ÁR HÑU AR XUWA 1

1Nuga dar Xuwa ar dönzia, di ot'a nunar he̱'minu̱, ma tsi hmöka ku Gayo togo di mö'i ngetho gi te̱nga nö'ö majöni. 2Ma tsi hmöka ku'i, di a̱pa Jö da bo̱nga gatho xiñho nö'ö gi pe̱fi, ne gi pe̱'sa ar nzaki, ngu 'yo di xu ár ts'e̱di Jö ha ri mu̱i. 3Xa da njohya nú'mu̱ mba e ya ku bi xikagi nö'ö majöni ja ha ri mu̱i, ne hanja gi umba ri mu̱i gi te̱nu̱. 4Hiñ'otho man'ar johya di töta nö'ö xta o̱de, nu'u̱ po̱ntho ma bötsi xa umba yá mu̱i te̱nga nö'ö majöni. 5Ma tsi ku'i, xa gi o̱t'a n'ar hoga 'be̱fi gi fa̱xa ya ku, ne m'e̱t'o nu'u̱ hinga ri mpödi. 6Nuya ku'u̱ xi da̱majöni har nijö xa gi pe̱'sar mhöte. Jange di beni xiñho hingi hye̱p'u̱tho njap'u̱. Fa̱ts'i da ñ'o yá 'ñu, ngu di 'ñepi da mfa̱xa n'ár 'be̱go Jö, ne da zo̱nga habu̱ di ma'u̱. 7Nuya kuyu̱ mpe̱fi ngetho möpa ár thuhu ar tsi Hmu, ne hingi hömba yá mfa̱ts'i umba nu'u̱ hingya gamfi. 8Nuju̱ dar gamfihu̱'mu̱, ma ga fa̱xu̱ nuya kuyu̱, ne njap'u̱ ga mfa̱xtehu̱ da nu̱nga nö'ö majöni. 9Nuga xta ot'wa ar nijö, ha nunar Diotrefe togo o̱t'a ndöta madeda ya ku, hingi japamasu nö'ö di xife. 10Jange nu'mu̱ xka map'u̱, ma ga xi'ahu̱ ha ri mhunts'ihu̱ gatho nuya te o̱t'a nunar Diotrefe. Ju̱sje ya nhemhñö. Hinge ho̱nt'ö pe̱fi, hingi umba ar se̱ki ya ku, ha nu'u̱ unga ar se̱ki tsu̱i ne e̱nga har nijö. 11Ma tsi ku'i, yo gi te̱nga nö'ö hingi ho, te̱nga nö'ö xiñho. Nö'ö togo o̱t'a xiñho, gor me̱ti Jö, ha nö'ö togo o̱t'a nö'ö hingi ho, hinxi bö Jö. 12Gatho ya ku da̱majöni, nunar ku Demetrio o̱t'a xiñho, ne nö'ö o̱t'e da̱se̱ majöni n'ehe. Ha nuje di eñhe, hö njap'u̱, ne gi pöhu̱ di möñhe majöni. 13Nuga ndi pe̱'sa nze̱ye̱ te nga xi'ahu̱, mödi hindi ne ga ot'a ha n'ar he̱'mi ne ar nt'ot'i. 14Ngetho di ne ga nthe̱wi ngut'a ne ga ñhandwi ga ñöhu̱. 15Jö da 'ra'a n'ar hogam'u̱i. Gatho ya ku di mpöhu̱ pe̱ñ'a nze̱ngwa. Ze̱ngwagihep'u̱ n'a ngu n'a ya ku di mpöhu̱.

will be added

X\