ÁR ÑOHO AR TIMOTEO 4

1Di 'be̱p'a'i hár nthandi Jö ne ár nthandi ar tsi Hmu Hesukristo, togo ma da hñö'spa majöni gatho ya jö'i, nu'u̱ di te ne nuya xi du, xta penga da ndö. 2Mömba ár mhö Jö, hiñham'u̱ gi tsa̱ya̱ gi uta ma'ra, 'yot'wa ar 'ñu, tsu̱i, zofo da m'u̱i xiñho. Pe̱'sa ar ts'e̱ti gi mömba ár nt'uti Jö. 3Ngetho ma da zo̱ ya pa nuya jö'i hinda ne da 'yo̱xa ar hoga nt'uti. Dar nxöhi yá gu te gatho ne da 'yo̱'u̱, ma da munsa nze̱ye̱ ya utate da xipa nö'ö ne'u̱. 4Hinda ne da 'yo̱x'u̱ nö'ö majöni. Ma da 'wege da 'yo̱xa ya 'bede xi bense̱ ya jö'i. 5Ha nu'ge su ri mfeni, tse̱ta ya dumu̱i, umba ri mu̱i gi mömba ár hoga mhö Jö, 'yo̱t'a xiñho nö'ö ar 'be̱fi xi t'a'i. 6Ngetho nuga bi da̱t'a ar pa nda nda̱twabi ma te Jö ngu n'ar m'o̱ñho̱, ne di 'ba̱ ar 'ñu ga tsokwa nunar ximha̱inu̱. 7Xta o̱t'a ar ts'e̱di xta ntöte har hoga tuhni, xta jwata ar 'be̱fi xi t'akagi, ne xta pödi xta su xiñho ar ñ'emu̱i bi t'utkagi. 8Jange nupya xi 'be̱skatho ma nthöhö t'umba nu'u̱ 'bu̱ xiñho, ma da 'raka ár hoga ts'u̱t'wi ar tsi Hmu Hesukristo hár ngöts'i ya pa. Hinge ho̱nse̱gi, ma da t'umbabi gatho nu'u̱ to̱'mi da penga man'agi. 9Jar möte gi e ngut'a gi k'öskagi. 10Ngetho ar ku Dema bi ma Ntesalonika, bi de̱nga ar ximha̱i bi zogase̱wa. Ar ku Kresente bi ma Galasia ne ar ku Tito bi ma Dalmasia. 11Ho̱nse̱ di 'bu̱'bewa ar ku Luka. Xki ehe ba tsip'u̱ ar ku Mörko, ngetho di honga hár 'be̱fi Jö. 12Ar ku Tikiko da pe̱hni bi map'u̱ Efeso. 13Xki ehe ba hönkats'u̱p'u̱ ma pa̱t'i da tso Ntroa hár ngu ar ku Karpo. Gi hö ya t'ofo, benga m'e̱t'o gi hö nu'u̱ xi t'ot'a nximhni. 14Ar Handro nö'ö ar hwit'i xa xi 'yo̱tka ya ts'om'u̱i. Ar tsi Dada da ko'spa ár ñöni nö'ö xi 'yo̱tkagi. 15Jange nu'ge jamasunu̱ n'ehe, xa xi umba ár mu̱i xi do̱xa nö'ö di möñhu̱. 16Nu ár mu̱di bi zonka ya ts'u̱t'wi, hinto bi ma̱xkagi, gatho bi hye̱gatho. Ar tsi Dada da pumbabi'u̱. 17Ar tsi Hmu himbi hye̱gase̱gi, bi 'rakagi ar ts'e̱di bi tsa̱ da mömba ár mhö Jö, ne bi 'yo̱ gatho nu'u̱ hingya xodyo. Njap'u̱ bi po̱kagi himbi zagagi ya 'muhu. 18Ne di pödi da po̱kagi ar tsi Dada. Hinda hye̱gi da 'yo̱tka ya ts'omfeni benga ya jö'i, ne da kwatka ma te da zixka mhets'i hár ndö'ö. Ge'ö di 'ñepabi da nsundabi gatho ya pa. Dá njap'u̱. 19Ze̱ngwagip'u̱ ar ku Priska ne ar ku Akila, ne gatho yá mëni ar ku Onesiforo. 20Ar ku Erasto bi gohnu̱ Nkorinto, ha nu ar ku Trofimo da tso Nmileto ngetho mi hñeni. 21Jar möte gi e ngut'a, yo gi to̱'mi da zo̱ ya tse̱. Pe̱ñ'a nze̱ngwa ar ku Eubulo, ar ku Pudente, ar ku Linu, ar ku Klaudia ne gatho nuya ku 'bu̱kwa. 22Dá su'ahu̱ ar tsi Hmu Hesukristo, dá hwëk'ahu̱ ár njöpi gi gathohu̱. Dá njap'u̱.

will be added

X\