YA 'BE̱FI 20

1Nu mi wa ar mu̱xmajö'i, ar Pablo bi zohna gatho ya ku, bi hñu'mba yá mu̱i, bi hyu̱fi, ne bi ñ'edi bi bo̱ni bi ma Nmasedonia. 2Bi mengi bi thota habu̱ xki tho m'e̱t'o mi tso̱nga ya ku, ne xa mi zofo mi hu'mba yá mu̱i. Bi jap'u̱ gatho ar 'ñu ndi ma Gresia. 3Ka bi m'u̱hnu̱ hñu nzönö, mi ñhoki ndi ma Nsiria. Ha bi zo ár gu nuya xodyo xki hñuts'i nda hyo nú'mu̱ nda gu̱ ar motsa ndi manu̱, jange bi beni nda ga̱xta har ha̱i Nmasedonia man'agi. 4Bi me̱wi ndi ma Asia ar Sopate me Berea, ar Aristarko ne ar Segundo ya me Ntesalonika, ar Gayo me Derbe, ar Tikiko ne ar Trofimo ya me Asia, ne ar Timoteo. 5Nuya kuyu̱ bi m'e̱t'o, ma ba to̱bgagihe Ntroa. Ka dá nthe̱henu̱. 6Nuje da to̱'mhe bi tho ar da̱ngo nú'mu̱ ts'i ar thuhme hingi jots'i. M'e̱fa da po̱ñhenu̱ Mfilipo, da 'rañhe ar ñho̱nthe. Ku̱t'a mpa da 'yohe har dehe, ne da tso̱ñhe Ntroa. Dá nthe̱henu̱ ya ku xki m'e̱t'o, ne da kohenu̱ ma yoto mpa. 7Nö'ö ár 'be̱t'o mpa ar hñöto, bi mhunts'a gatho ya gamfi nda zipa ár t'oxi ar tsi Hmu. Ar Pablo mi uti, mi zo̱nga made nxui himi tsa̱ya̱tho, ngetho ma nda bo̱nga ár hyax'ö. 8Nunar ngu habu̱ xki mhunts'i, mi to̱ mañö, ne xki tso̱ nze̱ye̱ ya ñot'i. 9N'ar ts'u̱nt'u̱ már thuhu Eutiko, mi huhnu̱ ha n'ar ku̱t'ahyats'i. Bi zo̱par t'öhö, ngetho ar Pablo bi ñö ya'ö. Mi mit'ar t'öhö bi da̱ har hñu nto̱ngu. Ha bi nju̱ts'i, xki du. 10Nu'mú̱ ar Pablo bi göi, bi 'yoxa nö'ö ar bötsi ne bi hyu̱fi. Ne bi 'ñembabi ya ku: 11Bi bo̱xa man'agi habu̱ xki mhunts'i. Bi heka ar thuhme, bi zi'u̱ ár t'oxi ar tsi Hmu bi ñuñ'u̱. M'e̱fa ar Pablo bi mengi bi ñö ya'ö, ne mi nthe̱ngxudi bi gu̱r 'ñu bi ma. 12Ha nu mi ts'ixa nö'ö ar ts'u̱nt'u̱ xki da̱gi mi tetho, gatho ya ku xa bi hñu yá mu̱i. 13Nuje da ju̱he ar motsa da 'be̱t'ohe, da möhe har hnini N'ason, ka nga nthe̱henu̱ ar Pablo ngu dá möñhe, ngetho mi ne'ö nda ma watho. 14Nda nthe̱henu̱ N'ason, da tsixe har motsa ndi ehe, da möhe mahye̱gi har hnini Mitilene. 15Da po̱ñhenu̱, ne ár hyax'ö da tso̱ñhe get'u̱ har xe̱ni ha̱i Kio. Ár yopa da tso̱ñhe ha man'a xe̱ni ár thuhu Nsamo, ne da kohe habu̱ ár thuhu Trogilio. Ár hñupa da tso̱ñhe har hnini Mileto. 16Ar Pablo xki beni hinge nda tho har hnini Efeso, ngetho himi ne nda m'u̱ nze̱ye̱ ya pa har ha̱i Asia. Mi xo̱ni nda zo̱nga har hnini Herusalen, ma nda m'u̱ har da̱ngo Pentekoste, nu'mu̱ nda za̱mhö nda zo̱ni. 17Nu mi 'bu̱hnu̱ Mileto, ar Pablo bi me̱mpa ar nze̱ngwa yá ndö ar nijö Efeso, bi 'ñembi mi to̱'mnu̱ Mileto. 18Nu mi zo̱ñ'u̱ habu̱ mi 'bu̱ ar Pablo, bi 'ñembabi'u̱: 19Xta pe̱pa ma tsi Hmuhu̱, hinxta ñ'ets'i. Xta nö'ma ma gida̱, xta tho ya ts'om'u̱i nu'u̱ xi 'yo̱tka ya xodyo, hu'skathogi da hyogagi'u̱. 20Mödi njap'u̱, hinte xta ögi nö'ö gi hoñhu̱ da ja'ahu̱ ar ñho. Gatho xta ut'ahu̱ ha ya mhunts'i wa ha ri nguhu̱. 21Nu'ahu̱ gar xodyohu̱ ne nu'u̱ hingya xodyohu̱, xta zo'ahu̱ gi ehu̱ hár nthandi Jö gi 'yo̱thwu̱ ár ntso̱'mi, ne gi ñ'emu̱ihu̱ ma tsi Hmuhu̱ Hesukristo. 22Ha nupya tsixka ár Hñö Jö gar ma Herusalen, mödi hindi pödi teme bi to̱bgaginu̱. 23Ho̱nse̱ di pödi xi xikagi ár Hñö Jö ha gatho ya hnini di thogi, bi to̱bgagi ar fa̱di ne ya thogi. 24Ha nuyu̱, hindi japamasu, ne hindi japa ma te da me̱pkase̱. Nö'ö di nega, ga johya ga jwata nunar 'be̱fi bi 'raka ar tsi Hmu Hesu. Nor 'be̱fi'ö, ga mömba ár hoga mhö no̱nga teme xi hwëgagihu̱ Jö. 25Ha di pöpya xiñho, nu'ahu̱ xtá thop'u̱ xta xi'ahu̱ ár ts'ut'wi Jö, hingi ma gi penju̱ gi hyandagihu̱ man'agi. 26Jange di xi'ahu̱, hingo 'ba̱ ma ñöni nú'mu̱ gi m'e̱hu̱pya. 27Ngetho nuga hinte xta ögi. Gatho nö'ö xi utka Jö, xta ut'ahu̱ n'ehe. 28Di xi'ahu̱, ntsuñhu̱, ne suhu̱ gatho ya gamfi xi 'ye̱nt'ahu̱ ri 'ye̱hu̱ ár Hñö Jö, ngu n'ar ma̱'yo su yá tsi de̱ti. Gese̱'ö xi 'ñex'ahu̱ gi sufu̱ ár nijö ar tsi Hmu xi unga ár ji xi da̱i. 29Nuga di pödi n'ehe, nu xka magawa, ma da ep'u̱ 'ra ya ts'ojö'i, da ne da hwatwa gatho ár nijö Jö, ngu n'ar miñ'o hinte ma de̱ti e̱gi. 30Hinge ho̱nse̱'u̱, 'ra da bo̱nga madeda ri mhunts'ihu̱, ma gi möñhu̱ 'ra ya nt'uti hinga majöni, ne gi 'weju̱ ya ku gi tsixu̱. 31Jange ntsuñhu̱, ne beñhu̱ nu'u̱ hñu nje̱ye̱ parxui hinge ndi tsa̱ya̱ ndi nö'ma ma gida̱, xa ndi hup'a ri mu̱ihu̱ n'a ngu n'a. 32Nupya tsi kuhu̱, di te̱t'ahu̱ Jö ne ár mhö mönga teme xi hwëk'ahu̱. Gehnu̱ pe̱'sa ar ts'e̱di da ze̱t'a ri jamfihu̱, ne gi hñöñhu̱ gatho nö'ö xi ñhöt'wa nu'u̱ xi t'axka yá m'u̱i. 33Nuga hinto xta hyo̱kwabi ár bojö wa ár he. 34Ngetho nuga ngu gi pöse̱hu̱, nuya 'ye̱yu̱ xi ma̱xkagi xta mpe̱fi xta tö nö'ö ndi honse̱ ne nö'ö honga nu'u̱ di ñ'o'be. 35Hyax'mu̱ xta ut'ahu̱ ga mpe̱hu̱ njap'u̱, ne da tsa̱ ga fa̱xu̱ nu'u̱ hinte pe̱ts'i. Ne ga beñhu̱ nö'ö bi mönga ar tsi Hmu Hesu, nú'mu̱ bi 'ñenö: Töte ár nza̱tho ga uñhu̱, hinge nö'ö ga höñhu̱. 36Nu mi wadi bi mönga njap'u̱ ar Pablo, bi nda̱ndihmöwi gatho ya ku, ne mahye̱gi bi 'ya̱pa Jö'u̱. 37Gatho ya ku xa mi zoni, mi döta ár dumu̱i'u̱. Mi hu̱ ar Pablo ne mi tsu̱'spa ár hmi. 38Ngetho xa mi tu yá mu̱i mi 'yo̱xa nö'ö bi mönga ar Pablo, hinge nda mengi nda hyandi. Bi ma ba exa har motsa, bi ñ'ehwi bi ma.

will be added

X\