱'mthohe ar ndöte. 21Xki tho nze̱ye̱ ya pa hinte ndi tsihe, jange ar Pablo bi m'a̱ madetho, ne bi 'ñengagihe: 22Ha nupya di xi'ahu̱, yo gi tu ri mu̱ihu̱, ngetho hinto ma ga tuhu̱, ho̱nse̱ ar motsa ma da m'e̱di. 23Ngetho manxui bi zokagi n'ár e̱nxe̱ Jö, togo ár me̱tigi ne di pe̱pabi. 24Ne bi 'ñengagi: Pablo, yo gi ntsu, ngetho mahyoni gi 'ba̱hnu̱ hár nthandi ar ndö Sesar. Ne hinge ho̱nse̱'i, Jö xi hwëk'a'i da k'ont'a gatho nu'u̱ gi ñ'owi. 25Jange nupya di xi'ahu̱, ndadahu̱, yo gi tu ri mu̱ihu̱, ngetho nuga di ñ'emu̱i Jö, ne ma da 'yo̱t'a ngu xi xikagi. 26Mödi ar ndöhi ma da 'ye̱ngagihu̱ ha n'ar xe̱niha̱i. 27Nu mi zo̱ ár 're̱t'amagoho mpa ndi 'yohe njap'u̱, mi tuxkagihe ar ndöhi har ñho̱nthe ár thuhu Adriatico. Ngu made ar xui, nu'u̱ togo mi e̱ ar motsa mi beni ma nga tso̱ñhe ha n'ar ha̱i. 28Ne bi ndu̱i bi 'ye̱nga hangu ár ñhe ar dehe. Mi pe̱'sa n'a̱te ñhu̱fi ár ñhe. Da thohe man'a tsi tu̱i, bi mengi bi 'ye̱ni man'agi. Ho̱nse̱ mi pe̱'sa 're̱t'amaku̱t'a ñhu̱fi ár ñhe. 29Mi ntsu'u̱ nda nto̱xkwi ya do ar motsa, jange bi kö'ma goho ya bo̱jö mo̱te ar motsa nu'u̱ tso̱nga har ha̱i, tsöma ar motsa. Gathogihe xa ndi nehe ngut'a nda hats'i. 30Nu'u̱ togo mi e̱t'a ar motsa, mi ne nda göi nda zop'u̱. Jange bi mengi bi 'ye̱nt'a har dehe ar t'u̱lo motsa, mi o̱t'u̱ ngu mi e̱nt'a ma'ra ya bo̱jö hár ñö ar motsa. 31Ha nunar Pablo dama bi xipabi ar döndogu ne yá ndogu, bi 'ñembabi'u̱: 32Jange ya ndogu dama bi hye̱ka ya nthöhi habu̱ mi zu̱ ar t'u̱lo motsa, ne bi ntho̱ge bi ma. 33Nu mi hats'i, ar Pablo mi xikagihe gatho nga nzimxudihe, ne bi 'ñenje: 34Jahu̱ ar möte gi ñuñhu̱. Mahyoni gi pe̱'su̱ ar ts'e̱di, ngetho di xi'ahu̱ hinto gi 'be̱hmöhu̱ n'ar xtö. 35Mi mönga njap'u̱ ar Pablo, bi gu̱ n'ar thuhme, bi umba njamödi Jö ha yá nthandi'u̱. Ne bi xe̱ka n'a xe̱ni bi ndu̱i bi zi. 36Nu'mú̱ gatho bi hñu yá mu̱i, ne bi ñuñ'u̱ n'ehe. 37Nu'u̱ ndi pa̱he har motsa, yonthebe hñun'a̱tema're̱t'a ne 'rato ya jö'i. 38Nu mi niñö'u̱, bi 'yu̱t'a har dehe ya t'e̱i, ne njap'u̱ nda göt'a ár ñhu̱ ar motsa. 39Nu mi hats'i, nu'u̱ togo mi e̱t'a ar motsa bi hyanda n'ar ha̱i, mödi himi pödi tema ha̱i'ö. Mi pe̱'sa n'ar ñu̱t'i har ñönthe habu̱ mi nheki ar 'bomu. Bi beñ'u̱ xömhö nda tsa̱ nda 'ba̱'mnu̱ ar motsa. 40Bi hye̱ka ya nthöhi mi thöt'a ya bo̱jö mi tsöma ar motsa, ne bi zop'u̱ har ñho̱nthe. Bi nsot'wa yá nthöhi nö'ö ar za e̱t'a ar motsa. Nep'u̱ bi po̱'sa nu'u̱ ya dutu hár ñö ar motsa, ne njap'u̱ ar ndöhi bi 'ye̱t'a har ñönthe. 41Ha nú'mu̱ mi zo̱nga habu̱ mi pe̱'sa yoho ya ts'e̱di ar dehe, ar motsa bi nthe̱wi ar 'bomu, ne bi mfoxa ár ñö, ne himbi tsa̱ bi ñ'o. Ha nu mo̱te mi nhwati xa mi fe̱'sa ar dehe. 42Nu'mú̱ nuya ndogu bi beni mar ñho nda hyo gatho ya 'yofa̱di, ne hinge nda hya̱t'i nda ma'u̱ ñ'a̱nthe. 43Nunar döndogu himi ne nda tho ar Pablo, jange himbi hye̱gi nda 'yo̱t'u̱. Ne bi 'be̱pa nda 'ye̱ngar nsa̱gi m'e̱t'o gatho nu'u̱ mi pödi nda ñ'a̱nthe, ne nda bo̱nga har ñönthe. 44Ha nu ma'ra himi pödi nda ñ'a̱nthe, bi 'be̱pabi nda gu̱ 'ra ya xithe̱ ne 'ra yá xe̱ni ar motsa. Ne njap'u̱ hinto bi du, gatho da tso̱ñhe har ñönthe.

will be added

X\